Garantia i Satisfakshon di Trabou Difísil pa Haña

SEGUN e Deklarashon Universal di Derechonan Humano emití pa Nashonnan Uní, tur hende tin “derecho di traha.” Sin embargo, no ta tur biaha e derecho aki ta garantisá. Un trabou ku bo ta sigur di dje ta dependé di hopi faktor ku ta varia di e kondishon general di ekonomia lokal te ku e kondishon di merkado mundial. Apesar di esei, ora hende pèrdè trabou òf ta kore riesgo di pèrdè trabou, hopi bes nan ta rebeldiá, tene manifestashon i wèlga. Kasi tur pais ta haña nan ku e situashon aki. Segun un eskritor, asta e palabra “trabou ta—manera semper e tabata—un palabra ku ta lanta emoshonnan fuerte.”

Tin hopi motibu pakiko trabou ta importante pa nos. Ademas di duna nos entrada, e ta kontribuí na nos bienestar mental i emoshonal. Trabou ta satisfasé e deseo ku hende tin di ser un miembro produktivo den komunidat i di tin un propósito den bida. Tambe e ta duna nos un grado di rèspèt propio. P’esei bo por haña ku maske un persona por tin bòsh’i plaka ku e por perkurá pa su nesesidatnan òf ku e por baha ku penshon, tòg e ta preferá di sigui traha. Sí, trabou ta asina importante ku ora no tin sufisiente trabou pa tur hende, esaki por krea problemanan sosial grandi.

Di otro banda, bo ta haña hende ku tin trabou pero ku ta haña nan ku asina hopi preshon na trabou ku nan ta pèrdè tur satisfakshon den esaki. Por ehèmpel, dor ku tin hopi kompetensia riba merkado, un kantidat kresiente di kompania ta redusí nan personal pa asina baha gastu. Podisé esaki ta bai eksigí mas di e trahadónan ku a keda, pasobra awor nan tin mas trabou pa hasi.

Teknologia moderno ku supuestamente mester a hasi bida mas fásil i trabou mas efisiente, kisas bon mirá, a kousa mas tenshon na trabou. Por ehèmpel, kòmpiuter, mashin di faks i Internet ta duna hende e chèns di bai kas ku trabou despues ku nan kaba di traha. Dor di esei kasi bo no ta mira e diferensia mas entre kas i trabou. Un trahadó a bisa ku e tabata sinti ku su pager di trabou i telefòn selular tabata manera un kadena invisibel ku tabata mar’é na su doño di trabou.

Hopi hende di edat tin miedu ku den e ekonomia i ambiente di trabou ku ta kambiando rápidamente aki, otronan lo por kuminsá mira nan komo hende inútil promé ku nan tempu. Relashoná ku esaki, eks-Representante di Derechonan Humano, Chris Sidoti, a deklará: “Ta eksistí e pensamentu general ku si bo no tin ménos ku 40 aña di edat, bo no por traha ku kòmpiuter ni ku teknologia moderno.” P’esei awendia bo ta haña ku hopi bon trahadó ku ántes tabata ser konsiderá komo personanan produktivo, ta ser mirá komo muchu bieu pa yuda ku algu. Esei ta hopi lamentabel!

Nada straño ku normanan i étika di trabou i lealtat na kompania a haña un sla duru den último añanan. Segun e revista franses, Libération: “Si kompanianan ta benta nan hendenan un banda asina ku bolsa di balor djis hik, lealtat na kompania ta pasa pa historia. Klaru ku bo tin ku traha duru, pero bo tin ku hasié pa bo mes i no pa kompania.”

Apesar di e problemanan kresiente aki, trabou ta sigui ser un nesesidat básiko di hende. En bista ku nos tempu ta kambiando rápidamente, kon nos por kultivá un punto di bista balansá tokante trabou, i na mes tempu sinti nos sigur di nos trabou i satisfecho kuné?

[Plachi na página 3]

Teknologia moderno kisas ta kousa mas tenshon na trabou