“Por Fin Mi A Haña Berdadero Libertat”

Mi a nase na Moundsville, un pueblo ketu kantu di Riu Ohio parti nort di West Virginia, Merka. Mi ta e di dos den mi kuater rumannan, di kua tres ta mucha hòmber. Pues kasi nunka kas tabata laf. Mi mayornan tabata hendenan trahadó i onesto, i tabatin gran interes den nan próhimo. Nos no tabata hende ku masha moda, pero semper nos tabatin lo nesesario. Komo Testigunan di Yehova, mi mayornan a hasi esfuerso pa lanta nos ku prinsipionan di Beibel.

Pero ora mi a bira tiner, mi kurason a kuminsá desviá for di e kosnan ku mi a siña. Mi a kuminsá puntra mi mes si en bèrdat e prinsipionan di Beibel por a duna mi berdadero propósito òf satisfakshon den bida. Mi a pensa ku e úniko kos ku por hasi un hende berdaderamente felis ta si e ta totalmente liber. Un poko tempu despues mi a stòp di asistí na e reunionnan kristian. Dos di mi rumannan tambe a bira mes rebelde ku mi. Nos mayornan a purba tur manera pa yuda nos, pero nos a nenga nan yudansa.

Mi no a realisá mes ku e supuesto libertat ku mi a anhelá lo a hiba mi den gara di adikshon. Un dia, riba kaminda pa kas for di skol, un amigu a ofresé mi un sigaria. Mi a tum’é. For di e dia ei padilanti mi a kuminsá bisa sí na hopi práktika robes. Ku tempu, mi a kuminsá usa droga i bebe di mas, i tambe mi a hiba un bida inmoral. Algun aña despues, mi a kuminsá ta eksperimentá ku droganan mas fuerte te ku mi a bira adikto na hopi di nan. Segun ku mi tabata bira mas bisiá na e kosnan ei, mi a kuminsá ta bende droga pa mi por a sigui ku mi estilo di bida.

Maske kuantu mi a purba ignorá mi konsenshi, tur ora bai e tabata rekordá mi ku mi manera di biba tabata robes. Pero mi a pensa ku ya e daño tabata hasí kaba i ku no tabatin manera pa bira bèk. Aunke na e fiestanan i konsiertonan ku mi tabata bai mi tabata rondoná pa hende, tòg hopi bes mi tabata sinti mi so i deprimí. Tin biaha, mi tabata pensa riba mi mayornan, kon desente i bon hende nan ta, i mi tabata puntra mi mes kon bini mi a desviá asina tantu.

Aunke mi no tabata kere den mi mes mas, otronan sí no a pèrdè speransa. Na aña 2000, mi mayornan a invitá mi na un kongreso di distrito di Testigunan di Yehova. Aunke mi no tabatin masha gana, mi a bai tòg. Pa mi sorpresa, mi dos otro rumannan ku a bandoná e bèrdat tambe a bai.

Na e kongreso mi a realisá ku un aña promé mi tabata na e mesun sitio akí pero pa un konsierto di rock. E kontraste ku mi a mira a dal mi duru. Dia di e konsierto e lugá tabata yen di sushi i tur na huma di sigaria. Hopi di esnan ku a bai e konsierto no tabata amigabel i e mensahe di e kantikanan tabata deprimente. Pero na e kongreso, mi tabata meimei di hende berdaderamente felis—hende ku pa años mi no a mira, pero ku a duna mi un kaluroso bonbiní. E lugá tabata limpi i e mensahe na e okashon akí tabata duna speransa. Ora mi a mira e efekto positivo ku bèrdat di Beibel tin riba hende, mi a puntra mi mes dikon mi a rechas’é.—Isaías 48:17, 18.

Dirèkt despues di e kongreso mi a disidí di kuminsá bai e reunionnan kristian atrobe. Mi rumannan, despues di loke nan a tende na e kongreso, tambe a disidí di kuminsá bai e reunionnan bèk. Nos tur tres a aseptá un estudio di Beibel.

Un teksto di Beibel ku sigur a animá mi ta Santiago 4:8, ku ta bisa: “Hala serka Dios, i lo e hala serka boso.” Mi a realisá ku si mi ke hala serka Dios, mi tin ku drecha mi bida. Entre otro, mi tabatin ku stòp di huma, usa droga i bebe di mas.—2 Korintionan 7:1.

Mi a kibra tur laso ku mi amigunan bieu i na nan lugá mi a buska amigu nobo entre sirbidónan di Yehova. E ansiano kristian ku tabata duna mi estudio di Beibel tabata un gran yudansa pa mi. E tabata bèl mi regularmente i tabata pasa wak kon ta bai ku mi. Te awe e ta un di mi mihó amigunan.

Den e lènte di aña 2001, ami ku mi dos rumannan a dediká nos bida na Dios pa medio di boutismo bou di awa. Imaginá bo kon kontentu mi mayornan i mi ruman hòmber mas yòn, ku sí tabata den e bèrdat, a keda ora ku por fin henter e famia a uni den adorashon berdadero!

Ántes mi tabata kere ku Beibel su prinsipionan ta muchu restriktivo, pero awor mi ta mira nan komo un protekshon masha balioso. Beibel a duna mi e forsa pa stòp di usa i bende droga, i bira un persona mas útil pa komunidat.

Mi tin e privilegio di ta parti di un hermandat mundial di sirbidó di Yehova. E personanan akí di bèrdat ta stima otro i nan ta sirbi Dios den un forma uní. (Huan 13:34, 35) E hermandat akí a trese un bendishon hopi spesial pa mi—mi kasá, Adrianne, kende mi ta stima i apresiá masha hopi mes. Ta un goso grandi di por sirbi nos Kreador huntu.

En bes di kore tras di deseonan egoista, awor mi ta sirbi boluntariamente komo un predikadó di tempu kompleto. Asina mi por yuda hende sa kon nan tambe por benefisiá di e Palabra di Dios. E trabou akí ta duna mi un gran felisidat. Mi por bisa ku tur konvikshon ku Beibel a kambia mi bida. Por fin mi a haña berdadero libertat.