Bo Ta Corda?

Bo a haña cu e edicionnan recien di E Toren di Vigilancia tabata di balor práctico pa bo? Anto pakico no test bo memoria cu e siguiente preguntanan:

◻ Cua dos preguntanan a yuda hopi cristian cu mester a tuma decision tocante trabou, yega na un decision personal?

E promé pregunta clave ta: Bijbel ta condená e trabou seglar ei riba su mes? E di dos pregunta ta: Haciendo e trabou aki lo haci bo cómplice di un práctica cu Bijbel ta condená?—15/4, página 28.

◻ Den ki sentido ‘e creacion humano a ser sometí na banidad’? (Romanonan 8:20)

Nos a ser “sometí na banidad” pa motibu dje accionnan di nos promé mayornan, Adam cu Eva. No tabata “dor di [nos] mes boluntad” of como resultado di decision personal cu esaki a sosodé. Nos a hered’é. Aunke awor nos promé mayornan por a pasa solamente imperfeccion, picá i morto, misericordiosamente, Jehova a permití nan haña yu. Morto a plama na tur hende, pues, den e sentido ei Dios ‘a someté e creacion na banidad.’—1/5, página 5.

◻ Pakico ta lógico pa bisa cu “e cos repugnante” lo para den futuro “den un lugá santu”? (Mateo 24:15)

Den e patronchi antiguo, ‘e cos repugnante pará den un lugá santu’ tabata conectá cu e atake romano bou di general Gallo na 66 E.C. E paralelo actual p’e atake ei—esta, e cuminsamentu dje “tribulacion grandi”—ta den futuro ainda. (Mateo 24:21) Pues “e cos repugnante cu ta causa desolacion” ainda tin cu para den un lugá santu.—1/5, página 16, 17.

◻ Con un mama i tata cu ta traha lo por saca tempu pa nan yunan?

Un mama cu ta sintié agotá despues di un dia di trabou, lo por pidi su yunan yud’é prepará cuminda. E tata cu un lista largu di cos di haci den fin di siman, lo por haci algun dje keasernan aki huntu cu su yunan.—15/5, página 6.

◻ Kico esnan cu ta ‘cana den Jehova su caminda’ tin cu haci? (Jeremías 7:23)

Cana den Jehova su caminda ta exigí lealtad, esta, un determinacion pa sirbi e so. E ta exigí confiansa, esta, fe completo cu Jehova su promesanan ta confiabel i cu nan lo bira realidad. Cana den Jehova su caminda ta exigí obedencia, esta, sigui su leynan sin desviá i apoyá su normanan haltu. (Salmo 11:7)—15/5, página 14.

◻ Cua cuater responsabilidad importante “donnan den hende” por cumpli cuné? (Efesionan 4:8)

Nan por reahustá nos tiernamente, edificá nos cu amor, contribuí na nos unidad den congregacion i protehá nos cu curashi. (Efesionan 4:12-14)—1/6, página 14.

◻ Kico nos por siña for di Pablo su asociacion cu rond di shen individuo cu e buki di Echonan i su cartanan ta mencioná?

Semper nos mester traha huntu cu Dios su organisacion, cu nos congregacion local i cu nos compañeronan creyente. Nos tin mester di nan yudansa, apoyo i consuelo den tempu bon i malu.—1/6, página 31.

◻ Ki tres liña di razonamentu bo por usa pa yuda otronan pensa tocante e Creador?

E precision reflehá den e inmenso universo, e orígen di bida riba tera i e celebro humano innegablemente único, cu su diferente capacidadnan.—15/6, página 18.

◻ Pakico ta asina importante pa comprendé e nificacion dje nomber personal dje Creador?

E nomber di Dios ta nificá “E Ta Causa pa Bira” i ta enfatisá cu e ta establecé un propósito i ta actua tambe. Dor di conocé su nomber i us’é, nos por comprendé mihó cu e ta cumpli cu su promesanan i ta realisá su propósito activamente.—15/6, página 21.

◻ Con por enbolbé muchanan den un studio bíblico di famia?

Caminda ta posibel, haci areglo pa cada yu tin su mes Bijbel i publicacion di studio. Por pidi un yu chikitu splica plachinan cu ta aparecé den e material di studio, i por asigná un yu un tiki mas grandi pa lesa un texto. Por asigná unu mas grandi pa mencioná oportunidadnan caminda por haci aplicacion práctico dje material di studio.—1/7, página 15.

◻ Ki metanan algun famia lo por incluí den nan preparacion pa reunionnan di congregacion?

(1) Cada miembro di famia ta cla pa comentá n’e reunionnan; (2) cada un ta traha riba duna comentario cu su mes palabra; (3) incluí textonan den comentario i (4) analisá e material cu e meta pa haci aplicacion personal.—1/7, página 20.

◻ Kico ta un clave pa un bon matrimonio?

Pa habri e porta di un bon matrimonio i experenciá e precioso gosonan cu e ta contené, comunicacion sano ta esencial. Esaki ta encerá compartí sintimentu i ideanan. I comunicacion sano tin di haci cu cosnan cu ta edificante, refrescante, birtuoso, digno di alabansa i consolador. (Efesionan 4:29-32; Filipensenan 4:8)—15/7, página 21.

◻ Kico ta ‘Jehova su caminda’? (Salmo 25:8, 9, 12)

Esei ta e caminda di amor. E ta basá riba hacimentu di loke ta corecto di acuerdo cu e normanan di Dios. Bijbel ta yama e amor basá riba principio aki “un caminda surpasante.” (1 Corintionan 12:31)—1/8, página 12.