Construyendo Riba Fundeshi Pagano

E PANTEON ta un dje hopi monumentonan impresionante cu turistanan ta bishitá na Roma, Italia. E obra maestro aki di arkitectura romano ta un dje poco edificionan cu substancialmente a keda manera e tabata den antigwedad. Agripa a cuminsá trah’é rond di aña 27 P.E.C., i Adriano a reconstruyé rond di aña 120 E.C. Un rasgo notabel dje edificio aki ta su koepel cu tin un diameter di 43 meter, i ta construccionnan moderno so ta mas hanchu. Originalmente, e Panteon tabata un tempel pagano, un “lugá pa tur dios,” loke ta e nificacion dje palabra griego original. Awe, ainda e ta ser considerá como un misa Católico Romano. Con un transformacion sorprendente asina por tabata posibel?

Na aña 609 E.C., Papa Bonifacio IV a rededicá e tempel aki cu pa hopi tempu no tabata den servicio, como un misa “cristian.” N’e tempu ei, nan a dun’é e nomber di Iglesia Santa Maria Rotunda. Segun un artículo publicá den e revista jesuita italiano, La Civiltà Cattolica, Bonifacio a pensa di usa e misa principalmente pa “glorificá tur e mártirnan cristian, of mas bien tur e santunan, pero promé cu tur, La Bírgen Mama di Dios.” E nombernan, Santa Maria ad Martyres of tambe, Santa Maria Rotunda cu Iglesia Católico Romano a duna e Panteon awe, ta reflehá e intencion no-bíblico ei.—Compará cu Echonan 14:8-15.

E mésun artículo ta sigui bisa cu “no tabata masha trabou” pa adaptá e Panteon na su propósito nobo. “Bonifacio a sigui e reglanan simpel i liberal establecé dor di su predecesor, San Gregorio e Grandi [Papa Gregorio I], un maestro i ehempel den adaptá tempelnan pagano pa usa nan den adoracion cristian.” Cua tabata e reglanan aki?

Den un carta pa un misionero cu mester a bai Inglatera pagano na aña 601 E.C., Gregorio a duna e instruccion aki: “No mester destruí e tempelnan dje ídolonan den e pais ei; pero solamente e ídolonan cu lo por ta den nan . . . Si e tempelnan ei ta den bon condicion, mester cambia nan, esta, for di adoracion di diabel pa sirbishi di e Dios berdadero.” Gregorio a pensa cu si e hendenan pagano mira cu nan tempelnan anterior a keda intacto, nan lo tin mas smak di sigui bishitá nan. Teniendo cuenta cu paganonan tabatin custumber “di mata hopi toro pa sacrificio n’e diabelnan,” e papa a skirbi, awor tabata di spera cu “nan no ta sacrificá bestia mas na diabel pero cu nan ta mata nan pa nan mes come den alabansa na Dios.”

Tambe catolicismo romano “a contrarestá” adoracion pagano dor di funda misanan dedicá na patrononan “cristian,” hopi cerca dje tempelnan anterior. Nan a adoptá celebracionnan di antigwedad i a duna nan un nificacion “cristian.” La Civiltà Cattolica a expres’é cu e palabranan aki: “Tur erudito moderno sa cu algun custumber i celebracion religioso dje cristiannan di promé tin relacion estrecho cu cierto prácticanan pagano. Nan tabata prácticanan demasiado pegá na curason dje pueblo, custumbernan profundamente ancrá cu tabata parti integral dje bida público i privá dje mundu di antigwedad. E iglesia mama, complaciente i sabí, no a haña cu e mester a abolí e práctica i custumbernan aki; mas bien, dor di duna nan un bachi cristian, el a elevá nan na un noblesa i bida nobo. El a actualisá nan cu medionan poderoso pero tog suave i asina gana pa su mes, sin problema, alma di tantu e masa como di e hendenan educá.”

Un ehempel bon conocí di adaptacion di fiesta pagano, ta Pascu naturalmente. Eigenlijk, 25 di december tabata e fecha riba cua e romanonan di antigwedad tabata celebrá dies natalis Solis Invicti, cu ta nificá “e aniversario dje solo invencibel.”

Den su afan pa gana curasonnan pagano, e iglesia no a pega n’e berdad. Su hustificacion p’e echo cu nan a mescla, tuma over e creencia i prácticanan pagano aki, tabata cu “e masa ta stima” nan. E resultado tabata un iglesia mesclá, apóstata i hopi diferente for dje siñansanan di berdadero cristianismo. Considerando tur loke a ser mencioná caba, no ta nada straño cu un antiguo tempel romano dedicá na “tur dios,” e Panteon, lo a bira un misa Católico Romano dedicá na Maria i tur “santu.”

Sin embargo, mester keda bon cla sí cu djis cambia e dedicacion di un tempel of e nomber di un celebracion no ta suficiente pa transformá ‘adoracion di diabel den sirbishi n’e Dios berdadero.’ “Ki acuerdo e tempel di Dios tin cu ídolonan?” apostel Pablo a puntra. “‘Sali for di meimei di nan, i separá boso mes,’ Jehova ta bisa, ‘i stop di mishi cu e cos impuru’; ‘i lo mi ricibí boso.’ ‘I lo mi ser un tata pa boso, i boso lo ta yu homber i yu muher pa mi,’ Jehova e Todopoderoso ta bisa.”—2 Corintionan 6:16-18.