“Hala Serka Dios i E Lo Hala Serka Boso”

Ántes i Awor—El A Haña e Forsa pa Kambia

SANDRA, un señora na Mexico, a deskribí su mes komo e ‘zwarte schaap’ di su famia. Rechaso i falta di kariño a ruiná su hubentut. El a bisa: “Durante henter mi adolesensia mi tabata sinti un bashí i mi no tabata sa pakiko mi ta na bida, ni ki sentido bida tin.”

Ora Sandra tabata bayendo skol sekundario, el a kuminsá bebe biña ku su tata tabatin na kas. Ku tempu e mes a kuminsá kumpra su alkohòl i el a bira alkohóliko. El a atmití: “Mi no tabata mira pakiko biba.” Desesperashon a pone Sandra kuminsá usa droga. E di: “E úniko kos ku a yuda mi lubidá mi problemanan tabata loke mi tabatin den mi tas: un bòter, algun píldora òf poko mariwana.”

Despues ku Sandra a kaba skol di medisina, el a kai mas profundo den alkoholismo. Asta el a purba kometé suisidio. Pero el a skapa.

Sandra a akudí enbano na diferente religion en buska di yudansa spiritual i sosten emoshonal. Dor ku el a pèrdè speransa i a kuminsá desesperá, bes tras bes e tabata sklama na Dios: “Unda bo ta? Dikon bo no ta yuda mi?” Ora ku el a pèrdè tur dignidat, un Testigu di Yehova a papia kuné. Esaki a hiba na un studio di Beibel. Sandra a keda masha emoshoná ora el a siña ku Yehova “ta serka di e hende di kurason kibrá.”—Salmo 34:18.

E persona ku a studia Beibel ku Sandra a yud’é komprondé ku Yehova Dios sa ku nos ta vulnerabel debí n’e piká i imperfekshon ku nos a heredá di Adam. Sandra a realisá ku Dios ta komprondé ku nos no por kumpli perfektamente ku su normanan hustu. (Salmo 51:5; Romanonan 3:23; 5:12, 18) El a keda masha kontentu ora el a siña ku Yehova no ta enfoká solamente riba nos debilidatnan, i ku e no ta spera mas di nos ku loke nos por hasi. E salmista a puntra: “Si Abo, SEÑOR, tuma inikidatnan na kuenta, o Señor, ken lo por a keda para?”—Salmo 130:3.

Un bèrdat importante di Beibel ku a emoshoná Sandra ta esun di e sakrifisio di reskate di Hesukristu. Mediante e reskate aki, den su gran miserikòrdia Yehova ta otorgá un posishon hustu na hende obediente apesar di nan imperfekshonnan. (1 Juan 2:2; 4:9, 10) Sí, nos por haña “pordon di nos pikánan” i asina ser yudá pa vense kualkier sintimentu di ku nos no ta bal nada.—Efesionan 1:7.

Sandra a siña un lès balioso for di e ehèmpel di apòstel Pablo. Pablo a apresiá mashá ku Dios tabatin e bondat di pordon’é pa su erornan di pasado i dun’é apoyo den su lucha fuerte pa vense su debilidatnan ku tabata lanta kabes konstantemente. (Romanonan 7:15-25; 1 Korintionan 15:9, 10) Pablo a drecha su bida, el a ‘gòlpia su kurpa i hasié esklabo,’ p’e por a sigui riba e kaminda ku Dios a aprobá. (1 Korintionan 9:27) E no a laga su inklinashonnan pekaminoso hasié katibu òf domin’é.

Sandra tambe tabatin su debilidatnan, pero el a sigui lucha kontra nan. El a hasi orashon sinsero pidi Yehova pordon’é i tambe yud’é vense su debilidatnan. (Salmo 55:22; Santiago 4:8) Dor ku Sandra a sinti ku Dios ta interesá den dje personalmente, e por a kambia su bida. El a bisa: “Mi tin e goso di por traha komo un predikadó di tempu kompletu pa siña otro hende loke Beibel ta bisa.” Sandra tabatin e privilegio di yuda su ruman mayó i tambe esun mas chikitu siña konosé Yehova. Segun ku e ta sigui “hasi bon,” e ta hasi uso tambe di su konosementu médiko trahando komo boluntario den e departamentu di promé ousilio na kongresonan di Testigunan di Yehova.—Galationan 6:10.

Kiko di Sandra su adikshonnan? Ku konfiansa el a bisa: “Mi tin un mente kla. Mi no ta bebe mas, ni huma ni usa droga. Mi no tin mester di nan. Mi a haña loke mi tabata buska.”

[Komentario na página 9]

“Mi a haña loke mi tabata buska”

[Kuadro na página 9]

Prinsipionan di Beibel den Akshon

E siguiente prinsipionan di Beibel a yuda hopi hende libra nan mes di adikshonnan degradante:

“Laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.” (2 Korintionan 7:1) Dios ta bendishoná hende ku a purifiká nan mes di sushedat, i ta evitá práktikanan impuru.

“E temor di SEÑOR ta pa odia maldat.” (Proverbionan 8:13) Temor i rèspèt pa Dios ta yuda un persona libra su mes for di mal hábito, inkluso uso di droga. Ademas di agradá Yehova, e persona ku a kambia ta keda protehá di malesanan teribel.

Sea “sumiso na gobernantenan i na outoridatnan.” (Tito 3:1) Den hopi pais posishon òf uso di droga ta un violashon di lei. Kristiannan berdadero no ta poseé ni usa droga.