Capítulo 24

Pakico Jesús a bini na mundo?

E DIA cu Jesús a pasa den Capernaum cu su cuater disípel tabata mashá ocupá, concluyendo durante atardi ora e pueblo di Capernaum tabata trece cerca dje tur hende enfermo pa ser curá. Nan no tabatin tempo pa nan mes.

Awor ta madrugá su mañan. Mientras cu ta scur ainda, Jesús a lanta i a sali su so. El a bai na un lugar solitario unda e por a haci oracion na su Tata na privá. Pero e tempo privá di Jesús tabata corto pasobra ora Pedro i e otronan a realiza cu Jesús no tabatei, nan a sali pa busqué.

Ora nan a haya Jesús, Pedro a bisa: “Tur hende ta buscábo.” E pueblo di Capernaum tabata kier pa Jesús keda cerca nan. Nan a aprecia loke el a haci pa nan! Pero Jesús a bini na mundo primeramente pa haci curacion milagroso? Kico Jesús a bisa tocante esei?

Segun un relato bíblico, Jesús a contesta su disípelnan: “Bam na otro parti na pueblo cercano, pa mi predica ei també, pasobra p’sei mes mi a sali.” Aunque e pueblo a urgi Jesús pa keda, el a bísanan: “També den otro stad mi tin cu declara e bon nobo di reino di Dios, pasobra p’sei mi a wordu mandá.”

Sí, Jesús a bini na mundo specialmente pa predica tocante e Reino di Dios, cu lo vindica e nomber di su Tata i resolve pa semper tur problema humano. Pero, pa duna evidencia cu Dios a mandé, Jesús a haci curacion milagroso. Di igual manera, siglonan promé, Moisés a haci milagro pa establece su identidad como sirbidor di Dios.

Awor, ora Jesús a sali for di Capernaum pa predica den otro stad, cuater disípel di dje a bai cuné. E cuater tabata Pedro i su ruman Andrés, i Juan i su ruman Santiago. Bo ta corda cu, un siman so promé, nan tabata invitá pa ser e promé compañé di trabao di Jesús.

E biahe di predicacion di Jesús na Galilea cu su cuater disípel tabata un éxito maraviyoso! Realmente, informe di su actividad a plama te na tur Siria. Multitud grandi di Galilea, Hudea, i di pariba di rio Jordan a sigi Jesús i su disípelnan. Marco 1:35-39; Lucas 4:42, 43; Mateo 4:23-25; Exodo 4:1-9, 30, 31.

▪ Kico a sosode su mañan despues di un dia ocupá di Jesús den Capernaum?

▪ Pakico Jesús tabata mandá na mundo, i milagro di dje a sirbi cua propósito?

▪ Ken a compaña Jesús na su biahe pa predica den Galilea, i ki reaccion tabatin ne actividad di Jesús?