Fe den Dios—E Mester Rekerí un Milager?

ALBERT tabatin binti’picu aña di edad ora el a cuminsá busca Dios. El a examiná un cantidad di religion pero sin keda satisfecho. Lesando partinan di Bijbel, el a siña con Dios a trata cu individuonan manera Noe, Abraham, Sara i Moises. Albert a sinti su mes atraí na e Dios di Bijbel. Sin embargo, con lo e por tabata sigur cu Dios realmente ta existí?

Un anochi Albert a bai cu auto na un lugá isolá caminda el a resa pidi, “Por fabor, Dios, duná mi un señal—cualkier cos pa proba cu bo ta existí.” Albert a spera i spera. E ta corda cu ora nada no a pasa, su expectativa “a bira decepcion, despues un sintimentu di bashí, caba rabia.”

Mescos cu Albert, hopi hende ta sinti cu nan a busca Dios en bano. Kisas nan ta confundí dor dje sermonnan di miembronan di clero of desilusioná dor dje manera cu tele-evangelistanan ta comercialisá e evangelio. Confundí dor dje hipocresia evidente entre hopi di nan asina yamá próhimo cristian, algun no ta sigur kico pa kere. Sin embargo, Rey David di Israel di antigwedad a garantisá su yu Sálomon: “Si bo busca [Dios], lo e lagá bo hañ’é.”—1 Crónicanan 28:9.

Wel, anto, con Dios ta revelá su mes? Bo mester spera un señal—un of otro experencia sobrenatural cu lo duná bo e prueba cu Dios ta existí? Segun un encuesta recien cu revista Time a informá di dje, mas cu dos tercer parti di mericanonan ta kere den milager. E artículo a mencioná tambe cu “e misanan cu ta crece mas lihé na Merca ta e iglesianan carismático i pentecostal cuanan su adoracion ta drei rond di ‘señal i milagernan.’”

“Señal i milagernan” ta realmente necesario pa kere den Dios? El a usa milager den pasado. Pa ilustrá: Saul di Tarso, kende tabata persiguí e siguidornan dje Yu di Dios, Jesucristo, tabatin un experencia extraordinario riba e caminda for di Jerusalem pa Damasco. E encuentro milagroso aki cu Jesus resucitá a hiba na Saul su combertimentu. (Echonan 9:1-22) Asina, un ex-persiguidor a bira e apostel Pablo—un dje defensornan principal di cristianismo!

Pero semper milager ta causa un reaccion faborabel asina? Ta un of otro experencia milagroso ta necesario pa hende haña berdadero fe den Dios?

[Plachi na página 3]

E Yu di Dios a papia milagrosamente cu Saul di Tarso. Abo mester spera un milager?