Pregunta di Lektor

Kiko e areglo di e aña di Hubileo menshoná den Levítiko kapítulo 25 a prefigurá?

E Lei di Moisés a stipulá ku “e di shete aña e tera mester tene un sabat di sosiegu.” Relashoná ku e aña ei, e israelitanan a haña e siguiente mandato: “Bo no mag sembra bo kunuku ni snui bo plantashon di wendrùif. No rekohé loke nase di su mes despues di kosecha, ni kosechá bo wendrùifnan di mata di wendrùif ku bo no a snui; e tera mester haña un aña di sosiegu.” (Levítiko 25:4, 5) Pues, kada shete aña mester tabata un aña di sabat p’e tera. I kada 50 aña, esta, e aña despues di shete siklo di shete aña (49 aña na tur), mester tabata un Hubileo. Kiko mester a sosodé den e aña ei?

Yehova a bisa Israel mediante Moisés: “Boso mester konsagrá e di sinkuenta aña i proklamá libertat den e tera pa tur su habitantenan. E mester ta un Hubileo pa boso, i kada un di boso mester bolbe na su mes propiedat, i kada un di boso mester bolbe serka su famia. E di sinkuenta aña mester ta un Hubileo pa boso; no sembra, ni kosechá loke nase di su mes despues di kosecha, ni rekohé fruta di su matanan di wendrùif ku no ta gesnui.” (Levítiko 25:10, 11) Un Hubileo a nifiká dos aña di sabat tras di otro p’e tera. Pero pa e habitantenan e Hubileo a nifiká libertat. Tur hudiu ku a ser bendé komo esklabo mester a haña nan libertat. E propiedat ku un persona a heredá di su antepasadonan i ku lo e por a hañ’é fòrsá ta bende mester a bini bèk pa su famia. Hubileo mester tabata un aña di restorashon i liberashon pa Israel di antigwedat. Kiko e ta prefigurá pa kristiannan?

E rebelion di e promé hòmber, Adam, a pone humanidat bira esklabo di piká. Pa medio di e sakrifisio di reskate di Hesukristu, Dios a hasi posibel pa hende wòrdu librá for di e gara di piká.a (Mateo 20:28; Juan 3:16; 1 Juan 2:1, 2) Na ki tempu kristiannan ta wòrdu librá di e lei di piká? Dirigiendo su mes na kristiannan ungí, apòstel Pablo a bisa: “E lei di e spiritu di bida den Kristu Hesus a hasi [“boso,” NW] liber di e lei di piká i di morto.” (Romanonan 8:2) Hende ku tin e speransa di biba den shelu ta risibí e libertat aki ora nan ser ungí ku spiritu santu. Ounke ainda nan tin un kurpa di karni imperfekto, Dios ta deklará nan hustu i ta adoptá nan komo su yunan spiritual. (Romanonan 3:24; 8:16, 17) Pa e ungínan, komo grupo, e Hubileo kristian a kuminsá na Pentekòste di aña 33 di nos era.

Kiko di e “otro karnénan” ku tin e speransa di biba pa semper riba tera? (Juan 10:16) P’e otro karnénan, e Reino di Mil Aña di Kristu lo ta un tempu di restorashon i liberashon. Durante e Hubileo di Mil Aña aki, Hesus lo apliká e benefisionan di su sakrifisio di reskate na humanidat kreyente i lo eliminá e efektonan di piká. (Revelashon 21:3, 4) Na fin di e Mil Aña di e Reinado di Kristu, humanidat lo alkansá perfekshon i lo ta kompletamente liber di piká heredá i morto. (Romanonan 8:21) Ora yega asina leu, e Hubileo kristian lo kaba.

[Nota]

[Plachi na página 26]

E Hubileo di Mil Aña—un tempu di restorashon i liberashon p’e “otro karnénan”