Bo Ta Kòrda?

Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Dikon mayornan imigrante mester tene kuenta ku e idioma di nan yunan pa yuda nan yunan spiritualmente?

Probablemente e yunan lo siña e idioma lokal na skol i den e ambiente ku nan ta. Ora un mucha sa mas ku un idioma, esei por tin su bentahanan. Mayornan mester saka afó unda nan yunan lo tin mihó chèns di komprondé e bèrdat i progresá spiritualmente, si ta den un kongregashon di e idioma lokal òf di e idioma di e mayornan. Mayornan kristian ta pone e bienestar spiritual di nan yunan promé ku nan interesnan personal.—w17.05, pág. 9-11.

Na kiko Hesus a referí ora el a puntra Pedro: “Bo stima mi mas ku esakinan?” (Huan 21:15)

Ta parse ku Hesus tabata referí na e piskánan ku tabata einan i/òf na e negoshi di piskamentu. Despues di Hesus su morto, Pedro a bolbe sigui ku su trabou komo piskadó. Kristiannan mester saminá nan mes pa wak ki lugá nan trabou tin den nan kurason.—w17.05, pág. 22-23.

Dikon Abraham a pidi su kasá pa e bisa ku ta ruman nan tabata? (Gén. 12:10-13)

En realidat, Sara tabata Abraham su mitar ruman. Si Sara a bisa ku e tabata kasá di Abraham, kisas nan lo a mata Abraham i lo e no por a produsí e desendiente ku Dios a primintié.—wp17.3, pág. 14-15.

Ki téknika Elias Hutter a bini kuné pa yuda su studiantenan siña hebreo?

E tabata ke yuda su studiantenan distinguí e rais di palabranan hebreo den Beibel i nan prefiho- i sufihonan. Pa logra esei, el a prent e rais di kada palabra hebreo ku lèter diki (sólido) i e prefiho- i sufihonan el a prent ku lèter ku rant diki pero transparente di paden. E Tradukshon di Mundu Nobo di e Santu Skritura—Ku Referensia ta usa un método similar den su notanan na pia di página.—wp17.4, pág. 11-12.

Kiko un ruman mester tene kuenta kuné pa e sa si ta apropiá pa e tin un arma di kandela pa protehá su mes kontra otro hende?

Bida ta sagrado pa Yehova. Hesus no a bisa su siguidónan pa buska un spada pa protehá nan mes. (Luk. 22:36, 38) Nos mester kombertí nos lansanan na skèr-pa-snui. Bida tin mas balor ku kos material. Nos ta respetá e konsenshi di otro hende, i nos ke ta un bon ehèmpel. (2 Kor. 4:2)—w17.07, pág. 31-32.

Dikon e relato di Mateo tokante Hesus su infansia ta diferente for di e relato di Lukas?

E relato di Mateo ta enfoká riba Hose; por ehèmpel, Mateo a skirbi kon Hose a reakshoná ora el a haña sa ku Maria tabata na estado i kon el a sigui instrukshon divino pa hui bai Egipto i despues regresá Israel. Lukas ta enfoká riba Maria; por ehèmpel, el a skirbi tokante Maria su bishita serka Elisabèt i kon Maria a reakshoná ora Hesus a keda na e tèmpel.—w17.08, pág 32.

Kiko ta algun kos ku a pone e eksistensia di Beibel na peliger?

E nifikashon di palabra- i ekspreshonnan den Beibel ku tempu a kambia. Desaroyonan polítiko a influensiá idioma komun. Tambe tabatin intentonan pa oponé e trabou di tradusí Beibel den idiomanan komun.—w17.09, pág. 19-21.

Nos tin un angel wardadó?

Nò. Ta bèrdat ku Hesus a bisa ku e angelnan di su disipelnan ta mira kara di Dios. (Mat. 18:10) Pero e kier a bisa ku angel ta interesá den su disipelnan i no ku e angelnan ta protehá kada un di nan milagrosamente.—wp17.5, pág. 5.

Ki tipo di amor ta esun di mas elevá?

Ora agape ta basá riba e prinsipionan korekto, e ta e tipo di amor mas elevá. E por inkluí mustramentu di afekto i kariño na otro hende. Pero nos ta demostr’é prinsipalmente ora nos ta hasi bon na otro hende.—w17.10, pág. 7.