Un Tempu Nos Tabata Wolf—Awor Nos Ta Carné!

Tempu ami cu Sakina tabata chikitu, nos tabata bisiña. Sakina tabata un mucha muher grandi diki, pero ami tabata chikitu flacu. Nos tabata pleita cada bes, pero un dia nos tabatin un pelea serio. For di e dia ei nos no a papia cu otro ni cumindá otro mas. Cu tempu nos tur dos a muda, i a perde otro for di bista.

Na 1994 mi a cuminsá studia Bijbel cu Testigonan di Jehova, i poco-poco mi personalidad a cambia. Cuater aña despues, na nos dia special di asamblea na Bujumbura, Burundi, mi a keda babucá di topa Sakina. Mi a keda contentu di mir’é presente, pero nos a cumindá otro un tiki secu. Despues durante e dia ei, casi mi no por a kere mi bista ora mi a mira Sakina entre e candidatonan pa bautismo! E tambe a cambia drásticamente. E no tabata e hende bringadó mas cu mi a yega di pleita cuné asina hopi bes. Tabata maraviyoso pa mir’é duna evidencia público di su dedicacion na Dios dor di someté na bautismo bou di awa!

Ora el a sali for di awa mi a bai mesora cerca dje pa bras’é, anto mi a bis’é den su orea: “Bo ta corda con nos tabata pleita?” E di: “Sí, mi ta corda, pero esei ta pasado. Mi ta un hende nobo awor.”

Nos tur dos ta contentu cu nos a haña e berdad di Bijbel cu ta uni hende, i cu nos a cambia nos personalidad di wolf pa un personalidad di carné cu ta pertenecé na e Gran Wardadó, Jehova Dios. E berdad di Bijbel realmente ta cambia bida di hende.