Compartí cu Otronan Segun Nan Necesidad
1 Jehova ta haci percuracion pa satisfacé nos necesidadnan spiritual mediante e “esclabo” fiel. (Mat. 24:45-47) Hopi dje provisionnan aki ta den forma di buki, Bijbel, volúmen, video, grabacion di audiocaset i disketnan di computer pa investigacion bíblico. Loke Jehova ta suministrá semper ta suficiente sin tin cu malgastá. E ta spera di nos pa compartí un cu otro, haciendo sigur cu nos tur ta beneficiá di igual manera.
2 Ta costa masha hopi placa pa producí tur e provisionnan ei. E gastunan aki ta ser cubrí dor di henter e hermandad mundial. Esaki ta specialmente e caso desde cu Sociedad a instituí e areglo pa distribuí literatura sin cobra [den cierto paisnan], dependiendo completamente di donacionnan boluntario pa cubri gastu. Ademas, hopi sucursal ta obtené e provisionnan aki for di Sociedad na un costo abou pa e rumannan por tin loke nan mester p’e reunionnan i pa actividad di sirbishi di veld maske nan tin recursonan material masha limitá.
3 Con Nos Por Yuda: Nos por respondé n’e amonestacion di Pablo pa compartí cu otronan “segun nan necesidad.” (Rom. 12:13) Ora nos ta haci contribucionnan financiero pa cu e trabou mundial, nos ta compartiendo directamente loke nos tin cu nos rumannan rond mundu. Cu esaki na mente, algun ruman a dicidí pa tur luna pone un suma un banda pa contribuí n’e trabou mundial, mescos cu nan ta haci pa gastunan di Salon di Reino. Nan ta reconocé cu e fondonan aki ta ser usá no solamente pa produccion di literatura sino tambe pa tur faceta dje trabou. Imaginá e gran beneficio cu nos hermandad mundial lo experenciá si mas persona contribuí den e manera aki riba un base regular.
4 Ademas, nos por contribuí dor di semper ser moderá ora di haci pedido pa artículonan cu ta fácil pa nos obtené. Haciendo pedido pa solamente loke nos realmente tin mester ta permití nos rumannan na otro parti ricibí e provisionnan spiritual cu nan tambe tin mester pa keda fuerte i pa promové e predicacion dje bon nobo den nan parti di mundu.—Heb. 13:16.
5 Specialmente nos tin cu tene esaki na mente ora di haci pedido pa artículonan cu ta costa Sociedad hopi placa pa producí. Esakinan ta incluí video, CD-ROM, buki grandi di referencia, volúmen i abonamentnan riba audiocaset. En bes di haci pedido di un artículo pa cada miembro dje famia, henter e famia lo por usa solamente un? Si nos limitá loke nos ta tuma pa nos mes, esei lo permití otronan obtené e mésun cosnan bon cu nos ta disfrutá di dje.—Fil. 2:4.
6 E costo dje literatura cu nos ta laga den sirbishi tal bes ta ser compensá en parte dor di donacionnan hací n’e Sociedad pa su trabou mundial sea dor di nos na Salon di Reino of dor di esnan interesá cu aceptá nan. Sin embargo, ora ta trata di artículonan di literatura cu ta pa nos uso personal, incluyendo bukinan di cantica, Anuario, Bijbelnan di luho, etcétera, nos no por spera pa hende djafó cubri nos necesidadnan. Jehova su sirbidornan dedicá ta e fuente principal dje apoyo financiero aki. Cu esei na mente, hopi publicador ta calculá loke e artículonan aki kisas lo a costa si nan a ser producí comercialmente, i e ora ei nan ta contribuí di acuerdo cu esei. Por ehempel, un Bijbel di luho, cu rand di oro fácilmente ta costa 40 florin of mas, un buki di referencia por ta mas cu 80 florin, un calender tur na color pa cologá na muraya por costa por lo ménos 10 florin, un enciclopedia riba CD-ROM ta costa entre 100 pa 200 florin of mas, música riba disco compacto normalmente ta costa cerca di 40 florin, i algun video hopi bes ta ser bendí pa muchu mas. Faltando di contribuí lo suficiente pa cubri e gastunan al final lo restringí loke e organisacion di otro manera lo por a logra pa promové e trabou mundial.
7 Jesus a declará cu su disipelnan berdadero lo a ser identificá claramente na nan amor un pa otro. (Juan 13:34, 35) Nos generosidad den duna materialmente i nos inegoismo den compartí cu otronan segun nan necesidad siguramente ta maneranan excelente pa duna prueba cu nos ta cristiannan berdadero.