Pregunta di Lektor

Pakiko e Lei di Moisés a konsiderá sierto prosesonan natural relashoná ku órganonan seksual komo kosnan ku ta hasi un hende “impuru”?

Dios a krea hende ku órgano seksual pa pareha kasá por sigui reprodusí i tambe haña plaser den nan matrimonio. (Génesis 1:28; Proverbionan 5:15-18) Sin embargo, den Levítiko kapítulo 12 i 15 nos ta haña leinan spesífiko relashoná ku impuresa kousá pa emishon di simia, menstruashon i hañamentu di yu. (Levítiko 12:1-6; 15:16-24) E leinan ei ku a ser duná na Israel di antigwedat a fomentá un estilo di bida saludabel, a sostené normanan moral haltu, i a enfatisá e echo ku sanger ta sagrado i ku mester a hasi ekspiashon pa piká.

E rekisitonan di e Lei di Moisés enkuanto prosesonan natural relashoná ku órganonan seksual a kontribuí, entre otro, na mihó kondishonnan di salú den e komunidat israelita. E buki The Bible and Modern Medicine ta deklará: “E lei ku a prohibí relashon seksual durante e dianan di menstruashon a resultá di ta un protekshon efektivo kontra sierto enfermedat seksual . . . i tambe e ta yuda evitá formashon i desaroyo di kanser na boka di matris.” E leinan ei a protehá e pueblo di Dios kontra malesanan ku lo tabata deskonosí pa nan òf asta imposibel pa nan detektá. Higiena seksual a oumentá e fertilidat di un nashon ku Dios a bendishoná ku un promesa di kresementu i prosperidat. (Génesis 15:5; 22:17) E leinan aki a protehá tambe e salú emoshonal di e pueblo di Dios. Dor di obedesé nan, esposo i esposa a siña kontrolá pashon seksual.

Sin embargo, e kuestion prinsipal den e tipo di impuresanan kousá pa prosesonan natural relashoná ku órganonan seksual tabata e fluho òf pèrdida di sanger. E leinan ku Yehova a duna e israelitanan relashoná ku sanger a graba den nan mente no solamente ku sanger ta sagrado, sino tambe ku sanger ta okupá un lugá spesial den e adorashon di Yehova, esta, den sakrifisio i ekspiashon pa piká.—Levítiko 17:11; Deuteronomio 12:23, 24, 27.

P’esei, e rekisitonan detayá di e Lei den e konteksto aki ta estrechamente ligá ku imperfekshon humano. E israelitanan tabata sa ku despues ku Adam ku Eva a peka, nan no por a haña yu perfekto. Tur nan desendientenan lo a sufri di e efektonan di piká heredá, ku ta imperfekshon i morto. (Romanonan 5:12) Pa motibu di esaki, mayornan por a prokreá solamente bida imperfekto i pekaminoso, ounke hende su órganonan di reprodukshon a ser diseñá originalmente pa prokreá bida perfekto mediante e areglo matrimonial.

Pues, e rekisitonan di purifikashon di e Lei lo a rekordá e israelitanan no solamente ku nan a nase komo pekadó sino tambe ku nan tabatin mester di un sakrifisio di reskate pa kubri piká i restorá perfekshon humano. Klaru ku e sakrifisionan di animal ku nan a ofresé no a logra esei. (Hebreonan 10:3, 4) E propósito di e Lei di Moisés tabata pa guia nan na Kristu i yuda nan komprondé ku ta únikamente pa medio dje sakrifisio di e bida humano perfekto di Hesus, berdadero pordon tabata posibel. I esaki a habri kaminda pa hende fiel por haña bida eterno.—Galationan 3:24; Hebreonan 9:13, 14.