Informe di Proklamadónan di Reino

‘Bin i Yuda Nos’

NA YÜLI 2000, a hasi un yamada na Testigunan di Alemania, Oustria i Suisa ku ta papia aleman, pa muda pa Bolivia. Dikon? Pasobra den un rayo di 300 kilometer di Santa Cruz, Bolivia, tabatin kolonianan aislá di kunukero di abla aleman di e grupo religioso menonita i den nan tabatin hende ku a mustra profundo interes den Beibel.

Rònt di 140 Testigu a reakshoná riba e invitashon. Algun di nan a bai pa un par di siman, i otronan pa un aña òf mas. Asina nan a desplegá un aktitut similar na esun di e misioneronan di promé siglo ku a hasi kaso di e yamada: “Bin Masedonia i yuda nos.”—Echonan 16:9, 10.

Kon e predikashon ta den e teritorio ei? Un ansiano di e kongregashon lokal a splika: “Pa bai un di e 43 kolonianan menonita por tuma te ku ocho ora riba kaminda di tera den un vehíkulo four-wheel-drive. Pa bishitá e komunidatnan mas leu ta tuma hopi bes kuater dia i nos tin ku drumi algun anochi den tènt. Pero definitivamente e ta bale la pena, pasobra kasi ningun di e hendenan aki nunka promé a tende e bon nobo.”

Na prinsipio, hopi di e menonitanan no tabata gusta e bishitanan. Pero dor ku e rumannan a sigui hasi esfuerso, nan a bin realisá ta kiko e Testigunan tin di ofresé. Por ehèmpel, un kunukero a bisa ku e tin un aña ta lesa e revista Spièrta! Anto el a agregá: “Mi sa ku hopi hende akinan no ta di akuerdo ku loke boso ta bisa, pero ami ta kere ku e ta e bèrdat.” Den un otro kolonia, un hòmber a bisa: “Algun di mi bisiñanan ta bisa ku boso ta profeta falsu, otronan ta bisa ku boso tin e bèrdat. Mi mes ke haña sa kiko ta kiko.”

Awor tin un kongregashon aleman na Bolivia, ku 35 publikadó, di kua 14 ta predikadó di tempu kompletu. Te ku awe, 14 eks-menonita a bira proklamadó di Reino, i tin 9 mas ta asistí regularmente na e reunionnan. Un hòmber di edat ku a batisá resientemente a bisa: “Nos ta mira Yehova su guia klaramente. El a manda rumannan ku eksperensia, i ku ta papia aleman, pa yuda nos. Nos ta masha gradisidu mes.” E hòmber su yu muhé di 17 aña, ku tambe ta batisá, a agregá: “E entusiasmo di e rumannan hóben ku a bini aki ta kontagioso. Mayoria di nan ta pionero, i ta dediká nan tempu i nan plaka na yuda otro hende. Esei ta duna mi gana di hasi meskos.”

En bèrdat, esnan ku a hasi esfuerso pa ‘bin yuda’ ta kosechando gran goso i satisfakshon.