Ylang-Ylang—Esencia for dje Isla di Perfume

DJE CORESPONSAL DI SPIERTA! NA MAYOTTE

BO A yega di tende di dje? Casi sigur bo a us’é. Por lo ménos bo mester a hol’é! Kico e ta? Wel, e ta tantu un palu como un perfume.

Ylang-ylang (pronunciacion: ilan-ílan) ta un palu cu ta producí un esencia usá den perfumenan luhoso. Algun hende ta bisa cu el a originá dje isla di Madagascar. Otronan ta bisa cu ta di Malasia el a bin, unda e ta ser cultivá tambe. Pero aki na Islanan Comóros, entre Africa i Madagascar, i foral riba e isla di Mayotte, e clima ta net bon pa producí un esencia di perfume di un calidad sublime. Segun algun hende, e ta esun mihó na mundu.

Mayotte, tin biaha yamá e isla di perfume, ta producí un gran porcentahe dje total dje produccion mundial dje esencia precioso aki. E plantacionnan di ylang-ylang ta cubri e camponan i barica dje ceritunan dje isla bunita aki. Pero e promé cos cu bo ta ripará ta e forma grotesco dje palunan. Ta parce manera ta un man gigante a manda e takinan abou i a lora nan rond dje troncon trocí color shinishi cla. Pero esaki no ta su forma natural. E ta asina dor di manipulacion sistemático.

Asina cu e palu di ylang-ylang yega na haltura di scouder, ora por yega fácilmente ainda n’e flornan, ta forsa e takinan manda abou. Si no hacié, e palu ta crece bai haltu, stret ariba, i ta hiba e flornan precioso muchu haltu pa piki fácilmente. E ora ei e palu ta sirbi pa construccion of pa carbon so.

Asta promé cu bo por distinguí e palu di ylang-ylang for dje resto di matanan tropical rond di dje, su holó penetrante ta hala bo atencion. Aunke su flornan no ta hopi bunita, nan perfume fuerte ta inolvidabel. Eigenlijk, si bo no ta custumbrá di wak nan, bo no ta mira e flornan unbes, ya cu casi bo no por distinguí nan for dje blachinan. Ta te ora cu e flornan hecha, nan ta haña un color geel suave. I ora esei sosodé, ta tempu pa piki nan.

Riba nos isla tropical, e palu di ylang-ylang ta cuminsá saca flor na edad di dos of tres aña. E abundancia di su flornan ta un ehempel maraviyoso dje generosidad dje Creador! Entre mei i december, pikidónan ta kita un pa dos kilo di flor for di cada palu, cada 15 dia. E palunan ta duna flor entre januari i april tambe, pero esakinan ta daña dor dje yobidanan tropical.

Ora di piki flor, henter famia ta duna un man, specialmente e muher i muchanan. Ta fácil pa piki e flornan, ya cu e takinan ta abou. Nan ta pone e flornan den un kangas, e término local pa un macutu grandi trahá di rama di coco di flegtu. Bo por imaginá bo un mucha ta carga un kangas flexibel yen di flor riba su cabes? Ta parce cu e masa di 20 pa 30 kilo di flor ta tapa henter e cabes chikitu dje mucha segun cu e i otronan ta cana tras di otro cant’i caminda pa bai n’e lugá unda lo destilá e esencia for di nan.

Awor e trabou intensivo pa destilá e esencia, loke ta tuma 24 ora, ta cuminsá. Bou di un enorme alambic, of wea pa destilá, tin un candela cendí continuamente. Den e alambic tin 200 kilo di flor hechu ta drif den 70 liter di awa herebé. Mester fria e tubu di destilacion n’e temperatura exacto pa e esencia sali dje mihó calidad. For dje cantidad di flor aki por extraé un liter di esencia altamente concentrá. E cantidad exacto ta dependé dje region di unda e flornan ta bini. For dje mésun líkido herebé, por extraé mas esencia di un concentracion mas abou. Por último, ta exportá e esencia pa Europa pa ser usá den perfumenan luhoso.

Kisas awor bo ta comprendé di con ta yama e isla di Mayotte e isla di perfume. Sí, e dushi fragancia di ylang-ylang den e aire di nos isla ta aumentá nos aprecio p’e obra di man dje Creador.

[Maps na página 10]

AFRICA

MADAGASCAR

ISLANAN COMOROS

Gran Comóros

Mohéli

Anjouan

Mayotte

[Plachi na página 10]

Flor di ylang-ylang

[Plachinan na página 11]

Plantacion di palu di ylang-ylang