Keda Kontentu Ku Loke Bo Tin I sea Generoso

BO NO A RIPARÁ KU HENDE TA MIDI FELISIDAT I ÉKSITO A BASE DI PLAKA I KOS MATERIAL? Miónes di hende ku tin e punto di bista ei, ta traha mata kurpa pa hopi ora largu pa nan gana mas plaka. Pero akaso plaka i kos material ta hasi hende berdaderamente felis? Ban wak si esei ta bèrdat.

Segun e revista Journal of Happiness Studies, unabes ku nos nesesidatnan básiko ta kubrí, mas entrada lo no hasi nos mas felis ni pone nos sinti mas mihó. Un artíkulo den e revista Monitor on Psychology ta bisa ku plaka mes no ta e problema, “ta korementu tras di plaka ta hasi hende infelis.” E palabranan ei ta kuadra ku e siguiente konseho ku Beibel a duna kasi dos mil aña pasa: “Amor pa plaka ta rais di tur sorto di kos perhudisial, i algun hende ku a kai pa e amor akí . . . a kousa nan mes hopi doló.” (1 Timoteo 6:9, 10) Kiko ta algun di e dolónan ei ku hende por pasa aden?

NAN TA PREOKUPÁ I PÈRDÈ SOÑO PASOBRA NAN MESTER PROTEHÁ NAN RIKESA. “Soño di e hòmber trahadó ta dushi, sea ku e ta kome poko òf hopi. Ma barika-yen [òf, “e abundansia,” NW] di e hòmber riku no ta lag’é drumi.”—Eklesiástes 5:12.

NAN TA KEDA DESEPSHONÁ ORA NAN NO LOGRA HAÑA E FELISIDAT KU NAN A SPERA DI HAÑA. Un di e motibunan ku nan ta sinti nan desepshoná ta pasobra e deseo pa haña mas plaka ta un deseo ku no por ser satisfasé. “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.” (Eklesiástes 5:10) Ademas, e deseo pa plaka por pone un hende sakrifiká loke ta hopi importante, manera pasa tempu ku su famia i amigunan òf dediká tempu na Dios.

NAN TA SINTI DUELE I FRUSTRASHON ORA PLAKA PÈRDÈ BALOR ÒF INVERSHON BAI MALU. “No kansa bo kurpa pa rikesa; stòp di preokupá pa esei. Ora bo pone bo bista riba dje, e no t’ei mas. Pasobra rikesa siguramente ta kria ala pa su mes, manera un águila ku ta bula bai.”—Proverbionan 23:4, 5.

KEDA KONTENTU KU LOKE BO TIN. “Nos no a bini ku nada na mundu, i nos no por bai ku nada tampoko. Pues, si nos tin kuminda, paña i un dak riba nos kabes, nos lo keda kontentu ku e kosnan akí.” (1 Timoteo 6:7, 8) Por lo general, hende ku ta kontentu ku loke nan tin no ta keha i nan aktitut ta yuda nan pa no envidiá otro hende. I komo ku nan no ke gasta mas di loke nan por afòrt, nan ta evitá hopi preokupashon i strès.

GENEROSIDAT. “Tin mas felisidat den duna ku den risibí.” (Echonan 20:35) Hende generoso ta felis pasobra nan gusta hasi otro hende felis. I asta ora nan no tin hopi pa duna, nan ta duna un tiki di nan tempu i energia. Hopi biaha, nan ta haña loke plaka no por kumpra: hopi amor, rèspèt i bon amigu, kendenan, na nan turno, tambe ta duna generosamente.—Lukas 6:38.

PONE HENDE PROMÉ KU KOS MATERIAL. “Mihó un tayó di bèrdura kaminda tin amor, ku un toro gòrdá i odio huntu kuné.” (Proverbionan 15:17) Kiko esei ke men? Mihó bo tin bon amigu ku ta stima bo en bes di hopi kos material. I amor, manera nos lo mira despues den e revista akí, ta sumamente importante pa un hende por ta felis.

Sabina, un señora di Suramérika a siña kon balioso prinsipio di Beibel ta. Sabina su esposo a bai lag’é, i Sabina tabata lucha pa gana su pan di kada dia pa kria su mes i su dos yu muhénan. E tabatin dos trabou i tur dia e tabata lanta 4 or di mardugá. Aunke ku e tabata keda morto kansá, tòg el a disidí di studia Beibel. Kiko tabata e resultado?

Sabina su situashon ekonómiko no a kambia, pero su aktitut sí. Por ehèmpel, el a haña e felisidat ku un hende ta sinti ora nan ta konsiente ku nan tin mester di Dios. (Mateo 5:3) Ademas, Sabina a haña bon amigu entre e pueblo di Dios. I el a eksperensiá e felisidat di kompartí loke el a siña ku otro hende.

Beibel ta bisa: “Sabiduria ta demostrá pa medio di su obranan ku e ta hustu.” (Mateo 11:19) Pues, nos lo tin bon resultado si nos keda kontentu ku loke nos tin i si nos ta generoso. Kòrda tambe ku hende ta mas importante ku kos material.