Hala Serka Dios

Hende Mansu Ta Presioso pa Yehova

Numbernan 12:1-15

ORGUYO, yalursheit i ambishon ta karakterístikanan masha komun serka hende ku ta logra éksito den e mundu akí. Pero karakterístikanan asina ta hala nos serka Yehova Dios? Nò, al kontrario, Yehova ta konsiderá sirbidónan mansu komo presioso. E relato na Numbernan kapítulo 12 ta mustra esei bon kla. E suseso a tuma lugá den e desierto di Sinaí, despues ku e israelitanan a haña nan libertat for di Egipto.

Miriam ku Aaron, e rumannan mas grandi di Moisés, a kuminsá “papia kontra Moisés,” nan ruman hòmber chikí. ((Versíkulo 1) En bes di simplemente papia ku Moisés, nan a papia kontra dje. Probablemente nan tabata kana keha rònt den e kampamentu di e israelitanan. Ta parse ku Miriam tabata esun ku a kuminsá murmurá ya ku e ta ser menshoná promé. E echo ku Moisés a kasa ku un muhé kusita tabata e promé motibu pakiko el a murmurá. Ta yalurs Miriam tabata ku e otro muhé—kende pa kolmo no tabata un israelita—lo a haña mas tantu atenshon kuné?

Tabatin mas motibu pa e kehamentu. Miriam ku Aaron tabata bisa: “Ta pa medio di Moisés so SEÑOR a papia anto? E no a papia pa medio di nos tambe?” (Versíkulo 2) Akaso e berdadero motibu tras di e murmuramentu tabata e deseo pa haña mas outoridat i rekonosementu?

Segun e relato, Moisés no a reakshoná riba e asuntu ei. Aparentemente, el a soportá ku pasenshi loke su rumannan tabata hasi sin bisa nada. E echo ku e tabatin pasenshi i no a keha ta konfirmá loke Beibel ta bisa di dje, esta, ku e “tabata masha humilde [òf, mansu], mas ku tur hòmber” riba tera.a (Versíkulo 3) No tabata nesesario pa Moisés defendé su mes. Yehova tabata skucha, i el a defendé Moisés.

Pa Yehova, e echo ku nan a murmurá kontra Moisés tabata komo si fuera ta kontra Dje mes nan a murmurá. Al fin i al kabo, ta é a nombra Moisés. Dios a rekordá e murmuradónan, ora el a reprendé nan, ku e tabatin un relashon úniko ku Moisés: “Kuné mi ta papia kara-kara.” Despues Yehova a puntra Miriam ku Aaron: “Pakiko anto boso no tabatin miedu di papia kontra . . . Moisés?” (Versíkulo 8) Ora nan a papia kontra Moisés, en realidat nan a kometé e eror di papia kontra Dios. Pa e falta di rèspèt flagrante ei, nan lo a sinti e rabia di Yehova kima kontra nan.

Miriam, kende opviamente tabata e instigadó, a ser kastigá ku lepra. Mesora Aaron a roga Moisés pa pidi pordon pa Miriam. Djis imaginá bo e situashon, awor Miriam tabatin mester di yudansa di hustamente esun kontra ken el a murmurá! Debí ku Moisés tabata un hòmber mansu, el a hasi loke su ruman a pidié. E promé bes ku Moisés a papia den e relato akí ta ora el a roga Yehova fervorosamente na fabor di su ruman muhé. Miriam a kura, pero e mester a pasa den e humiashon di keda shete dia largu den karentena.

E relato akí ta yuda nos komprondé ta ki kualidatnan Yehova ta konsiderá presioso i ta ki karakterístikanan e no ta haña bon. Si nos ke hala serka Dios, nos mester hasi esfuerso pa eliminá kualke rastro di orguyo, yalursheit i ambishon ku nos ta detektá den nos mes. Yehova ta stima esnan ku ta mansu. E ta primintí: “E humildenan lo heredá e tera, i lo deleitá nan mes den pas abundante.”—Salmo 37:11; Santiago 4:6.

[Nota]