Un Rey cu Rikesa i Sabiduria

Bo ta kere cu rikesa por hací bo felis? Si un hende duná bo un suma grandi di placa, lo bo no keda contentu? Probablemente cu sí. Casi sigur bo por pensa yen manera pa gast’é.

NOS tin cu admití cu tin hopi cos cu bo por cumpra pa haci bo bida mas cómodo i agradabel. Placa por sirbi tambe “pa un proteccion” contra problemanan imprevisto, manera enfermedad of desempleo.—Eclesiástes 7:12.

Pero ki relacion tin entre placa i felicidad? Bo ta kere, mescos cu hopi hende ta kere, cu ta rikesa ta trece felicidad? Kisas ta difícil pa haña contesta riba e preguntanan aki pasobra ta fácil pa midi of conta placa, pero esei no ta e caso cu felicidad. Bo no por pone felicidad riba un balansa i midié.

Tambe, algun hende ricu ta parce di ta felis, miéntras cu otronan ta infelis. Mescos ta cierto di esnan cu ta pober. Tog, mayoria hende—asta esnan cu ta ricu caba—ta kere cu mas placa lo trece mas felicidad pa nan.

Un persona cu a skirbi tocante cosnan asina tabata Rey Sálomon di Israel di antigwedad. E tabata un dje hombernan mas ricu cu a yega di biba. Bo por lesa un descripcion di su rikesa enorme den e di 10 capítulo dje buki bíblico di Promé Reynan. Ripará, por ehempel, cu versículo 14 ta declará: “E peso dje oro cu a bini na Sálomon den un aña a suma te na seishent’i sesenta i seis talento di oro.” E cifra ei ta ekivalente na 25 ton di oro. Awe, e cantidad di oro ei lo a bal hopi mas cu 360.000.000 florin!

Tog, Sálomon no tabata solamente ricu; Dios a bendicion’é cu sabiduria. Bijbel ta conta: “Rey Sálomon tabata mas grandi den rikesa i sabiduria cu tur e otro reynan dje tera. I tur e hendenan dje tera tabata busca e cara di Sálomon pa tende su sabiduria cu Dios a pone den su curason.” (1 Reynan 10:23, 24) Nos tambe por saca beneficio for di Sálomon su sabiduria, ya cu su obranan skirbí ta forma parti dje registro di Bijbel. Laga nos mira loke e tabatin di bisa tocante e relacion entre rikesa i felicidad.

[Rekonosementu pa Potrèt na página 3]

Reproducí for di Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart