E Punto di Bista Bíblico

Sumision di Esposa Kico E Ta Nificá?

E PALABRA DI DIOS, e Bijbel, ta declará na Efesionan 5:22: “Laga esposanan keda sumiso na nan esposo mescos cu na Señor.” Kico exactamente esaki kier men? Un esposa mester someté su mes na tur loke un esposo kier, sin importá kico esei por ta? E esposa nunca por usa su mes iniciativa of tin un opinion diferente for di esun di su esposo?

Considerá e relato bíblico di Abigail. El a actua sabí pero contrario cu e deseonan di su esposo ricu, Nabal. Apesar dje bondad cu a ser demostrá na Nabal dor dje siguidornan di David, kende tabata esun cu Dios a scoge pa ser rey di Israel, Nabal a “grita ofensanan na nan.” David, furioso cu Nabal su actitud malagradecidu, tabata cla pa mat’é. Abigail a realisá cu tur e miembronan di su cas tabata den peliger. El a logra pone David suavisá su actitud. Con?—1 Samuel 25:2-35.

Abigail a admití na David cu Nabal tabata un “homber cu no ta sirbi pa nada” i a duna David e provisionnan cu Nabal no kier a duna. Normalmente, ta malu pa un esposo of esposa conta na público e faltanan di su casá. Acaso Abigail tabata un rebelde dor di papia i actua den e manera aki? No. E tabata tratando di salba e bida di Nabal i e miembronan di su cas. No tin ningun indicacion cu e tabatin custumber di mustra falta di respet of di ta independiente. Ni Nabal, un homber difícil di agradá, tampoco a expresá ningun malcontentu cu e manera cu Abigail a yuda manehá su gran propiedad. Pero den e situacion di crísis aki, sabiduria a dicta pa Abigail tuma su mes iniciativa. Ademas, Bijbel ta papia cu aprobacion di loke Abigail a haci.—1 Samuel 25:3, 25, 32, 33.

Hopi promé cu e tempu di Abigail, tabatin ocasionnan ora cu esposa di e patriarcanan a expresá un punto di bista i a tuma accion diferente for di loke nan esposo tabata kier. Sin embargo, e ‘muhernan santu aki cu tabata spera den Dios’ ta ser poné como ehempelnan di sumision pa un esposa cristian. (1 Pedro 3:1-6) Por ehempel, ora Sara a sinti cu Ismael, e yu di Abraham, a bira un menasa pa su yu, Isaac, el a dicidí cu Ismael mester ser sacá for di cas. Esaki tabata “masha desagradabel na Abraham.” Pero Dios a bisa Abraham: “No laga nada di loke Sara ta sigui bisá bo tocante e mucha homber sea desagradabel na bo . . . Scucha su bos.”—Génesis 21:11, 12.

Dicernimentu Ta Necesario

P’esei, lo no ta bon pa un esposa sintié presioná pa haci loke e sa cu ta masha imprudente of cu ta violá principionan divino, pensando cu e mester hacié pa sigui e principio di sumision. Ni tampoco mester lagu’é sinti su mes culpabel dor di a tuma iniciativa den un asuntu importante, manera Abigail i Sara a haci.

Sumision di esposa no ta nificá cu un esposa mester cumpli semper bai cu tur cos cu un esposo kier. Kico ta haci e diferencia? Ora tin principionan hustu den wega, e esposa lo tin cu keda sin bai di acuerdo cu su esposo. Sin embargo, tog e mester mustra, den su totalidad, un spiritu di sumision piadoso.

Naturalmente, un esposa mester soru pa e no pasa por haltu dje deseonan di su esposo pa haña su kier, pa despecho of pa otro motibunan robes. E mester por dicerní, ser “bon pa loke ta discrecion,” manera Abigail tabata.—1 Samuel 25:3.

Ora e Esposo Ta Evitá Responsabilidad

E meta i intencion principal di sumision piadoso di un esposa ta pa agradá Jehova dor di cooperá cu su casá i apoyá su decisionnan. Esaki ta basta fácil ora un esposo ta spiritualmente maduro. Esei por ta un desafio si e no ta.

Den un caso asina, con e esposa por trata cu e situacion? E por apelá na e esposo sinceramente of sugirié cua decisionnan lo beneficiá e famia mas. Si e esposa laga su casá ‘stuur e barcu,’ e esposo lo por bira mas ábil den haci esei. Teima constantemente cu e esposo ta violá e intencion di sumision corecto. (Proverbionan 21:19) Sin embargo, si ta claro cu e bienestar dje famia ta na peliger pa motibu dje esposo su maneho, e esposa lo por scoge pa recomendá, mescos cu Sara a haci, un mihó proceder.

Si e esposo ta un incrédulo, e desafio pa e esposa ta asta mas grandi. Tog e mester ta sumiso, tanten cu e esposo no ta pidié violá leynan bíblico. Si e esposo haci esei, e reaccion di un esposa cristian mester ta mescos cu esun dje disipelnan ora un corte a pidi nan pa violá Dios su mandamentunan: “Nos mester obedecé Dios como gobernante mas bien cu hende.”—Echonan 5:29.

Sin embargo, pa motibu di falta di experencia i sabiduria limitá, asta esposo i esposanan cu bon intencion por pasa e límitenan di nan papel. E esposo kisas ta mustra falta di consideracion; e esposa kisas ta insistí muchu pa haña su preferencianan. Kico lo yuda? Un punto di bista modesto di nan mes ta importante pa tur dos, ya cu “nos tur ta trompecá hopi bes.”—Santiago 3:2.

Hopi homber lo yega na apreciá e iniciativa onesto di un esposa si e esposa us’é huiciosamente. I cooperacion ta ser promové ora tur dos ta pidi dispensa ora nan cometé eror. Mescos cu Jehova ta pordoná nos faltanan di tur dia, asina tambe nos mester pordoná otronan. “Si ta eror tabata loke bo ta vigilá, O Jah, O Jehova, ken lo por keda pará? Pasobra cerca bo tin berdadero pordon.”—Salmo 130:3, 4.

“Sumiso Un na Otro”

P’esei, pa nos mihó interes mutuo, Scritura ta consehá: “Keda sumiso un na otro den temor di Cristo.” Un otorgá na otro respet mutuo amoroso; no obstaculisá ni competí. E texto ta sigui bisa: “Laga esposanan keda sumiso na nan esposo mescos cu na Señor, pasobra un esposo ta cabes di su esposa mescos cu Cristo tambe ta cabes dje congregacion.”—Efesionan 5:21-23.

E palabra griego cu Pablo a usa na Efesionan 5:21, 22 ta implicá cu un hende ta someté su mes, no cu e ta ser forsá pa ta sumiso. I e sumision ta pa causa di Señor, no djis pa e armonia di e matrimonio. E congregacion ungí di Cristo ta someté su mes boluntariamente, gososamente na Cristo. Ora un esposa haci e mésun cos pa su esposo, e ora ei e matrimonio cu tur probabilidad lo ta felis i exitoso.

E Scritura ta declará tambe: “Laga cada [esposo] stima su esposa mescos cu su mes,” generosamente. (Efesionan 5:33; 1 Pedro 3:7) E esposo mester tene na mente cu e tambe mester ta sumiso na su cabes, pasobra Bijbel ta declará: “E cabes di tur homber ta Cristo.” Sí, e homber mester ta sumiso na e siñansanan di Cristo. Na su turno, Cristo ta sumiso na su cabes: “E cabes di e Cristo ta Dios.” Asina, tur, cu excepcion di Jehova tin un cabes. I asta e ta pega su mes na su propio leynan.—1 Corintionan 11:3; Tito 1:2; Hebreonan 6:18.

Sumision cristian ta balansá i ta beneficioso pa tur dos sexo. E ta trece den e matrimonio un armonia i contentamentu cu solamente nos amoroso Creador por percurá.—Filipensenan 4:7.