Yehova Ta Karga Mi Karga Tur Dia pa Mi

M’a nase na aña 1956 ku “lomba habrí” (spina bifida), es desir, e tubu di nèrvio den mi wesu di lomba no a sera kompletamente. Esaki a kousa daño na mi nèrvionan i a pone ku mi no por kana bon i ku mi tin otro problemanan serio di salú.

Promé ku mi a nase, mi mayornan a kuminsá studia Beibel ku un pareha misionero di Testigunan di Yehova. Tempu mi tabata mucha tabatin djis un par di publikadó ta biba na Usakos (Namibia), mi pueblo natal. P’esei nos tabata studia e informashon di e reunionnan di kongregashon komo famia. Ku 7 aña, mi mester a hasi un operashon pa pone saku—òf, stoma—pa saka orina (urostomia). I ku 14 aña, mi a kuminsá haña epilepsia. Mi no por a kaba skol sekundario, pasobra e skol tabata keda muchu leu i mi mester a haña kuido spesial serka mi mayornan.

Apesar di tur esei, mi a disidí di fortalesé mi relashon ku Yehova. Hopi di nos publikashonnan kristian no tabata disponibel ainda na afrikaans, mi idioma materno. P’esei mi a siña lesa ingles pa mi por a studia algun di nos bukinan. M’a bira publikadó i ku 19 aña mi a batisá. Pero mi tabatin hopi problema físiko i emoshonal durante e kuater añanan ku a sigui. Ademas, kaminda mi tabata biba, tur hende tabata konosé nos bon, i miedu di hende a stroba mi di ta mas aktivo den sirbishi.

Tempu mi tabatin 20 i piku aña, nos a muda di Namibia bai Suráfrika, i pa promé biaha den mi bida mi por a reuní ku un kongregashon. Esta dushi esei tabata! Pero lamentablemente, mi mester a bolbe operá. E biaha akí, nan mester a pone un saku pa saka sushi (kolostomia).

Poko tempu despues mi a tende un superintendente di sirkuito papia tokante e trabou di pionero. Su palabranan a yega na mi kurason. Mi tabata sa ku mi salú no tabata masha djaki te aya, pero mi a mira kon Yehova a sostené mi durante momentonan difísil. Pues, mi a yena e papel di solisitut pa bira pionero regular. Sinembargo, komo ku e ansianonan tabata na altura di mi problemanan di salú, nan a disidí di no aprobá mi solisitut.

Pero tòg mi kier a hasi mi bèst den e trabou di prediká. Ku yudansa di mi mama i otro rumannan, mi a logra yega e oranan di pionero regular durante un periodo di seis luna. Esaki a demostrá ku di bèrdat mi kier a traha pionero i ku mi por a logra esei apesar di mi problemanan di salú. M’a bolbe yena un solisitut, i e biaha akí sí e rumannan a aprob’é. M’a bira pionero regular dia promé di sèptèmber 1988.

Durante mi añanan komo pionero, semper mi a mira kon Yehova ta sostené mi. E trabou di pionero ta un protekshon pasobra en bes di sinta konsentrá riba mi limitashonnan, mi ta keda okupá siñando otro hende e bèrdat. Tambe el a yuda mi kontrolá mi emoshonnan i kultivá un amistat mas será ku Yehova. Mi ta sinti mi masha felis ku mi por a yuda vários hende bira sirbidó dediká i batisá di Yehova.

Mi problemanan di salú t’ei ketu bai, pero Yehova ta karga mi karga tur dia pa mi. (Sal. 68:19) El a hasi mas ku djis yuda mi soportá mi situashon; danki na Yehova mi ta kontentu ku mi ta na bida!