Capítulo 100

E comparacion di mina

TAL BEZ Jesús tabata den e cas di Zaqueo ainda, unda el a keda riba camina pa Jerusalem. Su disípelnan a kere cu ora nan yega Jerusalem, lo e declara cu e ta Mesías i establece su Reino. Pa corrigi tal idea i mustra cu e Reino ta leu den futuro ainda, Jesús a conta un comparacion.

El a bisa: “Un cierto homber di nacimento noble a biahá na un tera leu pa segura poder real pa su mes i bolbe.” Jesús tabata e homber di “nacimento real,” i cielo tabata e “tera leu.” Ora Jesús a yega ei, su Tata a duné poder real.

Sin embargo, promé cu el a bai, e homber di nacimento real a yama diez esclabo i a duna cada un di nan un mina di plata, bisando: “Haci negoshi te cu mi bini.” E diez esclabo den e cumplimento inicial a representa disípel di Jesús di promé. Den e aplicacion mayor, nan a simboliza tur hende cu ta heredero prospectivo cuné den e Reino celestial.

Mina di plata tabata moneda di placa di balor, cada un di balor di rond di pago di tres luna di trabao pa un campesino. Pero, kico tal mina a representa? I ki sorto di negoshi e sclabonan tabatin cu haci cu nan?

Mina a representa bentaha cu disípel cu a nace di spiritu por a usa pa produci mas heredero dje Reino celestial te cu Jesús a bini como Rey den e Reino primintí. Despues di su resureccion i presentacion dilanti su disípelnan, el a dúnanan tal mina simbólico pa nan haci mas disípel i asina aumenta miembro dje Reino di cielo.

Jesús a sigi: “Pero su ciudadano a odia [e homber di nacimento noble] i a manda un grupo di embahador tras di dje, pa bisa, ‘Nos no kier pe homber ei bira rey riba nos.’” Tal ciudadano tabata israelita, of hudío, sin inclui su disípelnan. Despues cu Jesús a bai cielo, tal hudío cu nan persecucion di su disípelnan a duna di conoce cu nan no tabata kieré como nan rey. Asina nan a actua manera ciudadano cu a manda e grupo di embahador.

Con e diez esclabo a usa nan mina? Jesús a splica: “Cu tempo ora el a bolbe despues di a segura poder di rey, el a manda yama cerca dje esclabo na ken el a duna cen di plata, pe averigua cuanto nan a gana haciendo negoshi. Anto e promé a presenta, bisando, ‘Señor, bo mina a gana diez mina.’ P’sei el a bisé, ‘Bon hací, bon esclabo! Door cu bo a duna prueba cu bo ta fiel den un asunto mashá chikito, tene autoridad riba diez stad.’ Awor e segundo a bini, bisando, ‘Bo mina, Señor, a gana cinco mina.’ El a bisa esei també, ‘Abo, també, recibi encargo di cinco stad.’”

E sclabo cu diez mina a simboliza un clase, of grupo, di disípel desde Pentecoste di aña 33 EC te awor cu ta inclui e apóstolnan. Esnan cu a gana cinco mina també a simboliza un grupo durante e mesun periodo di tempo cu, segun nan oportunidad i capacidad, a aumenta e propiedad dje rey riba tera. E dos grupo a predica e bon nobo celosamente, i como resultado, hopi hende di curazón recto a bira cristian. Nuebe esclabo tabatin bon éxito den nan negoshi i a aumenta loke nan a recibi.

Jesús a sigi: “Pero uno distinto a bini, bisando, ‘Señor, atá bo mina, cu mi a warda den un paña. Bo sa, mi tin miedu di bo, pasobra bo ta un homber severo; bo ta coge loke bo no a depositá i bo ta cosechá loke bo no a sembra.’ El a bisé, ‘Mi ta huzgábo for di bo mes boca, esclabo malu. Bo tabata sa, berdad, cu mi ta un homber severo, cogiendo loke mi no a deposita i cosechando loke mi no a sembra? Pues, pakico bo no a warda mi cen di plata den bancu? Anto ora mi a yega mi por a cobra esei cu interés.’ Cu esei el a bisa esnan pará puesto, ‘Kita e mina foi dje i duné na esun cu tin diez mina.’”

Pe esclabo malu, e perdimento dje mina simbólico a nifica perdimento di un lugar den e Reino di cielo. Sí, el a perde e privilegio di goberna, den un sentido, riba diez stad of cinco stad. Ripara, també, cu e sclabo no ta ser declará malu pa cualkier maldad cu el a haci, sino, mas bien, pasobra e no a traha pe aumento di riqueza dje reino di su doño.

Ora e mina dje sclabo malu a ser duná ne promé esclabo, el a keha: “Señor, e tin diez mina!” Pero, Jesús a contesta: “Na tur hende cu tin, mas lo ser duná; pero for di esun cu no tin, asta loke e tin lo ser kitá. Además, enemigo di mi aki cu no tabata kier pa mi bira rey riba nan, trece nan aki i mátanan dilanti mi.” Lucas 19:11-27; Mateo 28:19, 20.

▪ Kico a conmove Jesús pa conta e comparacion di mina?

▪ Ken tabata e homber di nacimento noble, i el a bai na cua tera?

▪ Ken tabata esclabo, i kico mina ta representa?

▪ Ken ta ciudadano, i con nan a manifesta nan odio?

▪ Pakico un esclabo tabata yamá malu, i kico perdimento di su mina a nifica?