3 Siña e Bèrdat Tokante Hesus

“Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.”​—Juan 3:16.

KIKO TA E OPSTAKULO? Tin hende lo ke pa bo kere ku Hesus nunka a eksistí. Otronan ta bisa ku el a eksistí, pero nan ta pretendé ku e tabata djis un hòmber komun ku a muri hopi tempu pasá.

KON BO POR VENSE E OPSTÁKULO? Imitá disipel Natanael.a Su amigu Felipe a bis’é ku el a haña e Mesias—“Hesus di Názarèt, yu di Hosé.” Sinembargo, Natanael no a kere esei djis pasobra Felipe a bis’é. De echo, el a respondé: “Por sali algu bon for di Názarèt?” Ounke e tabata duda, el a aseptá Felipe su invitashon pa e “bin i mira” pa su mes. (Juan 1:​43-51) Abo tambe lo benefisiá si bo analisá pa bo mes evidensia ku ta mustra ku Hesus a eksistí. Kiko bo por hasi?

Analisá evidensia históriko ku ta mustra ku Hesus realmente a eksistí. Hosefo i Tásito tabata dos historiadó renombrá ku a biba den e promé siglo i nan no tabata kristian. Nan a referí na Hesukristu komo un persona ku realmente a eksistí. Den Tásito su relato ku a deskribí kon Emperador Nero di Roma a kulpa e kristiannan pa e kandela na Roma na aña 64 di nos era, el a skirbi: “Nero a tira e kulpa riba un grupo di hende ku nan tabata yama kristian i ku e romanonan a odia debí na nan práktikanan kristian. Ademas, el a someté nan na torturanan sumamente kruel. Kristu, for di kende e nòmber kristian a bini, a haña pena kapital durante di e reinado di Tiberio na man di un di nos prokuradónan, Ponsio Pilato.”

Pa loke ta e referensianan ku e historiadónan di e promé dos siglonan a hasi na Hesus i e promé kristiannan, e Edishon 2002 di Encyclopædia Britannica a bisa: “E relatonan independiente akí ta duna prueba ku den pasado ni e opositornan di kristianismo no a duda nunka ku Hesus a eksistí di bèrdat. Ta te na final di siglo 18, durante siglo 19 i na kuminsamentu di siglo 20 numa, hende a kuminsá lanta duda pa promé biaha riba e punto akí, anto sin sufisiente base.” Na aña 2002, un editorial den The Wall Street Journal a bisa: “Mayoria erudito, ku eksepshon di algun ateista, ya a aseptá Hesus di Názarèt komo un persona ku a yega di eksistí.”

Konsiderá prueba ku ta mustra ku Hesus a ser resusitá. Ora Hesus su opositornan a arest’é, su kompañeronan di mas íntimo a bandon’é, i yen di miedu, su amigu Pedro a nenga ku e konos’é. (Mateo 26:​55, 56, 69-75) Despues ku nan a arestá Hesus, su siguidónan a plama for di otro. (Mateo 26:31) Pero mas despues, diripiente e disipelnan a bira masha aktivo. Ku kurashi, Pedro i Juan a konfrontá e mesun hendenan ku a kousa Hesus su morto. Hesus su disipelnan a bira asina animá ku nan a plama su siñansa den henter e Imperio Romano i a preferá di enfrentá morto en bes di komprometé nan kreensianan.

Kiko tabata un motibu ku a pone nan aktitut kambia na un manera asina drástiko? Apòstel Pablo a splika ku Hesus a ser resusitá for di morto i “a aparesé na Sefas [Pedro], despues na e diesdosnan.” I el a agregá: “Despues di esei, el a aparesé na mas ku sinku shen ruman na e mesun tempu.” Mayoria di e testigunan okular tabata na bida ainda tempu ku Pablo a skirbi e palabranan ei. (1 Korintionan 15:​3-7) Fásilmente, hende ku a duda ku Hesus a resusitá por a desmentí e testimonio di un òf dos testigu okular. (Lukas 24:​1-11) Pero e testimonio di mas ku sinku shen testigu okular a duna prueba konvinsente ku Hesus a ser resusitá for di morto.

KIKO TA E REKOMPENSA? Esnan ku tin fe den Hesus i ta obedes’é por haña pordon pa nan pikánan i un konsenshi limpi. (Marko 2:​5-12; 1 Timoteo 1:19; 1 Pedro 3:​16-22) Si nan muri, Hesus a primintí di resusitá nan riba “e último dia.”​—Juan 6:40.

Pa mas informashon, wak e buki Kiko Beibel Ta Siña Realmente? kapítulo 4 ku tin e tema “Ken Hesukristu Ta?” i kapítulo 5 ku tin e tema “Dios Su Regalo di Mas Grandi: E Reskate.”b

[Nota]

[Plachi na página 7]

Analisá evidensia ku ta mustra ku Hesus a eksistí, meskos ku Natanael a hasi