Pakiko Bo Por Konfia e Beibel

Algun hende ta bisa ku e Beibel ta inkonfiabel, i nan opinion a gana akseptashon amplio. Pues awe, hopi hende ta deskartá loke e Beibel ta bisa komo algu inkonfiabel.

N’e otro banda, loke Jesus Cristo a bisa den orashon na Dios ta promové konfiansa: “Bo palabra ta e berdat.” I e Beibel mes ta afirmá di ta inspirá pa Dios.—Juan 17:17; 2 Timoteo 3:16.

Kiko bo ta pensa di esaki? Ta eksistí un base sólido pa konfia e Beibel? Of realmente tin evidensia ku e Beibel ta inkonfiabel, ku e ta kontradesí su mes i ta inkonsistente?

E Beibel ta kontradesí su mes?

Ounke algun hende ta afirmá ku e Beibel ta kontradesí su mes, kualke hende a yega di mustra bo un ehèmpel konkreto? Nos nunka a mira un ku a keda pará despues di tabata skudriñá. Ta berdat ku por parse di eksistí diskrepansia den sierto relato bíbliko. Pero, generalmente, e problema ta sinta den un falta di konosementu di detayenan i sirkunstansianan dje époka.

Por ehèmpel, algun hende lo hala bo atenshon riba loke nan ta konsiderá un diskrepansia den e Beibel, puntrando: ‘Unda Kain a haña su kasá?’ Nan ta suponé ku Kain i Abel tabata e úniko yunan di Adam i Eva. Pero e suposishon ta basá riba un malkomprendimentu di loke e Beibel ta bisa. E Beibel ta splika ku Adam “a bira tata di yu hòmber i muhernan.” (Génesis 5:4) Pues, Kain a kasa ku un di su ruman muhernan o posiblemente ku un subrina.

Hopi bia e krítikonan ta buska nada mas ku kontradikshon i asina por bisa: ‘E skirbidó bíbliko Mateo ta bisa ku un ofisial di ehérsito a bin pidi Jesus un fabor, mientras Lukas ta bisa ku ta representantenan a ser mandá pa pidi. Kua di nan ta korekto?’ (Mateo 8:5, 6; Lukas 7:2, 3) Pero ta trata aki realmente di un kontradikshon?

Ora e aktividat of trabou di hende ta ser atribuí na esun kende en realidat ta responsabel p’e, un persona rasonabel no ta pretendé ku tin un diskrepansia. Por ehèmpel, bo ta konsiderá un informe komo eróneo ora e bisa ku un alkalde a traha un kaya, maske e trabou mes a ser hasí pa su ingeniero i trahadornan? Naturalmente ku no! Meskos tambe, no ta inkonsistente pa Mateo bisa ku e ofisial di ehérsito a hasi un petishon na Jesus pero, manera Lukas ta skirbi, tal petishon a ser hasí mediante sierto representantenan.

Segun ku mas detaye ta sali na kla, e aparente diskrepansianan den e Beibel ta disparsé.

Historia i Siensia

Den pasado hopi a duda den e eksaktitut históriko dje Beibel. Por ehèmpel, krítikonan a kuestioná e eksistensia di tal personahenan bíbliko manera Rei Sargon di Asiria, Belsasar di Babilonia, i e gobernador romano Pontio Pilato. Pero deskubrimentunan resiente a verifiká un relato bíbliko tras di otro. Pues e historiador Moshe Pearlman a skirbi: “Diripiente, e sképtikonan ku a duda asta den e outentisidat dje partinan históriko dje Testament Bieu a kuminsá rektifiká nan punto di bista.”

Si nos mester konfia e Beibel, tambe e mester ta eksakto den loke ta toka siensia. E ta? No muchu tempu pasá, sientífikonan, kontradisiendo e Beibel, a afirmá ku e universo no tabatin prinsipio. Sinembargo, resientemente e astrónomo Robert Jastrow a referí na informashon mas nobo ku ta refutá esaki, splikando: “Awor nos ta mira kon evidensia astronómiko ta hiba na e punto di bista bíbliko dje origen dje mundu. E detayenan ta diferensiá, pero e elementonan esensial den e relato astronómiko i esun bíbliko di Genesis ta meskos.”—Génesis 1:1.

Tambe hende a kambia nan punto di bista relashoná ku e forma dje tera. The World Book Encyclopedia ta splika ku “e biahenan di deskubrimentu a demonstrá ku e mundu tabata rondó, no plat manera mayoria di hende a kere.” Pero e Beibel tabata korekto for di prinsipio! Mas ku 2000 aña promé ku tal biahenan, e Beibel a bisa na Isaias 40:22: “Tin Un ku ta biba mas haltu ku e sírkulo dje tera,” of manera otro tradukshon ta bisa, “e globo dje tera” (Douay), “e tera rondó.” (Moffatt)

Pues, mas hende siña, mas grandi ta e evidensia ku e Beibel por ta konfiá. Un èks-direktor dje Museo Britániko, Sir Frederic Kenyon, a skirbi: “E resultadonan ku a ser lográ kaba ta konfirmá loke fe lo sugerí, esta ku e Beibel no por hasi otro sino gana di un oumento di konosementu.”

Predisiendo e futuru

Pero nos realmente por konfia e predikshonnan bíbliko p’e futuru, inkluyendo su promesanan di un ‘hustu shelu nobo i tera nobo’? (2 Pedro 3:13; Revelashon 21:3, 4) Wèl, kiko tabata e Beibel su registro di konfiabilidat den pasado? Bes tras bes, profesianan duná asta sientos di aña delantá a haña kumplimentu den detayenan eksakto!

Por ehèmpel, e Beibel a predisí e tumbamentu di poderoso Babilonia kasi 200 aña promé ku e la sosodé. De fakto, e Medonan, kendenan a bira aliado dje Persianonan, a ser nombrá komo e konkistadornan. I ounke Siro, e rei Persiano, no a nase mes ainda, e Beibel a predisí ku e lo a bira prominente den e konkista. E la bisa ku Babilonia su awanan protektor, e riu Eufrates, “mester seka” i ku “e portanan [di Babilonia] lo no ser será.”—Jeremias 50:38; Isaias 13:17-19; 44:27–45:1.

E detayenan spesífiko ei tabata kumplí, manera e historiador Herodito a informá. Ademas, e Beibel a predisí ku Babilonia lo bira ruinanan inhabitá eventualmente. I esei ta nèt loke a sosodé. Awe Babilonia ta un monton di tera desolá. (Isaias 13:20-22; Jeremias 51:37, 41-43) I e Beibel ta yen di otro profesianan ku a haña kumplimentu dramátiko.

Kiko anto, e Beibel ta predisí tokante e sistema di kosnan aktual? E ta bisa: “E era final dje mundu aki lo ta un tempu di difikultat. Hende lo no stima nada otro ku plaka i nan mes; nan lo ta arogante, halsá i kalumniador; sin rèspèt pa mayornan, ingrato, sin piedat, sin afekto natural . . . Nan lo ta hende ku ta pone plaser den lugá di Dios, hende ku ta konservá e forma djafó di religion, pero ta nenga su realidat.”—2 Timoteo 3:1-5, The New English Bible.

Siguramente nos ta mirando kumplimentu di esaki awor! Pero tambe e Beibel ta predisí lo siguiente pa “e era final dje mundu aki”: “Nashon lo lanta kontra nashon i reino kontra reino i lo tin skarsedat di kuminda.” Huntu ku esei, “lo tin temblor grandi, i den un lugá tras di otro pèst.”—Mateo 24:7; Lukas 21:11.

En berdat, profesianan di Beibel ta hañando nan kumplimentu awe! Bon, anto kiko dje promesanan ainda pa ser kumplí, tal komo: “E hustunan mes lo tene e tera den nan poder, i nan lo biba riba dje pa semper,” i “Nan lo tin ku bati nan spada na plug . . . , ni nan lo no siña di guera mas”?—Salmo 37:29; Isaias 2:4.

‘Esei ta demasiado bon pa ta berdat,’ algun hende por bisa. Pero realmente, no tin motibu pa nos duda nada di loke nos Kreador primintí. Su Palabra ta digno di konfiansa! (Tito 1:2) Dor di eksaminá e evidensia mas aleu, lo bo keda muchu mas konvensí di esaki.

Amenos ku lo kontrario ta ser indiká, tur e sitanan bíbliko ta tumá dje Tradukshon di Mundu Nobo dje Skrituranan Santu.

[Komentario na página 4]

“E resultadonan ku a ser lográ kaba ta konfirmá loke fe lo sugerí, esta ku e Beibel no por hasi otro sino gana for di un oumento di konosementu.”