Pregunta di Lektor

Ki responsabilidat e kongregashon tin si un kristian ku ta stür un outo haña su mes den un aksidente ku ta resultá den morto di otro hende?

Mester investigá si e ruman tin kulpa di sanger pasobra e kongregashon tin ku evitá di karga kulpa di sanger komo parti di e komunidat. (Deuteronomio 21:1-9; 22:8) Un shofùr ku kousa un aksidente fatal por ser hañá kulpabel di sanger si el a kometé un deskuido òf si deliberadamente el a violá un lei di siguridat òf di tráfiko di Cesar. (Marko 12:14) Pero tin mas faktor ku mester tene kuenta kuné.

Un matadó ku a hui bai na un di e statnan di refugio di Israel mester a ser husgá dilanti un tribunal. Si a sali na kla ku e no a mata intenshonalmente, lo a permitié keda den e stat, protehá for di e vengadó di sanger. (Numbernan 35:6-25) P’esei si un kristian kousa morto di un hende den un aksidente, e ansianonan mester investigá e asuntu pa determiná si tin un grado di kulpa di sanger. No ta e punto di bista di gobièrnu ni un desishon di korte ta determiná ki akshon e kongregashon lo tuma.

Por ehèmpel, korte por deklará e persona kulpabel di un òf otro violashon tékniko di regla di tráfiko, pero e ansianonan ku ta investigá e asuntu kisas ta determiná ku no tin kulpa di sanger ya ku e shofùr tabatin masha poko òf ningun kontròl riba e sirkunstansianan ku a resultá den e aksidente fatal. Di otro banda, asta si korte para e kaso, e ansianonan kisas ta konkluí ku en realidat e persona ta kulpabel di sanger.

E desishon di e ansianonan ku ta investigá e kaso mester ta basá riba e Skritura i echonan bon kla establesí; por ehèmpel, e shofùr ta rekonosé su falta i/òf tin testimonio di dos òf tres testigu konfiabel. (Deuteronomio 17:6; Mateo 18:15, 16) Si a establesé kulpa di sanger, mester forma un komité hudisial. Si e komité ta determiná ku e persona kulpabel di sanger a repentí, lo e risibí reprendementu apropiá for di e Skritura i lo pèrdè privilegio den e kongregashon. Lo e no sirbi mas komo ansiano òf sirbidó ministerial. Tambe lo imponé otro restrikshonnan. Ademas, e tin ku duna kuenta na Dios pa su deskuido òf negligensia ku a resultá den e aksidente ku a kousa morto.—Galationan 6:5, 7.

Por ehèmpel, si tabatin mal tempu na momento ku e aksidente a tuma lugá, e shofùr mester a kore ku mas kuidou. Si e tabatin soño, e mester a para i sosegá te ora su soño a kita, òf e mester a laga un otro hende stür.

Suponé ku e shofùr tabata koriendo muchu duru. Si un kristian pasa e límite di velosidat, e no ta dunando “Cesar loke ta di Cesar.” E ta mustra tambe un falta di rèspèt pa e santidat di bida, pasobra e por kousa un aksidente ku konsekuensia fatal. (Mateo 22:21) I relashoná ku esaki tin un punto mas ku meresé nos atenshon. Ki sorto di ehèmpel un ansiano ta pone pa e tou si e no ta tene kuenta ku reglanan di tráfiko di Cesar òf ta desobedesé nan deliberadamente?—1 Pedro 5:3.

Un kristian no mester eksigí pa otronan yega na un sierto lugá na un ora ku klaramente nan lo no por alkansá sin surpasá e velosidat máksimo. Di otro banda, den mayoria kaso e punto ta pa sali mas trempan òf plania kosnan di tal manera ku bo por kore trankil. Si un kristian hasi esei, lo e no sinti su mes tentá pa kore mas duru ku ta permití, pero mas bien lo e por kumpli ku e leinan di tráfiko di “e outoridatnan ku ta goberná.” (Romanonan 13:1, 5) Esaki lo yuda e shofùr evitá di kometé aksidentenan fatal ku e posibilidat di karga kulpa di sanger. Esei lo permitié tambe pone un bon ehèmpel i mantené su konsenshi limpi.—1 Pedro 3:16.