Capítulo 23

Kico di relacion sexual promé cu casamento?

‘ESEI no ta bon, si boso ta stima otro? Of, boso mester spera te cu boso a casa?’ ‘Mi ta birgen ainda. Algo ta faltámi?’ Pregunta manera esei ta abunda den hovenan.

No obstante, “Hovenan cu no a tene relacion sexual durante cu nan ta tiener ainda ta un excepcion,” segun e Instituto di Alan Guttmacher den su informe di 1981. “Ocho di cada 10 hoven i siete di cada 10 hovencita a admiti cu nan a tene relacion sexual durante cu nan tabata tiener.”

Bo por puntra, ‘I pakico no?’ Foral ta solamente natural pa bo kier pa hende stimábo. I ora bo ta hoven, bo pasion por ta asina fuerte cu e ta dominábo. Además, bo ta bao di influencia di otro hoven. Nan por bisábo cu relacion sexual promé cu casamento ta un gozo; cu ora bo realmente ta gusta un hende, ta solamente natural pa bo deseá di ser íntimo. Algun por asta bisa cu relacion sexual ta duna prueba cu bo ta homber of muher. Ya cu bo no kier pa nan kere cu bo ta straño, pues, bo por sintíbo bao di presion di experimenta relacion sexual.

Sin embargo, contrario cu opinion popular, tur hoven no tin purá pa bandona nan birginidad. Por ehempel, considera un jufrow yamá Ester. E tabata haya chequeo médico ora e docter a puntra rutinariamente: “Ki clase di contraceptivo bo ta usa?” Ora Ester a contesta, “Mi no ta usa ningun,” e docter a sclama: “Kico! bo kier sali den estado? Con bo ta spera di no sali den estado si bo no ta usa nada?” Ester a contesta: “Pasobra mi no ta tene relacion sexual!”

E docter a waké cu incredulidad. El a bisa: “Esei ta increíbel. Muchanan ta bini aki di 13 aña di edad, i nan no ta birgen mas. Bo ta un persona extraordinario.”

Kico a haci Ester “extraordinario”? El a obedece e mandamento bíblico: “Awor e curpa no ta pa fornicacion [incluyendo relacion sexual promé cu casamento] . . . Hui di fornicacion.” (1 Corintio 6:​13, 18) Sí, Ester a reconoce cu relacion sexual promé cu casamento ta un picá serio contra Dios! Segun 1 Tesalonicense 4:3: “Esaki ta e boluntad di Dios, pa boso abstene boso di fornicacion.” Pero, pakico e Bijbel ta taha relacion sexual promé cu casamento?

Efecto despues

Relacion sexual promé cu casamento tabata común asta den tempo bíblico. Un muher inmoral a invita un hoven pa tene relacion, bisando: “Bam, láganos saciános bebiendo di amor te madrugá; sí, bam goza di otro cu expresion di amor.” (Proverbio 7:18) Sin embargo, e Bijbel ta duna e spiertamento di cu placer cu hende ta goza awe por causa dolor mañan. “Pasobra mescos cu was di stropi di abeha, lip di muher straño ta sigi goteá, i campana di su boca ta mas suave cu azeta,” segun Salomón. “Pero,” el a sigi, “efecto di dje despues ta tanto amarga como absintio; i ta tanto skerpi como spada di dos fila.”​—Proverbio 5:​3, 4.

Un posible efecto despues ta contagiamento di maleza transmiti sexualmente. Imaginábo e dolor di curazón si añanan despues bo ta descubri cu un experencia sexual ta causa daño incurable, kizás infertilidad of un problema serio di salud! Manera Proverbio 5:11 ta adverti: “Bo tin cu keha lastimosamente den bo futuro ora bo carni i bo organismo ta yega nan fin.” Relacion sexual promé cu casamento també ta resulta den yiu djafó (mira bladji 184, 185), aborto, i casamento prematuro​—cada un cu su consecuencia doloroso. Sí, hende cu ta practica relacion sexual promé cu casamento berdaderamente ‘ta peca contra nan mes curpa.’​—1 Corintio 6:18.

Reconociendo tal peliger, Dr. Richard Lee a skirbi den Yale Journal of Biology and Medicine: “Nos ta gaba dilanti nos hovenan tocante nos gran progreso preveniendo embarazo i tratando cu maleza venérea sin haci caso dje preventivo di mas confiabel i específico, loke ta menos costoso i venenoso, tanto di embarazo como di maleza venérea​—e antigua, i onorabel, i asta saludable estado di birginidad.”

Culpa i desilusion

Hopi hoven ta haya cu relacion sexual promé cu casamento ta un desilusion amarga. Cu ki resultado? Sintimento di culpa i respet propio menguante. Dennis di bintitres aña di edad a lamanta: “Esei tabata un gran desilusion​—ningun sintimento di bon ni calor di amor como debe ser. Mas bien e plena realizacion di ki malu e acto tabata a dalmi. Mi a sintími totalmente bergonzá di mi falta di dominio propio.” Un jufrow a confesa: “Mi a bolbe na realidad di golpi locual a hacími malu. . . . E fiesta a caba i mi a sintími malu, barata, i fies. Mi no a sintími mihor ora mi a tendé puntra, ‘Pakico di tur manera bo no a frena cosnan promé cu nan a bai mucho leu?’ ”

Tal reaccion no ta raro, segun Dr. Jay Segal. Despues di a studia e actividad sexual di 2.436 alumno di colegio, el a conclui: “E promé experencia [di relacion sexual] cu no a satisface i cu a desilusioná a surpasa experencia cu a satisface i cu tabata excitante na razón di casi dos pa uno. Tanto mucha homber como mucha muher a corda cu nan a keda mashá desilusioná.” Ta cierto cu asta pareha casá aveces por tin dificultad den relacion sexual. Pero unda cu tin berdadero amor i compromiso den matrimonio, generalmente tal problema por ta solucioná.

E prijs di inmoralidad

Algun hoven no ta sinti ningun culpa cualkiera teniendo relacion sexual i ta busca satisfaccion sexual cueste loke cueste, buscando relacion sexual cu un variedad di compañé. Investigador Robert Sorensen, den su investigacion sobresaliente di sexualidad di tiener, a bisa cu hovenan asina ta paga un prijs pa nan inmoralidad. Sorensen a skirbi: “Den entrevista personal, hopi [hoven inmoral] . . . a revela cu nan ta kere cu nan ta funciona cu poco propósito i contentamento propio.” Cuarentiseis porciento di eseinan tabata di acuerdo cu e declaracion, “Mi moda di biba awor aki, mayor parti di mi potencial ta bai perdí.” Sorensen a descubri també cu tal hovenan inmoral a informa di poco “confianza propio i respet propio.”

Ta net manera Proverbio 5:9 ta bisa: Esnan practicando inmoralidad “ta duna [nan] dignidad na otronan.”

Su mañan

Despues cu pareha ta tene relacion sexual, hopi bez nan ta mira otro na moda diferente. E mucha homber por haya cu su sintimento pe mucha muher no ta tanto intenso como na antes; e asta por hayé menos atractivo. En cambio, e mucha muher por sintié explotá. Corda e relato bíblico dje hoven Amnon i con e tabata malu di amor pe birgen Tamar. Pero, despues di a tene relacion sexual cuné, “Amnon a cuminza odié cu un odio mashá grandi.”​—2 Samuel 13:15.

Un mucha muher yamá María tabatin un experencia similar. Despues di a tene relacion sexual, el a admiti: “Mi a odia mi mes (pa mi debilidad), i mi a odia mi mucha homber. Realmente, e relacion sexual cu nos a kere lo trece nos mas cerca otro a termina nos relacion. Mi ni sikiera kier a miré atrobé.” Sí, door di tene relacion sexual promé cu casamento, un pareha ta bai mucho leu i no por bolbe nunca!

Paul H. Landis, un investigador respetá den e campo di bida di famía, a bisa: “E efecto temporario di [relacion sexual promé cu casamento] por ta pa fortalece nan relacion, pero efecto di largu plazo por ta basta diferente.” En berdad, pareha cu ta tene relacion sexual tin mas tendencia di separa cu pareha cu ta abstene! Pa ki motibo? Relacion sexual inmoral ta cria jaluz i falta di confianza. Un hoven a admiti: “Algun mucha homber, despues di a tene relacion sexual, ta pensa despues, ‘si e mucha muher a haci esei cu mi kizás el a hacié caba cu un otro.’ Realmente, mi a sintími asina. . . . Mi tabata extremamente jaluz i dudoso, i sospechoso.”

Ki remoto esei tá for di berdadero amor, cu “no ta jaluz, . . . no ta comportele indecentemente, no ta busca su mes interés.” (1 Corintio 13:​4, 5) E amor cu ta edifica un berdadero relacion no ta fundá ariba pasion irrazonabel.

E beneficio di decencia: trankilidad i respet propio

Sin embargo, hoven cu ta keda decente ta haci mas cu evita consecuencia serio. E Bijbel ta menciona un mucha muher cu a keda decente apesar di su amor intenso pa su mucha homber. Como resultado, e por a bisa cu orguyo: “Mi ta un muraya, i mi pechonan ta manera toren.” E no tabata un ‘porta cu a habri fácilmente’ bao di presion inmoral. Moralmente el a para manera un muraya inquebrantable di un fortaleza cu toren inaccesible! El a merece di ser yamá “esun puro” i por a bisa di su esposo prospectivo, “Mi a bira den su bista manera esun cu ta haya paz.” Su mes trankilidad di alma a contribui ne contentamento cu a existi entre nan dos.​—Cantar de cantares 6:​9, 10; 8:​9, 10.

Ester, e mucha muher decente mencioná anteriormente, tabatin e mesun trankilidad di alma i respet propio. El a bisa: “Mi a sintími bon tocante mi mes. Asta ora compañé di trabao a tene mofa di mi, mi a considera mi birginidad como un diamante, balioso pasobra e ta tanto raro.” Además, hovencita manera Ester no tin e plaga di un concenshi sushi. “No tin nada mihor cu un bon concenshi pa cu Jehova Dios,” segun Stebanita, un cristian di 19 aña di edad.

‘Pero, con un pareha por yega di conoce otro bon si nan no ta tene relacion sexual?’ ta loke algun hoven ta puntra.

Edificando un bida íntima permanente

Relacion sexual so no por forma un relacion permanente; ni tampoco expresion di cariño tal como zunchi. Un jufrow yamá Ana a adverti: “Mi a siña for di experencia cu tin bez cu bo por bira mucho íntimo físicamente mucho pronto.” Ora un pareha ta pasa nan tempo den expresion excesivo di cariño, comunicacion significativo ta termina. Asina nan por tapa diferencia serio cu por presenta despues di matrimonio. Ora Ana mas tardi a cuminza enamora ne homber cu el a casa cuné despues, el a tene cuidao pa evita di bira mucho íntimo físicamente. Ana a splica: “Nos a pasa nos tempo resolviendo problema i conbersando tocante nos meta den bida. Mi a yega di sa cu ki clase di persona mi tabata bai casa. Despues di casamento, tabatin solamente sorpresa agradable.”

Tabata duro pa Ana i su enamorá eherce dominio propio asina? “Sí,” Ana a admiti. “Di naturaleza mi ta un persona cariñoso. Pero, nos a papia tocante e peliger i a yuda otro. Nos dos tabata deseá mashá hopi pa agrada Dios i pa no daña nos binidero matrimonio.”

Pero, no ta yuda pa esposo i esposa nobo tene experencia sexual promé? Al contrario, hopi bez esei ta stroba e bida íntima di matrimonio! Den relacion sexual promé cu casamento, énfasis ta ser duná na satisfaccion di bo mes, e aspecto fisical di relacion sexual. Respet mutuo ta ser saboteá bao di pasion fuera di control. Despues cu tal modelo egoísta ta ser formá, ta dificultoso pa kíbranan i cu tempo nan por destrui e relacion.

Sin embargo, den matrimonio, un relacion íntimo saludable ta exigi freno, dominio propio. Atencion mester ta prestá na dunamento, ‘cumplimento cu bo deber sexual,’ en bez di recibi. (1 Corintio 7:​3, 4) Kedando decente por yudábo desaroya tal dominio propio. Esei ta siñábo pone interés no egoísta den e bienestar di bo casá promé cu bo mes deseo. Corda, també, cu satisfaccion matrimonial no ta puramente debí na factor fisical. Sociólogo Seymour Fisher a bisa cu reaccion sexual di hende muher també ta depende di tene “sintimento di intimidad, contacto, i confianza” i riba e abilidad di su esposo di “identifica cu su esposa, i . . . cuanto confianza e tin den su esposo.”

Interesantemente, den un investigacion di 177 muher casá, tres cuarto di esnan cu a experimenta relacion sexual promé cu casamento a informa di dificultad sexual durante e promé dos siman di matrimonio. Además, tur esnan cu a informa di dificultad sexual di largu plazo “a experimenta hopi relacion sexual promé cu casamento.” Investigacion ta mustra además cu hende cu ta practica relacion sexual promé cu casamento dos bez mas probablemente lo comete adulterio despues di a casa! Ki cierto ta e palabra bíblico: “Fornicacion . . . ta kita e bon motibo.”​—Oseas 4:11.

P’sei, ‘bo ta cosecha loke bo ta sembra.’ (Galatio 6:​7, 8) Sembra pasion i cosechá un cosécha grandi di duda i insiguridad. Pero, si bo sembra dominio propio, lo bo cosechá un cosécha di fidelidad i siguridad. Ester, cu nos a menciona caba, desde esei a goza di un matrimonio feliz pa cinco aña. Segun su esposo, “Ta un gozo inexplicable pa yega cas cerca mi esposa sabiendo cu nos ta pertenece solamente ne otro. Nada por reemplaza tal sintimento di confianza.”

Esnan cu ta spera te cu nan casa també por disfruta di trankilidad di alma, sabiendo cu nan ta agrada Dios. Pero, den e tempo aki ta leu di ser fácil pa keda decente. Kico por yudábo haci esei?

Pregunta pa consideracion Capítulo 23

◻ Ki prevalente ta relacion sexual promé cu casamento den hovenan cu bo conoce? Esei ta crea problema of presion pa bo?

◻ Menciona algun efecto negativo despues pa esnan cu ta tene relacion sexual promé cu casamento. Bo conoce algun hoven cu a sufri dje manera ei?

◻ Control di nacimento ta e solucion pa embarazo di tiener?

◻ Pakico algun ta sinti culpa i desilusion despues di a practica relacion sexual inmoral?

◻ Bo ta kere cu relacion sexual por yuda pareha no casá hala mas cerca otro? Pakico bo ta contesta asina?

◻ Con un pareha por yega di conoce otro durante nan enamoracion?

◻ Segun bo opinion, cua beneficio tini di keda birgen te cu bo casa?

[Komentario na página 182]

“Hoven cu no a tene relacion sexual durante cu nan tabata tiener ta un excepcion.”​—The Alan Guttmacher Institute

[Komentario na página 187]

“Tabata un desilusion grandi​—ningun sintimento di bon ni calor di amor como debe ser”

[Komentario na página 190]

Ora un pareha ta tene relacion sexual promé cu casamento, nan ta bai mucho leu i no por bolbe nunca!

[Kuadro/Plachi na página 184, 185]

‘Esei no por sosodémi!’​—e problema di embarazo di mucha muher

“Mas cu un di cada 10 mucha muher ta sali den estado tur aña, i e porciento ta aumentando. Si e situacion no ta cambia, cuater di cada 10 mucha muher lo sali den estado por lo menos un biaha promé cu nan ta haci 20 aña di edad.” Esei ta informe dje buki na inglés Embarazo di mucha muher: e problema cu no a desparce. I ki clase di mucha muher ta sali den estado? Segun e revista na inglés Adolescencia: “Mucha muher di scol cu ta sali den estado ta di tur clase socio-económico . . . di tur raza, di tur religion, i di tur parti dje país, di campo i di stad.”

Poco mucha muher kier sali den estado. Den su investigacion sobresaliente di mas cu 400 tiener den estado, Frank Furstenberg, Jr., a bisa cu “mayor parti di nan a bisa bez tras bez den entrevista, ‘Mi nunca a pensa cu esei por sosodémi.’ ”

Pero, mirando cu algun amiga di nan ta tene relacion sexual sin sali den estado, algun mucha muher ta figura cu nan por haci mescos, també. Furstenberg a bisa també: “Varios a bisa cu nan no a kere cu tabata posibel pa nan sali den estado ‘un bez.’ Otronan a kere cu si nan a tene relacion sexual solamente ‘de bez en cuando’ nan lo no sali den estado . . . Mientras mas tempo a pasa sin cu nan a concibi, mas probablemente nan a corre mas risico.”

Sin embargo, ta cierto cu mientras mas mucha muher ta practica relacion sexual, mas grandi ta bira e risico di embarazo. (Di un grupo di 544 mucha muher, “casi 20 porciento a sali den estado dentro di seis luna despues di a cuminza relacion sexual.”) Hopi mucha muher, manera un mama sin esposo yamá Rosa, a decidi expresamente di no usa contraceptivo. Rosa a tene miedu​—mescos cu hopi mucha muher​—cu e uso di pildo di contraceptivo por daña su salud. El a admiti además: “Pa mi obtene contraceptivo, mi mester a admiti na mi mes cu mi tabata haci algo malu. Mi no por a haci esei. Pues, mi simplemente a cera mi mente contra loke mi tabata haci i a spera cu nada lo sosode.”

Tal razonamento ta común den mama sin esposo. Den e investigacion di Furstenberg, “casi mitá dje mucha muhernan a bisa cu ta mashá importante pa mucha muher spera te cu nan casa pa cuminza tene relacion sexual . . . Innengablemente, tin un gran diferencia entre loke nan ta bisa i loke nan ta haci . . . Nan a siña un ley i a siña cumpli cu un otro.” Tal conflicto emocional “ta haci específicamente dificultoso pa mucha muher trata na moda realista cu e consecuencia di nan conducta sexual.”

Sin embargo, asta e uso di contraceptivo no ta garantiza cu mucha muher lo no bira mama sin casa. E buki na inglés Mucha hayando yiu ta hácinos corda: “Tur sistema tin un porciento di fayo. . . . Aunque mucha muher ta usa contraceptivo consistentemente . . . mas cu 500.000 [den EU] ainda lo sali den estado tur aña.” Un mama sin esposo di 16 aña di edad yamá Patricia a wordu citá como lamentando: “Mi a bebe [pildo contraceptivo] fielmente. Mi onradamente no a perde ningun dia.”

E Bijbel ta adverti: “No sea gañá. Bo no por tene mofa di Dios. Pasobra tur loke hende ta sembra, esei nan lo cosechá també.” (Galatio 6:7) Embarazo ta un manera so cu bo por cosechá un cosécha desagradabel di fornicacion. Afortunadamente, mama sin esposo, mescos cu tur otronan cu ta cai den trampa di inmoralidad, por cambia i acudi na Dios cu e actitud arrepentido di rey David, cu a pidi: “Labámi cabalmente di mi error, i hacími limpi asta di mi picá.” (Salmo 51:2) Dios lo bendiciona esfuerzo di tal hende arrepentí pa cria nan yiunan “den e disiplina i reglamento mental di Jehova.”​—Efesio 6:4.

Sin embargo, mihor evita di tene relacion sexual promé cu casamento! No sea gañá pa hende cu ta bisa cu bo por haci esei i scapa castigo.

[Plachi na página 183]

Despues di relacion sexual inmoral, hopi bez hovenan ta síntinan explotá, of asta humiyá

[Plachi na página 186]

Hopi bez maleza transmití sexualmente ta e resultado di relacion sexual promé cu casamento

[Plachi na página 188]

Freimento por hinca pareha den peliger moral i stroba comunicacion significativo

[Plachi na página 189]

Felicidad matrimonial ta depende di mas cu e relacion fisical dje pareha