Pregunta di Lektor

Ta bèrdat ku Hosé, un fiel sirbidó di Yehova, a usa un kopa spesial di plata pa buska señal, manera Génesis 44:5 ta parse di indiká?

No tin motibu pa kere ku Hosé a praktiká ningun forma di adivinashon, òf wakmentu di destino.

Beibel ta mustra ku Hosé a komprondé bon kla kiko tin tras di e uso di arte mágiko pa haña sa futuro. Anteriormente, ora nan a pidié interpretá e soñonan di fárao, bes tras bes Hosé a insistí ku ta Dios so por ‘duna di konosé’ kiko tin den futuro. Komo resultado di esei, Fárao mes a keda konvensí ku ta e Dios ku Hosé a adorá—e berdadero Dios i no podernan sobrenatural—a yuda Hosé sa detayenan tokante futuro. (Génesis 41:16, 25, 28, 32, 39) Den e Lei ku Yehova a duna Moisés despues, el a prohibí hende di rekurí na magia òf adivinashon, konfirmando asina ku ta E so ta predisí futuro.—Deuteronomio 18:10-12.

Pakiko anto Hosé a duna e impreshon pa medio di su kriá ku e tabata usa un kopa di plata pa “adiviná,” òf buska señal?a (Génesis 44:5) Nos tin ku konsiderá e sirkunstansianan bou di kua el a hasi e deklarashon aki.

Pa motibu di un gran skarsedat di kuminda, e rumannan di Hosé a biaha bai Egipto pa buska alimento. Añanan anterior, e mesun rumannan aki a bende Hosé komo esklabo. Awor, sin ku nan tabata sa, nan a pidi yudansa for di nan propio ruman, kende a bira e atministradó di kuminda di Egipto. Hosé no a revelá su mes na nan. En bes di esei, el a disidí di pone nan na prueba. Korektamente, Hosé kier a determiná kon sinsero nan repentimentu tabata. E kier a haña sa tambe si nan a stima i kuantu stimashon nan tabatin pa nan ruman Benjamin i nan tata, Jakòb, kende tabatin un kariño spesial pa Benjamin. P’e motibu ei, Hosé a usa un triki.—Génesis 41:55–44:3.

Hosé a manda un di su kriánan yena e sakunan di su rumannan ku kuminda, duna kada un nan plaka bèk dor di hinka esaki den boka di nan respektivo sakunan i pone Hosé su kopa di plata den boka di Benjamin su saku. Den tur esaki, Hosé a hunga e ròl di un atministradó di un pais pagano. El a adaptá su mes, su akshonnan i su estilo di papia na e personalidat di un atministradó asina, manera esei lo a aparentá den bista di su rumannan, ku no a sospechá nada.

Ora Hosé a konfrontá su rumannan, el a sigui hunga su ròl, puntrando nan: “Boso no sa ku un hòmber manera ami di bèrdat por praktiká adivinashon?” (Génesis 44:15) Pues, opviamente, e kopa tabata djis un parti di e triki. Meskos ku no por bisa ku ta hòrta Benjamin a hòrta e kopa, nos no por bisa tampoko ku Hosé tabata us’é pa buska señal.

[Nota]