Informe di Proclamadornan di Reino

E Berdad di Bijbel Ta Sigui Ser Predicá na Irlanda

DEN añanan recien e pais pintoresco di Irlanda tabata e esena pa bastante disturbio. N’e mésun tempu, irlandesnan a respondé faborablemente n’e mensahe bíblico di speransa cu Testigonan di Jehova a hiba na nan. E siguiente experencianan for di Irlanda ta confirmá esaki.

■ Na Dublin un Testigo di Jehova i su yu muher chikitu tabata participando den e trabou di predicacion di cas-pa-cas. Nan a topa un señora yamá Cathy kende tabata masha ocupá cu su hopi yunan. E Testigo a puntr’é si su yu muher cu tabata siñando con pa predicá, por a compartí djis un mensahe breve cuné. Cathy a bai di acuerdo, i e mucha muher chikitu a duna un presentacion cla i bon hincá den otro. Cathy a keda impresioná cu e hobencita su sinceridad i respet bisto, i a aceptá e oferta di un tratado bíblico.

Mas despues Cathy a pensa riba e bon presentacion i manera di su bishitante yong. “Mi a keda impresioná cu un mucha muher chikitu por a compartí un mensahe interesante asina sin hala atencion na su mes,” el a bisa. “Mi a dicidí cu e siguiente biaha cu Testigonan di Jehova yama, lo mi scucha nan.”

Entretantu Cathy a muda pa un pueblo chikitu den e parti zuidwest di Irlanda cerca e frontera dje provincianan Cork i Kerry. Algun tempu despues Testigonan di Jehova a yama na su porta, i el a invitá nan drenta. El a aceptá un studio regular di Bijbel i awor ta asistí n’e reunionnan di congregacion cu vários di su yunan. Cathy ta gradicidu p’e deseo genuino dje mucha muher chikitu pa compartí e bon nobo cuné.

■ Den e área di Tullamore, na vários ocasion e Testigonan tabatin consideracionnan bíblico cu un señora yamá Jean durante un periodo di shete aña. Algun biaha el a mustra interes i a aceptá literatura, pero na otro ocasionnan su interes a mengua. Un dia, ora un Testigo yamá Frances i un compañera a bishitá Jean, nan a hañ’é cu un mal beis. “Kico cu nos a bisa,” segun e Testigonan, “el a bira pió. Finalmente, el a bisa nos pa bai djei i a dal e porta cera.”

Frances a puntra su mes si mas bishita lo a solamente invitá un recepcion similar. ‘Tal bes no ta bale la pena mas pa bishit’é si e no ta realmente interesá den e mensahe,’ Frances a pensa. Sin embargo, el a combersá riba e asuntu cu su esposo, Thomas, i e último aki tabatin mas speransa. E siguiente biaha cu nan tabata den e área, nan a bishitá Jean un biaha mas. E tabata amigabel i a aceptá copianan dje revistanan Toren di Vigilancia i Spierta! Mas bishitanan tabata mes agradabel, i Thomas i Frances a cuminsá un studio bíblico regular na cas cuné.

Pakico e cambio? Jean ta splica cu e biaha cu e tabata asina grosero cu e Testigonan tabata pasobra recientemente el a duna lus i a caba di sali for di hospital. Pa motibu cu e mester a duna su baby recien nací pechu i duna su baby mas bieu cuminda na boca, e tabata haña solamente un ora i mei di sosiegu anochi. “E último cos cu mi kier a haci,” Jean ta bisa, “tabata di papia tocante religion.”

Dentro di dos luna Jean tabata asistiendo na tur reunion di congregacion, i dentro di cuater luna e tabata participando den e ministerio di veld. Dies luna desde e tempu cu el a cuminsá su studio di Bijbel, el a ser bautisá. Awor Jean su mes experencia ta yud’é den e ministerio. E ta conta: “Si mi topa un persona cu ta masha grosero, mi ta purba mustra mas comprension. Semper mi ta haci un nota di esei. Kisas e situacion lo cambia p’e tempu cu mi bin bek; e persona por ta sintiendo su mes mihó i ta mas receptivo.”