Pasku Ta un Selebrashon pa Kristian?

Miónes di hende rònt mundu ta kere ku Pasku ta e selebrashon di e kumpleaño di Hesukristu. Pero bo a yega di puntra bo mes si e promé kristiannan, esnan ku tabata mas será ku Hesus, a selebrá Pasku? Bo sa kiko Beibel ta bisa tokante hasimentu di aña? Nos por haña sa si Pasku ta un selebrashon pa kristian ora nos haña kontesta riba e preguntanan ei.

Di promé, Beibel no ta menshoná selebrashon di kumpleaño di Hesus ni di niun otro fiel sirbidó di Dios. E skritura ta referí solamente na dos hende ku a selebrá nan aña. Niun di nan dos no tabata sirbidó di Yehova, e Dios ku Beibel ta papia di dje, i tur dos su hasimentu di aña a kaba na malu. (Génesis 40:20; Marko 6:21) Segun Encyclopædia Britannica, e promé kristiannan tabata kontra di e “kustumber pagano di selebrá hasimentu di aña.”

Beibel no ta bisa eksaktamente ki dia Hesus a nase. Segun e Cyclopedia di McClintock i Strong, “ni e T[èstamènt] N[obo] ni niun otro fuente no ta menshoná e fecha di nasementu di Kristu.” Siguramente anto, si Hesus tabata ke pa su siguidónan selebrá su hasimentu di aña, lo el a hasi sigur pa nan sa ki dia el a nase.

Di dos, niun kaminda den Beibel nos ta mira ku Hesus òf su disipelnan a selebrá Pasku. Segun New Catholic Encyclopedia, selebrashon di Pasku a ser menshoná pa promé biaha “den e Kronógrafo di Filókalo, un kalènder romano ku ta bai bèk te na aña 336 [despues di Kristu].” Ta bisto ku esei tabata hopi tempu despues ku Beibel a ser kompletá i siglonan despues ku Hesus tabata riba tera. P’esei, McClintock i Strong ta bisa ku “e selebrashon di Pasku no ta un mandato di Dios ni e no ta den e T[èstamènt] N[obo].”a

Komo e Gran Maestro, Hesus a duna instrukshon bon kla riba kiko e tabata ke pa su siguidónan hasi, i nos por haña e instrukshonnan akí den Beibel. Sinembargo, selebrashon di Pasku no ta un di nan. Meskos ku un dosente no ke pa su studiantenan bai mas aleu di loke el a bisa nan pa hasi, Hesus no ke pa su siguidónan “bai mas leu di loke ta pará skirbí” den e Skritura Santu.—1 Korintionan 4:6.

Di otro banda, tin un evento importante ku e promé kristiannan tabata konosé, esta, e Memorial, òf konmemorashon di e morto di Hesus. Hesus mes a bisa su disipelnan ki dia nan mester tene e evento ei i a mustra nan kon pa hasié. E instrukshonnan spesífiko akí i tambe e fecha di Hesus su morto ta skirbí den Beibel.—Lukas 22:19; 1 Korintionan 11:25.

Manera nos a mira, Pasku ta un selebrashon di hasimentu di aña, i e promé kristiannan no a sigui e kustumber pagano akí. Ademas, Beibel no ta menshoná ku Hesus òf otro hende a selebrá Pasku. En bista di e puntonan akí, miónes di kristian rònt mundu a yega na e konklushon ku nan no ta selebrá pasku.