Kico Tin den Futuro pa Hende Muher?

“HISTORIA di humanidad ta un historia di frecuente daño i usurpacion di parti di hende homber contra hende muher.” Asina e Declaracion di Opinionnan di Seneca Falls, New York, ta bisa, skirbí 150 aña pasá na Merca como protesta contra inhusticia na hende muher.

Sin duda tabatin progreso desde e tempu ei, pero segun The World’s Women 1995, publicá dor di Nacionnan Uní, ainda tin un caminda largu pa cana. “Demasiado biaha, hende muher i hende homber ta biba den mundunan distinto,” e ta bisa, “den cua hende muher no tin e mésun posibilidadnan pa loke ta educacion, oportunidad di trabou, i salú, siguridad personal i tempu liber.”

Mas concientisacion riba esaki a pone cu nacionnan a pasa leynan pa protehá e derechonan di hende muher. Pero ley no por cambia curason, unda e rais di inhusticia i prehuicio ta sinta. Tuma, por ehempel, e situacion deplorabel di mucha muhernan prostituta. Dje bergwensa internacional aki Newsweek a bisa: “Leynan cu tin e propósito di stop explotacion sexual di mucha tin tur bon intencion, pero hopi bes nan ta ineficas.” Mescos tambe, ley riba su mes no ta prevení violencia. “Evidencia ta revelá cu violencia contra hende muher ta un problema prevalente rond mundu,” Human Development Report 1995 ta declará. “Mayoria ley ta inadecuá pa stop violencia asina—a ménos cu bin cambio den e balornan cultural i social actual.”—Letternan cursivo di nos.

Hopi bes “balornan cultural i social” ta basá riba tradicion cu tin rais profundo—un cos masha difícil pa cambia. “Tradicion ta pone hende homber kere cu mester usa hende muher mas bien cu stima nan, cu mester pone nan traha en bes di cuida nan,” un señora di Medio Oriente ta bisa. “Como resultado, hende muher no tin nada di bisa, no tin derecho, i e tin masha poco chens pa mehorá su situacion.”

Educando Esposo i Tatanan

E Plataforma pa Accion, proponé na Beijing, China, dor di un conferencia mundial riba hende muher na 1995, a declará cu solamente “accion inmediato i uní di parti di tur” por logra un “mundu humano pacífico i hustu” den cua hende muher lo ser respetá.

Cualkier accion pa haci bida di hende muher mas ‘humano, pacífico i hustu’ tin cu cuminsá na cas, cerca e esposo i tatanan. Relacioná cu esaki, Testigonan di Jehova ta convencí cu educacion bíblico ta e clave pa éxito. Nan a mira cu una bes hende homber siña cu Dios ta verwagt pa nan trata nan casá i yu muhernan cu respet i consideracion, nan ta tuma esei na pechu i ta hacié.

Na Africa Central, Pedro, un homber casá cu cuater yu, ta masha atento awor n’e necesidadnan di su casá. E ta yud’é cuida e yunan, i ta asta sirbi e cuminda ora bishita bin come cerca su famia. Un actitud asina di consideracion ta leu di normal den su pais. Kico ta pon’é apreciá su casá i cooperá cuné?

“Ora mi a cuminsá studia Bijbel, mi a siña dos principio importante relacioná cu e papel di esposo,” Pedro ta splica. “Nan tabatin un impacto grandi riba e manera cu mi ta mira mi casá. E promé, hañá na 1 Pedro 3:7, ta splica cu un esposo mester mustra su casá onor manera na e “wea mas débil, esun femenino.” E di dos, hañá na Efesionan 5:28, 29, ta bisa cu un esposo mester trata su casá ‘mescos cu su mes curpa.’ Desde cu mi a sigui e conseho ei, nos a hala mas cerca di otro. Pues, nos, hombernan, mester duna mas balor na Dios su conseho cu na custumbernan local.”

Michael, di West Africa, ta admití cu, promé cu el a cuminsá studia Bijbel cu Testigonan, e no a trata su casá bon. “Asta mi tabata sa dal e ora mi rabia,” e ta confesá. “Pero Bijbel a siñá mi cu mi mester cambia mi manera. Awor mi ta haci hopi esfuerso pa controlá mi genio i stima mi casá mescos cu mi mes curpa. I nos tur dos ta hopi mas felis.” (Colosensenan 3:9, 10, 19) Su casá, Comfort, ta di acuerdo: “Awor Michael ta tratá mi cu mas respet i cariño cu ta e custumber di mayoria esposo den nos comunidad. Nos por papia di nos problemanan i traha huntu manera un tim.”

Pedro i Michael a siña apreciá i respetá nan casá pasobra nan a tuma na pechu e instruccionnan for dje Palabra di Dios, cu ta mustra bon cla cu inhusticia na hende muher ta desagradá nos Creador masha tantu mes.

Dios Su Interes Profundo pa Hende Muher

Semper Dios tabatin interes intenso den hende muher i nan bienestar. Maske el a bisa nos promé mayornan cu pa motibu di nan rebelion, imperfeccion lo pone cu hende muher lo ser “dominá,” esaki nunca tabata Dios su propósito. (Génesis 3:16) El a crea Eva como “un complemento” di Adam i como un compañera p’e. (Génesis 2:18) Den e Ley di Moises, duná na Israel di antigwedad, Jehova a condená specíficamente e maltrato di biudanan i a instruí e israelitanan pa trata nan cu bondad i pa yuda nan.—Exodo 22:22; Deuteronomio 14:28, 29; 24:17-22.

Jesus, imitando su Tata celestial, no a sigui e tradicion prevalente di su dia cu a menospreciá hende muher. El a papia bondadosamente cu hende muher—asta cu esnan cu tabatin mal reputacion. (Lucas 7:44-50) Ademas, Jesus tabata contentu pa yuda hende muher cu tabatin problema cu salú. (Lucas 8:43-48) Na un ocasion, ora el a mira un biuda lamentá e morto recien di su único yu, el a bai unbes na e procesion di entiero i a resucitá e yoncuman.—Lucas 7:11-15.

Tabatin hende muher entre e promé disipelnan di Jesus i nan tabata e promé testigonan di su resureccion. Bijbel ta papia bon di muhernan manera Lidia, Dórcas i Prisca como ehempelnan di hospitalidad, compasion i curashi. (Echonan 9:36-41; 16:14, 15; Romanonan 16:3, 4) I a siña cristiannan di promé pa mustra respet na hende muher. Apostel Pablo a bisa su compañero misionero Timoteo pa trata “hende muher di mas edad manera mama, hende muher mas hóben manera ruman cu tur puresa.”—1 Timoteo 5:2.

Hende Muher Cu A Haña Respet

Si bo ta un homber cristian, lo bo mustra e mésun respet ei na hende muher. Nunca lo bo usa tradicion como excuus pa maltratá nan. Ademas, trata hende muher cu respet por duna un testimonio elocuente di bo fe. (Mateo 5:16) Salima, un muher hóben di Africa, ta describí con el a beneficiá dor di observá principionan cristian den accion.

“Mi a lanta den un ambiente caminda hende muher i mucha muher a ser tratá malu. Mi mama tabata traha 16 ora pa dia, pero tur loke el a haña ta keho si algu a keda sin haci. Loke tabata mas pió ta cu mi tata, ora e bebe di mas, tabata dal e. Otro hende muher den nos área tambe a sufri asina. Pero mi tabata sa cu un trato asina no tabata bon, cu e tabata yena nos bida cu frustracion i infelicidad. No obstante, a parce cu no tabatin manera pa cambia e situacion aki.

Pero ora mi tabata tiener, mi a cuminsá studia Bijbel cu Testigonan di Jehova. Mi a keda mashá impresioná ora mi a lesa e palabranan di apostel Pedro, cu a bisa cu hende muher mester ser tratá cu onor. Pero mi a pensa: ‘Ta masha improbabel cu hende lo aplicá e conseho aki, specialmente en bista di nos tradicion local.’

Sin embargo, ora mi a bai Salon di Reino, unda e Testigonan tin nan reunionnan, tantu hende homber como hende muher a tratá mi bon. Asta mas sorprendente ainda tabata cu e esposonan entre nan tabata ègt soru pa nan casá. Segun cu mi a conocé nan mas mihó, mi a realisá cu esaki tabata loke a ser verwagt di tur Testigo. Aunke algun dje hombernan tabatin un antecedente manera di mi, nan tabata trata hende muher awor cu respet. Mi a deseá di pertenecé na e famia grandi aki.”

Un Solucion Permanente

E respet cu Salima a observá no tabata un casualidad. E tabata e resultado di un programa di educacion, basá riba e Palabra di Dios, cu ta yuda hende apreciá otro manera Dios ta haci. Esaki ta un indicacion di loke por logra asta awor i di loke lo ser hací na tur parti ora e Reino di Dios ta goberná riba tur e tera. (Daniel 2:44; Mateo 6:10) E gobiernu celestial aki lo eliminá tur inhusticia. Bijbel ta sigurá nos: “Ora tin huicio for di bo [Jehova] pa e tera, husticia ta loke e habitantenan dje tera productivo siguramente lo siña.”—Isaías 26:9.

Asta awor, miyones di hende ta cambiando nan manera di pensa dor cu nan ta siña tocante husticia. Ora tur hende na bida ta sumiso na e Reino di Dios, e educacion aki lo sigui mundialmente i lo caba cu homber su trato opresivo di hende muher, un consecuencia di Adam su picá. Jesucristo, Dios su Rey nombrá, lo no permití inhusticia contra hende muher mancha su reinado. Describiendo e reinado di Cristo, Bijbel ta bisa: “Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba. For di opresion i for di violencia lo e rescatá nan alma.”—Salmo 72:12-14.

E seri di artículo aki a concentrá riba e problemanan di hende muher. Sin embargo, nos ta reconocé cu hopi hende homber tambe a ser tratá malu. Atrabes di historia hombernan poderoso i malbado a cometé cosnan horibel tantu contra hende homber como contra hende muher. I algun hende muher a haci mescos. Por ehempel, Bijbel ta mencioná dramamentu di sanger di parti di muhernan malbado manera Jezabel, Atalia i Herodías.—1 Reynan 18:4, 13; 2 Crónicanan 22:10-12; Mateo 14:1-11.

Pues, ta henter humanidad tin mester di Dios su mundu nobo, bou di su gobernacion di Reino. Pronto, ora e dia ei yega, nunca mas hende muher ni hende homber lo ser discriminá ni tratá malu atrobe. En bes di esei, tur dia lo ta un di “deleite exkisito” pa tur hende.—Salmo 37:11.

[Plachi na página 13]

Esposonan cristian ta sigui instruccionnan bíblico i ta respetá i onra nan casá