Pregunta di Lector

Con cristian berdadero mester mira e práctica comun di hende cu ta duna otronan ehemplarnan comercial di programanan di software pa computer?

Algun hende kisas eróneamente ta purba hustificá e práctica aki dor di referí na loke Jesus a bisa: “Boso a ricibí grátis, duna grátis.” Claro cu Jesus no tabata papia di regalá ehemplarnan grátis di literatura of di programanan di computer (software) cu tin derecho di autor, materialnan cua nan uso ta regulá pa ley. Loke Jesus tabatin na mente ta dunamentu como parti di e ministerio. Jesus a bisa e apostelnan cu tabata bayendo pa e diferente stad i pueblonan, cu nan mester a predicá e Reino, cura hende enfermo i saca demoño. En bes di cobra pa esaki, e apostelnan mester a “duna grátis.”—Mateo 10:7, 8.

Cu e aumento drástico den e cantidad di computernan personal i di negoshi, hopi hende tin mester di software. Generalmente mester cumpra esaki. Ta cierto cu algun hende ta traha programanan cu nan ta haci disponibel sin cobra i ta indicá cu por traha copia di nan i por duna esakinan na otro hende. Pero mayoria software di computer ta ser bendí comercialmente. Sea cu e ta pa nan uso personal na cas of pa usa den nan negoshi, usadónan di software ta supose di cumpr’é, i paga p’e. Si un hende a tuma of a copia un pakete di software sin paga, esei lo ta mes ilegal cu traha fotocopia di buki na gran cantidad, asta ora bo regalá hende esakinan.

Mayoria programa di computer (incluso weganan) ta ser protehá dor di un licensia, i ta rekerí dje doño/usuario pa e cumpli cu e condicion i limitacionnan specífico dje licensia. Hopi dje licensianan ei ta indicá cu ta un persona so por instalá i usa e programa, generalmente por instalá esaki riba un computer so, sea riba un computer na cas of un di negoshi of di scol. Tin licensia ta bisa cu e usuario por warda un copia di e programa pa su mes, pero e no mag di traha copia pa otro hende. Si e doño kier regalá henter e programa na un hende (incluso e licensia i documentacion), e por haci esei. Sin embargo, esei kier men cu e ta perde e derecho cu e tabatin di us’é. Cada licensia ta diferente, pues un persona cu ta cumpra of ta haña un oferta di un programa mester investigá kico e licensia dje programa ei ta stipulá.

Hopi pais ta forma parti di acuerdonan di derecho di autor cu ta protehá “propiedad intelectual,” manera por ehempel programanan di computer, i nan ta purba implementá ley di derecho di autor. Por ehempel, The New York Times di 14 di januari 2000, a informá cu “oficialnan di polis aleman i danes a arestá miembronan di loke nan a describí como un dje gèngnan di pirateria di software di mas grandi” cu tabata duplicá i distribuí programa i weganan di computer, asta bendiendo algun di nan via Internet.

Kico ta e posicion di e congregacion cristian den e asuntu aki? Wel, Jesus a bisa: “Paga bek e cosnan di César na César, pero e cosnan di Dios na Dios.” (Marco 12:17) Esei kier men cu cristiannan tin cu obedecé leynan di e pais cu no ta na conflicto cu Dios su ley. En cuanto gobiernunan, apostel Pablo a skirbi: “Laga tur alma sea sumiso na autoridadnan superior . . . Esun cu oponé autoridad a pone su mes contra e areglo di Dios; esnan cu a tuma un posicion contra dje lo ricibí huicio pa nan mes.”—Romanonan 13:1, 2.

Ancianonan den e congregacion cristian no ta responsabel pa controlá computer di otronan, como si fuera nan ta autorisá pa interpretá i implementá ley di derecho di autor. Pero nan ta kere i ta siña hende cu cristiannan mester evitá di tuma loke no ta pertenecé na nan i mester percurá pa cumpli cu ley. Esaki ta protehá cristiannan di haña castigu como kibradónan di ley, i ta yuda nan pa por tin un bon concenshi dilanti Dios. Pablo a skirbi: “P’esei, tin motibu obligatorio pa boso ta sumiso, no solamente pa motibu dje rabia ei, sino tambe pa motibu di boso concenshi.” (Romanonan 13:5) Di igual manera, Pablo a expresá e deseo di cristiannan berdadero cu e palabranan: “Nos ta confia cu nos tin un concenshi onrado, ya cu nos ta deseá na comportá nos mes onradamente den tur cos.”—Hebreonan 13:18.

[Kuadro na página 29]

Algun negoshi i scol ta cumpra licensia pa múltiple-usuario cu ta stipulá un cantidad máximo di hende cu por usa e programa. Na 1995, congregacionnan di Testigonan di Jehova a trata un artículo cu a incluí e conseho aki:

“Mayoria compania cu ta prepará i bende programanan di computer ta pone derecho di autor riba esakinan, i nan ta duna un licensia describiendo con e programanan por ser usá legalmente. E licensia generalmente ta bisa cu e doño no por duna otro hende copianan dje programa; en realidad, ley internacional di derecho di autor ta considerá esei ilegal pa haci. . . . Algun empresa grandi ta bende computer cu tin programanan preinstalá i cu licensia. Sin embargo, algun negoshi di computer no ta duna e licensia pasobra e programanan cu nan ta preinstalá ta copianan ilegal, nificando cu e cumpradó ta violá ley dor di usa e programanan. Relacioná cu esaki, cristiannan mester evitá di pone of saca for di banconan electrónico di anuncio material cu tin derecho di autor (manera e publicacionnan dje Sociedad) i cu ta ser copiá sin un permit legal dje doñonan.”