Ken Lo Scucha Nos Mensahe?
1 Manera nunca promé den historia humano, hende ta ser inundá cu informacion, di cua hopi ta ridículo i asta engañoso. Como resultado, hopi hende ta sinti nan hogá den nan i ta bira difícil pa nos haña nan pa scucha e mensahe tocante e Reino di Dios. Nan no ta comprendé ki un efecto positivo e Palabra di Dios por tin riba nan si nan scuch’é.—Luc. 11:28.
2 Nos ta alegrá cu den hopi parti di mundu, miles di hende ta scuchando e mensahe ei i ta aceptando nos oferta di un studio di Bijbel na cas. Sin embargo, den otro teritorionan e reaccion no ta masha cos. Hopi di nos bishitanan den e ministerio ta sin resultado positivo i kisas nos ta puntra nos mes ken lo scucha nos mensahe.
3 Nos mester vigilá pa no bira desanimá. Pablo a splica: “ ‘Tur hende cu inbocá e nomber di Jehova lo ser salbá.’ Sin embargo, con nan lo inbocá esun . . . di ken nan no a tende? Con, na nan turno, nan lo tende sin un hende pa predicá? . . . Net manera ta pará skirbí: ‘Ki bunita ta e pianan di esnan cu ta declará bon nobo di bon cosnan!’ ” (Rom. 10:13-15) Si nos ta sembra simia di Reino diligentemente, Dios lo hacié crece den esnan di curason onrado.—1 Cor. 3:6.
4 E Clave Ta pa Haci Rebishitanan Regular: Den teritorionan caminda ta parce cu poco hende ta scucha nos mensahe, nos tin cu concentrá riba desaroyá cualkier interes cu sí nos ta haña, sea cu nos laga literatura of no. Pakico sea lihé pa concluí cu nos lo no logra nada? Ora nos ta sembra simia, nos no sa unda lo e tin éxito. (Ecl. 11:6) Si nos bolbe bon prepará pa compartí algu for dje Scritura, asta si ta solamente brevemente, nos lo por yega n’e persona su curason. Nos por laga un tratado of ofrecé e revistanan actual. Cu tempu, nos lo por mustra con ta haci un studio di Bijbel. Nos lo keda agradablemente sorpresá pa mira cuantu Jehova ta bendicioná nos esfuersonan.—Sal. 126:5, 6.
5 Un publicador a laga un tratado cu un señora cu a mustra algu di interes. No a hañ’é mas na cas sino te cu dos luna despues, i e ora ei e tabata muchu ocupá pa papia. A bolbe laga e mésun tratado cuné. Apesar dje publicador su esfuersonan persistente pa hañ’é na cas, a dura un tres luna mas pa top’é, anto esei ta pasobra e tabata malu na cas. E ruman muher a bolbe pasa atrobe e siguiente siman i un combersacion breve a sigui tocante e tratado. Ora e ruman muher a bolbe e siguiente siman, e señora a expresá berdadero interes den e mensahe di Reino. Un cambio di circunstancia den su bida a hacié conciente di su necesidad spiritual. Nan a cuminsá un studio di Bijbel i el a studia cu smak tur siman desde e dia ei.
6 Mescos cu cualkier cos cu nos kier mira crece, sea ta flor, berdura of interes den e mensahe di Reino, mester cultiv’é. Esei ta tuma tempu, hopi esfuerso, un actitud di ta interesá i determinacion pa no entregá. Aña pasá, mas cu un tercer parti di un miyon hende den ken e simia di Reino a cuminsá crece a ser bautisá! Si nos sigui predicá, nos siguramente lo haña hopi hende mas cu lo scucha nos mensahe.—Compará cu Galationan 6:9.