Bijbel—Dios Su Guia pa Tur Hende
1 Segun cálculo un 4 mil miyon Bijbel a ser imprimí den mas cu 2.100 idioma i dialecto, haciendo e Palabra di Dios disponibel na mas cu 90 porciento dje poblacion di tera. Pero tog den mundu tin un hamber “pa tende e palabranan di Jehova.” (Amos 8:11) Hopi hende cu tin un Bijbel sea no ta les’é of no ta comprendé su contenido. Con nos por motivá nan pa usa Bijbel como un guia práctico den nan bida?
2 Den december nos lo ofrecé e buki E Bijbel—e Palabra di Dios of e palabra di hende? Caminda nos topa personanan interesá, nos por ofrecé tambe e traduccion di Bijbel cu a beneficiá nos pa e último 47 añanan—e Traducción del Nuevo Mundo. Por haci esaki dor di duna ehempel di su expresionnan cla i actual. (Mira e buki “Toda Escritura,” página 328 §6.) Nos lo demostrá nos aprecio profundo pa e regalo aki di Jehova dor di yuda otronan cu entusiasmo pa aceptá Bijbel como Dios su guia pa tur hende.
3 Lo bo por haci un introduccion dor di usa e tratado “Pakiko bo por konfia e Beibel.” Lo bo por bisa:
◼ “Maske Bijbel ta disponibel na mas cu 90 porciento dje poblacion di mundu, poco hende ta les’é regularmente. Kico bo ta pensa ta e motibu?” Lesa e promé dos paragrafnan dje tratado, huntu cu 2 Timoteo 3:16. Ofrecé e buki E Palabra di Dios. Si e doño di cas no kier e, pidié lesa e resto dje tratado ora e haña un chens. Resaltá e último subtema, “Predisiendo e futuru.”
4 Ora di bolbe bek cerca hende cu ken bo a laga e tratado “Pakiko bo por konfia e Beibel,” lo bo por purba esaki:
◼ Despues di bolbe introducí bo mes, lesa e último dos paragrafnan dje tratado. Puntra e doño di cas si el a yega di pensa riba e posibilidad di biba pa semper riba tera. Despues cu e contestá, bisa: “Testigonan di Jehova tin sigur cu tur e profecianan den Bijbel lo cumpli, incluyendo esnan cu ta predicí un futuro maraviyoso pa tur hende cu ta cumpli cu e rekisitonan di Dios.” Mustra e plachi na página 13 den e foyeto Rekerí, bai bek na les 5, i ofrecé pa considerá contesta dje preguntanan mencioná, cuminsando asina un studio.
5 Den teritorio caminda hende ta religioso, lo bo por purba e introduccion aki:
◼ “Nos ta animando hendenan pa nan tin mas respet pa Bijbel. Hopi famia tin un Bijbel, pero masha poco bes nan ta consult’é ora nan tin problema serio. Bo a ripará esaki? [Permití contesta.] Kisas nan ta kere cu Bijbel ta anticuá. E buki aki, E Bijbel—e Palabra di Dios of e palabra di hende?, ta duna prueba convincente cu Bijbel ta científicamente exacto i cu e ta ofrecé solucionnan práctico pa problemanan urgente djawendia.” Resaltá un par di punto for di capítulo 8 of capítulo 12 dje buki, i despues ofrec’é.
6 Ora di haci rebishita caminda a laga e buki “E Palabra di Dios,” lo bo por bisa:
◼ “Biaha pasá cu mi a bishitá bo, nos a considerá con Bijbel ta yuda solucioná problemanan complicá djawendia. Esnan cu a acept’é como e Palabra di Dios a ser yudá tambe pa hiba un bida mas felis i satisfecho. Lo mi kier mustrá bo un dje principionan práctico di Bijbel cu ta ser splicá den e buki cu mi a laga cu bo.” Considerá un dje principionan bíblico den capítulo 12, §3-6, i concluí dor di lesa §7. Si e persona mustra interes, ofrecé un studio sea for dje buki Conocimentu of e foyeto Rekerí.
7 E siguiente presentacion kisas ta interesá hende di mas edad:
◼ “Tabatin un tempu cu den mayoria cas hende tabata lesa Bijbel i famianan tabata biba di acuerdo cu su principionan. Esei tabata e caso den bo famia? [Permití contesta.] Awendia ta parce cu hopi hende ta demasiado distraí pa dedicá tempu pa lesa Bijbel of nan ta haña cu su principionan moral ta ouderwets. Capítulo 13 dje buki aki, E Bijbel—e Palabra di Dios of e palabra di hende?, ta presentá tres experencia di bida real, di personanan kende nan bida a cambia bira mas mihó despues di a studia Bijbel. Si bo kier lesa con e poder dje Palabra di Dios a yuda nan, gustosamente lo mi laga e buki aki cu bo.”
8 N’e rebishita, lo bo por bisa:
◼ “Ultimo biaha cu nos a papia, nos a bai di acuerdo cu e sociedad djawe ta ignorá principionan moral di Bijbel. E negligencia ei mester preocupá nos? [Permití contesta.] Jesucristo a duna hopi balor na gana conocimentu di Bijbel.” Lesa Juan 17:3. Despues considerá §5 di capítulo 1 dje buki Conocimentu. Splica nos programa di studio di Bijbel grátis, i ofrecé pa demostr’é.
9 Pidi Jehova den oracion pa bendicioná tur bo esfuersonan pa hala atencion n’e Bijbel—Dios su guia pa tur hende.