Pakico e Tempu Aki Ta Asina Malu?

ORA bo cai sinta pa lesa un corant of wak noticia na television of scucha un transmision di noticia na radio, bo ta verwagt di tende algun mal noticia, no ta asina? Probablemente bo no ta keda sorprendí ora bo haña sa cu un guera cu tabata andando ainda ta causando gran daño, cu crímen violento ainda ta plamá na tur parti, of cu hamber ainda ta debilitando e fortalesa di un pais den desaroyo.

Si bo ta biba un poco leu for di e sucesonan aki, probablemente bo no ta sintí bo constantemente demasiado afligí dor di tal informenan. Al fin i al cabo, ken por soportá pa sinti pa tur e masanan ei di hende cu ta sufriendo? Asina mes, ta masha difícil pa keda sin ser conmoví ora nos ser confrontá cu e manera cu sufrimentu ta afectá personanan individual. Cu otro palabra, aunke ta un cos pa lesa tocante un guera i pensa riba e estadísticanan di cuantu hende a muri, ta completamente un otro cos pa lesa tocante e hobencito Adnan, un mucha homber bosnio di nuebe aña di edad, kende su mama a ser matá ora un bom a destruí nan cas. Adnan su tata a ser heridá mortalmente dor di tiroteo for di emboscada djis un par di luna despues segun cu nan tabata canando huntu den un caya. Su ruman muher a sangra muri dilanti su wowonan djis un par di siman despues, víctima di un granada cu a cai den curá di scol. Dokternan cu a trata Adnan pa trauma a ripará cu e mucha homber tabata insensibel, sin niun sintimentu—ni sikiera curiosidad. Miedu i flashback tabata torment’é ora e tabata lantá; pesadiyanan tabata strob’é di drumi. Adnan no ta un cifra di estadística. E ta un mucha sufriendo; nos no por keda sin sinti p’e.

Mescos ta cierto tambe cu otro problemanan di mundu. Ta un cos pa lesa tocante hamber; ta completamente un otro cos pa mira un potret di un mucha muher di cincu aña cu barica hinchá i brasa cu pianan manera palu di lusafè, un víctima di hamber apénas na bida. Ta un cos pa lesa dje estadísticanan di crímen; ta completamente un otro cos pa tende di un biuda di edad avansá cu a ser brutalmente batí, hortá i violá. Ta un cos pa lesa tocante e deterioro dje bida di famia; ta completamente un otro cos pa haña sa di un mama cu deliberadamente a laga su propio yu sufri di hamber i a abusá di dje cruelmente.

Ta doloroso pa lesa tocante cosnan asina. Pero ta cuantu mas pió ora un dje plaganan mundial aki ta afligí nos directamente! Ora abo personalmente ta sufri di maldad, e situacion di mundu presentá den noticia mundial por bira aplastante. Ta spantoso pa enfrentá e echo cu sufrimentu debí na crímen, guera, hamber i malesa ta aumentando na un escala sin precedente den historia humano. E efectonan di trata cu e realidadnan dje siglo 20 aki por ta en berdad profundo—confusion, miedu i depresion ta comun.

Hende di hopi religion ta buscando contesta pa preguntanan perturbador manera, Pakico cos ta asina malu? Unda humanidad ta bayendo?

Lamentablemente, religionnan djawe rara bes ta ofrecé contestanan satisfactorio. Na promé instante, ora bo a mira e pregunta riba e portada dje revista aki, kisas bo a reaccioná cu skepticismo—un reaccion comprendibel. Religionnan fundamentalista hopi bes ta purba interpretá for di Bijbel cosnan cu e simplemente no ta contené—e dia i ora exacto dje fin dje mundu aki. (Mira Mateo 24:36.) E publicadornan dje revista aki ta preferá di laga Bijbel splica su mes. Kisas lo bo keda sorprendí pa sa cu e Bijbel su consideracion dje último dianan ta basá riba echo i ta razonabel. I Bijbel ta haci mas cu splica pakico cos ta asina malu. Tambe e ta percurá un speransa pa futuro, un speransa cu ta berdaderamente consolador. Nos ta invitá bo pa considerá e siguiente artículonan pa mira con esaki ta e caso.

[Rekonosementu pa Potrèt na página 3]

Jobard/Sipa Press