Bo Ta Corda?

Bo a apreciá di por a lesa e edicionnan recien di E Toren di Vigilancia? Wel, wak si bo por contestá e siguiente preguntanan:

• Di con nos por ta sigur cu e cumplimentu dje profecia di “shelu nobo i un tera nobo” na Isaías 65:17-19 ta encerá mas cu e regreso dje hudiunan for di cautiverio?

Pasobra ora apostel Pedro i Juan a skirbi den promé siglo E.C., nan a señalá na un futuro cumplimentu cu ta encerá bendicionnan cu tin cu bini ainda. (2 Pedro 3:13; Revelacion 21:1-4)—15/4, página 10-12.

• E mitonan griego di antigwedad tocante semi-diosnan violento, lo por ta basá riba kico?

Kisas nan ta relatonan den un forma floreá i trocí di e echo cu promé cu Diluvio, algun angel a tuma curpa humano i a hiba un bida violento i inmoral riba tera. (Génesis 6:1, 2)—15/4, página 27.

• Cua ta algun peliger cu un cristian maduro lo vigilá contra dje na casamentu?

Ta importante pa evitá diberticion desenfrená i cu hopi bochincha, cu lo por desaroyá si ta sirbi alcohol pa loco, i tin bailamentu desenfrená i música duru. Si no a bisa bon cla cu un recepsi ta habrí pa tur hende, esnan cu no a haña invitacion no mester asistí. E bruidegom mester haci sigur cu lo tin cristiannan responsabel presente te cu e celebracion terminá na un ora razonabel.—1/5, página 19-22.

• Kico Salmo 128:3 kier men ora e ta bisa cu yu hombernan ta “manera stèknan di palu di olijfi” rond di mesa di un homber?

Hopi bes stèknan nobo ta sali na pia dje stam di un palu di olijfi. Ora cu e stam principal di un palu bieu no ta duna hopi fruta mas, stèknan nobo lo bira stam vigoroso rond di dje. Asina tambe, mayornan por alegrá di tin yunan cu ta duna fruta sirbiendo Jehova lado a lado cu nan.—15/5, página 27.

• Kico ta algun beneficio cu yunan por saca for di un ambiente familiar saludabel?

E ta pone un fundeshi pa nan tin un punto di bista saludabel di autoridad, aprecio pa balornan apropiado i bon relacion cu otro hende. Tambe un ambiente asina por yuda nan desaroyá un amistad cu Dios.—1/6, página 18.

• Kico nan a haci den un pais oriental pa apoyá e idea cu tur cristian ta ruman?

A urgi tur e congregacionnan pa no dirigí nan mes na cierto personanan cu términonan di onor. Mas bien, nan mester dirigí nan mes na tur hende igual, como ruman.—15/6, página 21, 22.

• Testigonan di Jehova ta aceptá remedi derivá for di sanger?

Nos ta kere cu e mandamentu bíblico pa ‘abstené di sanger’ ta conta pa transfusion di sanger completo of di su componentenan principal (plasma, cel corá, cel blancu i plaketa). (Echonan 15:28, 29) Pa loke ta fraccionnan derivá for dje componentenan principal, cada cristian ta dicidí esei personalmente, teniendo na mente loke Bijbel ta bisa i su relacion cu Dios.—15/6, página 29-31.

• Ta realmente posibel pa haña pas interno awe?

Sí. Mediante Bijbel, Jesucristo ta guiando hende n’e caminda di adoracion puru i n’e pas describí na Isaías 32:18. Ademas, esnan cu adkerí e pas ei tin e prospecto di disfrutá di pas permanente riba tera na cumplimentu di Salmo 37:11 i 29.—1/7, página 7.

• Ki papel George Young a hunga den historia teocrático moderno?

Na principio di 1917, el a duna prueba di ta un hibadó dje lus dje bon nobo di Reino pa hopi pais. Su ministerio a hib’é rond Cánada, n’e islanan den Caribe, Brazil i otro paisnan di Sur América, Centroamérica, Spaña, Portugal, na loke e tempu ei tabata Union Soviético i na Merca.—1/7, página 22-7.

• Kico 1 Corintionan 15:29 kier men ora e ta papia di algun “cu ta ser bautisá p’e propósito di ser hende morto”?

E punto ta cu ora cristiannan ser ungí cu spiritu santu, nan ta dedicá nan mes na un curso di bida cu ta hiba na nan morto, siguí pa resureccion na bida celestial.—15/7, página 17.

• Kico apostel Pablo tabata haciendo durante e periodo cu a ser describí como su añanan silencioso?

Kisas el a yuda establecé i fortificá congregacionnan na Siria i Cilicia. Hopi dje dificultadnan cu 2 Corintionan 11:23-27 ta mencioná, mester a tuma lugá durante e periodo aki, mustrando asina cu e tabatin un ministerio activo.—15/7, página 26, 27.

• Kico por yuda nos ser razonabel den nos expectativanan?

Corda cu Jehova ta comprensivo. Haci oracion na dje por yuda nos balansá nos manera di pensa, i ta mustra cu nos ta modesto. Un otro yudansa ta purba haña un punto di bista frescu dor di papia cu un amigu maduro.—1/8, página 29, 30.