Konmemorashon di Testigunan di Yehova Ku A Ser Ehekutá

DIA 7 di mart 2002, nan a desvelá un plaka konmemorativo den e pueblo Körmend, n’e parti wèst di Hungria. E plaka aki ta konmemorá e morto di tres Testigu di Yehova ku e nazinan a mata na aña 1945.

A pega e plaka na muraya di loke awe ta sede di departamentu di bombero na Hunyadi Road. Ta aki e ehekushonnan públiko a tuma lugá. E plaka a ser dediká na memoria di ‘kristiannan ku na mart 1945 a ser ehekutá pa motibu ku nan a nenga di bai kontra nan konsenshi. Nan ta e Testigunan di Yehova, Antal Hőnisch (1911-1945), Bertalan Szabó (1921-1945), János Zsondor (1923-1945). Aña 2002.’

E ehekushonnan a tuma lugá djis dos luna promé ku Segundo Guera Mundial a terminá. Dikon nan a mata e kristiannan aki? E korant húngaro Vas Népe ta splika: “Despues ku Hitler a haña poder na Alemania, no ta e hudiunan so tabata víktima di persekushon i tortura, kampo di konsentrashon i morto ora nan a nenga di bai kontra nan konvikshon religioso, sino e fiel Testigunan di Yehova tambe. . . . Na mart 1945, tabata reina un teror kompleto den e parti wèst di Hungria. . . . Parsialmente esaki tabata debí na e deportashon i asesinato di Testigunan di Yehova.”

E programa relashoná ku desvelo di e plaka a konsistí di dos parti. E promé parti a tuma lugá den e teatro di Palasio Batthyány, kaminda komo oradó tabatin entre otro, Profèser Szabolcs Szita, hefe di e Sentro di Dokumentashon di Holokousto na Budapest, László Donáth, miembro dje Komité di Parlamento pa Derechonan Humano, Gruponan Minoritario i Asuntunan Religioso, i Kálmán Komjáthy, un testigu ku a presensiá e ehekushonnan i ku awor ta historiadó dje pueblo. E mas ku 500 personanan ku tabata presente e krusa bai na e otro banda di e stat pa nan presensiá e di dos parti di e programa, durante kua e alkalde di Körmend, József Honfi, a desvelá e plaka.

Den su karta di despedida, Ján Žondor (János Zsondor) a urgi su rumannan kristian pa nan no sinti nan tristu. El a skirbi: “Ainda mi ta kòrda e palabranan di Huan na Revelashon 2:10, ku ta bisa: ‘Sea fiel te na morto.’ . . . Bisa mi famia, amigu- i rumannan pa nan no sinti nan tristu, pasobra mi ta muri pa e bèrdat i no komo un kriminal.”

[Plachi na página 32]

Bertalan Szabó

[Plachi na página 32]

Antal Hőnisch

[Plachi na página 32]

Ján Žondor