Loke Hesus A Siña Hende Tokante e Reino di Dios

“El a kuminsá bai di un stat i di un pueblito pa otro, . . . predikando e reino di Dios.”​—LUKAS 8:1.

NOS gusta papia tokante kosnan ku ta importante pa nos i ku nos ta balorá. Sí, ta manera Hesus mes a bisa “for di abundansia di kurason boka ta papia.” (Mateo 12:34) Ora nos konsiderá loke Hesus a papia di dje durante su ministerio, nos por konkluí ku e Reino di Dios tabata un tópiko masha importante p’e.

Kiko e Reino di Dios ta? Un reino ta un gobièrnu ku un rei na kabes. P’esei, e Reino di Dios ta un gobièrnu ku Dios a establesé. Hesus a papia ampliamente tokante e Reino di Dios; esei tabata e tema di su predikashon. E kuater Evangelionan ta menshoná e Reino ei mas ku 110 biaha. Pero Hesus no a siña hende ku palabra so. Mediante su obranan tambe el a siña hende kiko e Reino di Dios ta i kiko lo e hasi.

Ken ta e Rei? No ta votadónan humano a eligí e Rei di e Reino di Dios. Mas bien, ta Dios mes a skohe e Gobernante akí. Ora Hesus tabata siña hende, el a laga nan komprondé ku e ta esun ku Dios a skohe pa ser Rei.

Hesus tabata na altura di profesianan bíbliko ku a mustra ku e Mesias primintí lo a goberná den un Reino ku lo dura pa semper. (2 Samuel 7:​12-14; Daniel 7:​13, 14; Mateo 26:​63, 64) Kòrda ku Hesus a deklará públikamente ku e ta e Mesias ku Beibel a profetisá di dje. Di e manera ei, el a atmití ku é ta e Rei ku Dios a nombrá. (Juan 4:​25, 26) P’esei, korektamente Hesus a usa e ekspreshon “mi reino” vários biaha.​—Juan 18:36.

Ademas, Hesus a siña hende ku lo tin otro personanan ku lo goberná huntu kuné den e Reino. (Lukas 22:​28-30) El a yama e ko-gobernantenan akí un “tou chikitu,” pasobra nan kantidat lo ta limitá. El a bisa nan: “A agradá boso Tata pa duna boso e reino.” (Lukas 12:32) E último buki di Beibel ta mustra ku lo tin un total di 144.000 persona ku tin e privilegio di goberná ku Kristu.​—Revelashon 5:​9, 10; 14:1.

Unda e Reino ta situá? Hesus a bisa e gobernante romano Ponsio Pilato: “Mi reino no ta di e mundu akí.” (Juan 18:36) Pues Dios su Reino, ku Hesus komo Rei, lo no goberná mediante representantenan humano. Bes tras bes, Hesus a referí na e Reino di Dios komo “e reino di shelu.”a (Mateo 4:17; 5:​3, 10, 19, 20) P’esei, e Reino di Dios ta un gobièrnu selestial.

Hesus tabatin tur konfiansa ku lo e bai shelu bèk despues di a biba na tera. El a bisa ku e ta bai pa “prepará un lugá” den shelu, i asina habri kaminda pa su ko-gobernantenan por ta huntu kuné.​—Juan 14:​2, 3.

Kiko e Reino lo logra? Hesus a siña su oyentenan pa resa pidi Dios: “Ku bo reino bin. Ku bo boluntat sosodé na tera meskos ku den shelu.” (Mateo 6:​9, 10) Dios su boluntat ta sosodé den shelu kaba. I pa medio di e Reino, Dios lo kumpli ku su propósito relashoná ku e tera. Pa logra esei, e Reino lo efektuá kambionan drástiko riba e tera akí.

Kiko e Reino lo hasi pa tera? Hesus a siña hende ku e Reino di Dios lo kaba ku tur maldat pasobra lo e eliminá tur esnan ku ta determiná pa sigui hasi loke ta malu. (Mateo 25:​31-34, 46) Esei ta nifiká ku lo bin un fin na tur tipo di korupshon i maldat. I segun Hesus su siñansa, tera lo ta yen di hende “humilde,” hustu, miserikòrdioso, “di kurason puru” i pasífiko.​—Mateo 5:​5-9.

Akaso e hendenan fiel akí lo tin ku biba riba un planeta kontaminá? Di ningun manera! Hopi tempu pasá, Beibel a profetisá ku e Gobernante primintí lo restorá tera i hasié un Paradeis meskos ku e hardin di Edén tabata. (Isaias 11:​1-9) I Hesus a konfirmá ku e Reino di Dios lo efektuá e kambionan maravioso akí. Ora e kriminal ku tabata kologá na staka banda di Hesus a pidié pa kòrda riba dje ora e ta den su reino, Hesus a primintié: “Di bèrdat mi ta bisa bo awe: Lo bo ta ku mi den Paradeis.”b (Lukas 23:​42, 43, NW) Sí, e Reino di Dios lo transformá e tera akí den un paradeis global.

Kiko mas e Reino lo hasi pa humanidat? Hesus a hasi mas ku djis primintí loke Dios su Reino lo hasi. El a demostrá tambe kiko e Reino lo hasi. Hesus a efektuá hopi kurashon milagroso, i di e manera ei, el a demostrá na un eskala chikitu loke lo e hasi den futuro riba un eskala muchu mas grandi ora su Reino ta goberná. E Evangelio inspirá ta bisa: “Hesus tabata pasa den henter Galilea, i tabata siña den nan snoanan, i proklamá e evangelio di reino i kura tur sorto di enfermedat i tur sorto di malesa den e pueblo.”​—Mateo 4:23.

Hesus a kura tur sorto di enfermedat. El “a habri wowo di un persona ku a nase siegu.” (Juan 9:​1-7, 32, 33) Na un manera suave, Hesus a pone su man riba un hòmber leproso i a kur’é di su malesa repugnante. (Marko 1:​40-42) Ora nan a trese ‘un hòmber ku tabata surdu i ku tabatin lenga pegá’ serka Hesus, el a demostrá ku e por a laga “surdu tende i muda papia.”​—Marko 7:​31-37.

Hesus, Dios su Rei nombrá, tin poder pa asta lanta hende for di morto. Beibel ta menshoná tres okashon ku Hesus a resusitá hende. El a lanta e úniko yu di un biuda, un mucha muhé di 12 aña i Su amigu stimá Lázaro for di morto.​—Lukas 7:​11-15; 8:​41-55; Juan 11:​38-44.

Ora Hesus a deskribí e futuro maravioso ku ta spera súpditonan di e Reino di Dios, el a profetisá pa medio di apòstel Juan: “Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 1:1; 21:​3, 4) Imaginá bo, un mundu sin lágrima, sin tristesa, sin doló i sin morto! Na e tempu ei, e orashon pa Dios su boluntat sosodé na tera meskos ku den shelu lo ser kontestá den tur sentido.

Na ki tempu e Reino di Dios lo bini? Hesus a siña hende ku su reinado i e periodo di tempu remarkabel ku el a yama su “binida [“presensia,” NW]” lo kuminsá na e mesun tempu. Hesus a duna un profesia detayá pa indiká na ki tempu su presensia komo rei lo a kuminsá. Durante e tempu ei, mundu lo eksperensiá hopi difikultat, manera guera, hamber, temblor, pestilensia i oumento di maldat. (Mateo 24:​3, 7-12; Lukas 21:​10, 11) Esakinan i hopi otro rasgo ku Hesus a profetisá a bira bisto partikularmente desde 1914, e aña ku e Promé Guera Mundial a kuminsá. Pues, Hesus ta goberná awor komo Rei. Pronto e tempu lo yega pa e Reino bini i pa Dios su boluntat sosodé na tera.c

Kiko e binida di e Reino di Dios ta nifiká pa bo? Esei ta dependé kompletamente di e manera ku abo ta reakshoná riba Hesus su mensahe.

[Nota]