Kilimanjaro—E Dak di Africa

DJE CORESPONSAL DI SPIERTA! NA KENYA

SOLAMENTE 150 aña pasá, gran parti dje interior di Africa no tabata riba mapa. P’e mundu exterior, e continente grandi aki tabata inexplorá i misterioso. Entre e hopi cuentanan cu a sali for di Oost Africa, unu a parce particularmente straño p’e europeonan. Esei tabata un informe for dje misioneronan aleman, Johannes Rebmann i Johann L. Krapf, kendenan a declará cu na 1848 nan a mira cerca dje evenar un ceru asina haltu cu su top tabata blancu di sneu.

E cuenta cu tabatin un ceru cu capa di sneu den Africa tropical no solamente a ser ricibí cu duda, sino tambe cu mofa. Tog e relatonan tocante un ceru colosal a lanta e curiosidad i interes di geógrafo i exploradónan, i cu tempu nan a confirmá cu e informe dje misioneronan tabata cierto. En berdad tabatin un ceru volcánico cu capa di sneu na Oost Africa yamá Kilimanjaro. Segun algun pueblo esei ta nificá “Ceru di Grandesa.”

E “Dak” di Africa

Awe e gran Kilimanjaro ta famoso pa su bunitesa sobresaliente i su haltura impresionante. Poco ta e panoramanan cu ta mes pintoresco i memorabel cu esun di un trupa di olefante comiendo yerba, crusando e sabananan africano secu i yen di stof, i e imponente “Kili” cu su capa di sneu, surgiendo mahestuosamente leu den fondo.

Kilimanjaro ta e ceru mas haltu dje continente africano i ta entre e volcannan inactivo mas grandi di mundu. E ta na Tanzania, net pazuid di evenar i pegá cu e frontera di Kenya. Aki e tera a scupi mas cu cuater mil miyon meter cúbico di material volcánico, formando asina e ceru aki cu su topnan den nubia.

E tamaño inmenso dje ceru ta ser accentuá dor di su posicion isolá. Pará su so i leu di tur cos, e ta asendé for dje desierto di Masai, situá rond di 900 meter riba nivel di laman, te na un haltura colosal di 5.895 meter! Nada straño cu tin biaha hende a describí Kilimanjaro como e dak di Africa.

Nan a yama Kilimanjaro tambe “Ceru di Caravana,” pasobra, mescos cu un vuurtoren blancu i briyante, bo por a mira su áreanan grandi di ijs i gletsjernan for di cientos di kilometer den cualkier direccion. Den siglonan pasá hopi bes su top di sneu a guia e caravananan, cargá cu un gran cantidad di ivor, oro i esclabo cu a pasa dor dje mondinan di Africa.

Su Topnan Impresionante

Kilimanjaro ta consistí di dos cumbre volcánico. Kibo ta e top volcánico principal; su bunita forma di papureshi [katuchi] simétrico ta tapá cu un capa permanente di ijs i sneu. Oost di dje tin e di dos top cu yama Mawenzi, cu ta yega te na 5.354 meter haltu i e mes ta e di dos top mas haltu na Africa, despues di Kibo. Na contraste cu e baricanan di ceru di Kibo cu ta baha poco-poco, Mawenzi ta un top bunita tayá cu murayanan di baranca steil i skerpi cu ta sali na tur banda. E topnan di Kibo i Mawenzi ta conectá cu otro na un haltura di 4.600 meter dor di un sabana inmenso cu ta baha poco-poco, i tin barancanan plamá tur caminda. West di Kibo tin Shira, cu ta e restonan di un antiguo volcan cu a cai den otro i cu for di hopi tempu a gasta dor di bientu i awa, i cu awor ta forma un meseta bashí imponente di 4.000 meter riba nivel di laman.

Un Obra Maestro Ecológico

Kilimanjaro su ecosistema tin diferente zona definí dor di haltura, awaceru i vegetacion. E área mas abou di su barica ta cubrí cu selvanan tropical intacto, den cua trupanan di olefante i búfalo Cape ta cana rond. Vários especie di macacu ta biba haltu aya den e palunan dje selva, i tin biaha un bishitante por haña un vislumbre momentáneo di un antilop africano tímido i di duikerbok, cu masha fácil bo ta perde di bista den e vegetacion denso.

Pasando e selva bai mas haltu, ta bini e zona di heide. Palunan bieu i korkobá, trocí dor dje severidad di bientu i behes, tin drachinan di korstmos cologá na nan cu ta parce barbanan shinishi largu di pachi bieu. Aki e topnan di ceru ta habri for di otro, dunando lugá pa e gigantesco heide florecé. Meimei dje bòshinan di yerba tin aki i aya troshinan di flor color bibu, locual ta duna e campo un bunitesa pintoresco.

Mas haltu ainda, te caminda palu ta crece, nos ta haña e terenonan infértil i muhá. En bes di palu tin mata peculiar cu yama kruiskruid, cu ta alcansá un haltura di 4 meter. Tambe tin lobelia, cu ta parce kolo of alcachofa grandi. Rond dje barancanan i puntanan di baranca tin flornan eterno, cu ta parce hooi i ta secu ora mishi cu nan. Nan ta agregá un tiki color n’e paisahe cu, sin nan, lo tabata shinishi plateá so.

Bayendo mas haltu, terenonan infértil i muhá ta terminá i e zona alpino ta cuminsá. E tera ta di un color dòf, cu tononan maron scur i shinishi. Masha poco mata por crece den e ambiente secu i bashí aki. N’e punto aki, e dos topnan principal, Kibo i Mawenzi, ta conectá cu otro mediante un lomba grandi di tera cu ta un desierto na gran haltura, secu i yen di baranca. Temperaturanan ta extremo. Den dia por bira te cu 38° Celsius, i anochi e temperatura por baha bai te cu bastante grado bou di cero.

Finalmente nos ta alcansá e zona dje cumbre. Akinan e aire ta friu i puru. Cu e shelu blou scur den fondo, e gletsjernan i áreanan grandi di ijs ta mustra blancu i limpi, formando un bunita contraste cu e tera scur dje ceru. E aire tin poco oxígeno, casi mitar dje contenido cu ta haña riba nivel di laman. N’e top dje cumbre plat di Kibo tin e krater dje volcan, cu ta casi perfectamente rondó i tin un diameter di 2,5 kilometer. Den e krater, n’e curason mes dje ceru, tin un buracu gigantesco yen di shinishi. E ta midi mas cu 300 meter di rand pa rand i ta baha bai un 120 meter den e garganta dje volcan. For di buracunan chikitu, huma cayente di sulfur ta subi poco-poco bai den e aire friu, como testimonio dje disturbio cu ta tumando lugá te paden ayá den e gigante drumí na soño.

E tamaño i masa gigantesco di Kilimanjaro ta permitié crea su propio clima. Bientu húmedo cu ta supla for di Océano Indio, pasa over di yanonan semi árido, ta dal den e ceru i ta desviá bai haltu caminda e ta condensá i ta producí awaceru. Esaki ta haci cu e partinan mas abou dje barica ta fértil pa plantacionnan di kofi i cultivo cu ta sostené e hendenan cu ta biba rond dje pia di ceru.

Ta Logra Subi “Kili”

Hende cu ta biba den e sombra di Kilimanjaro tabata kere den e supersticion cu tabatin mal spiritu ta biba n’e barica di ceru i cu nan lo a causa daño na cualkier hende cu purba acercá su top tapá cu ijs. Esaki a haci cu e hendenan local nunca a purba yega su cumbre. Ta te na 1889, dos exploradó aleman a subi e ceru i a para riba e punta mas haltu na Africa. A logra subi e di dos top, Mawenzi, cu ta técnicamente mas difícil pa subi, te na 1912.

Awe, cualkier hende cu tin bon salú por biba e experencia di subi Kilimanjaro i esei ta bastante popular cerca esnan cu ta bin bishitá Oost Africa. E autoridadnan di Tanzania encargá cu e cuido di e parke tin areglonan bon organisá pa esnan cu ta deseá di subi e ceru. Por huur paña i ekipo. Tin cargadó i guianan entrená disponibel, i vários posada ta ofrecé acomodacion confortabel for dje cuminsamentu te n’e fin dje expedicion. Riba e ceru tin cabañanan bon trahá na diferente haltura, cu ta duna e subidó un dak i lugá di drumi.

Ta impresionante pa mira Kilimanjaro personalmente, i e ta poné bo para pensa. Mesora bo mester bai di acuerdo cu e palabranan cu ta bisa di Dios: “E ta estableciendo e cerunan firmemente cu su poder.” (Salmo 65:6) Sí, haltu i su so riba Africa, Kilimanjaro ta pará como un testimonio sublime dje poder dje Magnífico Creador.

[Mapa na página 16]

(For fully formatted text, see publication)

AFRICA

Kenya

KILIMANJARO

Tanzania