Capitulo 3

Ken Ta e Dios Berdadero?

 1. Pakico hopi hende ta bai di acuerdo cu e palabranan di apertura di Bijbel?

ORA bo wak e cielu riba un anochi cla, bo no ta keda asombrá di mira asina tantu strea? Con bo ta splica nan existencia? I kico di e cosnan bibiente riba tera—flornan colorido, paranan cu nan cantamentu agradabel, bayenanan poderoso cu ta bula den e océano? E lista ta sigui sin fin. Tur esaki no por a bin pa casualidad. Nada straño cu hopi hende ta bai di acuerdo cu e palabranan di apertura di e Bijbel: “Na principio Dios a crea e cielu i e tera”!—Génesis 1:1.

 2. Kico Bijbel ta bisa tocante Dios i kico e ta animá nos pa haci?

² Humanidad ta sumamente dividí riba e cuestion di Dios. Algun ta pensa cu Dios ta un forsa impersonal. Miyones di hende ta adorá antepasadonan morto, keriendo cu Dios ta muchu leu pa acercá. Pero Bijbel ta revelá cu e Dios berdadero ta un persona real kende ta mustra un interes caluroso den nos como individuonan. Ta p’esei e ta animá nos pa “busca Dios,” bisando: “E no ta hopi leu for di cada un di nos.”—Echonan 17:27.

 3. Pakico ta imposibel pa traha un imágen di Dios?

³ Con Dios su aparencia ta? Algun di su sirbidornan a mira visionnan di su glorioso presencia. Den e esakinan el a simbolisá su mes como sintá riba un trono, resplandor extraordinario saliendo for di dje. Sin embargo, esnan cu a contemplá tal visionnan nunca a describí un cara precis. (Daniel 7:9, 10; Revelacion 4:2, 3) Esei ta pa motibu cu “Dios ta un Spiritu”; e no tin un curpa físico. (Juan 4:24) En realidad, ta imposibel pa traha un imágen físico exacto di nos Creador, pasobra “ningun hende a mira Dios nunca.” (Juan 1:18; Exodo 33:20) Sin embargo, Bijbel ta siña nos hopi tocante Dios.

E DIOS BERDADERO TIN UN NOMBER

 4. Cua ta algun título significativo aplicá na Dios den Bijbel?

⁴ Den Bijbel, e Dios berdadero ta ser identificá dor di expresionnan manera “Dios Todopoderoso,” “e Haltísimo,” “Magnífico Creador,” “Magnífico Instructor,” “Señor Soberano,” i “Rey di eternidad.” (Génesis 17:1; Salmo 50:14; Eclesiástes 12:1; Isaías 30:20; Echonan 4:24; 1 Timoteo 1:17) Meditando riba títulonan asina por yuda nos crece den conocimentu di Dios.

 5. Con Dios su nomber ta i cuantu biaha e ta aparecé den e Scritura Hebreo?

⁵ Sin embargo, Dios tin un nomber único cu ta aparecé casi 7.000 biaha den e Scritura Hebreo so—mas tantu biaha cu cualkier un di su títulonan. Un 1.900 aña pasá, e hudiunan supersticiosamente a stop di pronunciá e nomber divino. Hebreo bíblico a ser skirbí sin vocal [klinker]. P’esei, no tin ningun manera pa ta exacto tocante con Moises, David, of otronan di tempunan antiguo a pronunciá e cuater consonantenan [medeklinkernan] (יהוה) cu ta forma e nomber divino. Algun escolástico ta sugerí cu Dios su nomber kisas a ser pronunciá “Yahweh,” pero nan no por ta sigur. E pronunciacion na papiamento “Jehova” a ser usá pa hopi tempu, i su ekivalente den hopi idioma ta ampliamente aceptá awe.—Mira Exodo 6:3 i Isaías 26:4 den e King James Version.

PAKICO BO MESTER USA DIOS SU NOMBER

 6. Kico Salmo 83:18 ta bisa tocante Jehova i pakico nos mester usa su nomber?

⁶ Dios su nomber único, Jehova, ta sirbi pa distingui’é for di tur otro dios. Ta p’esei e nomber ei ta aparecé asina tantu biaha den e Bijbel, specialmente den su texto hebreo. Hopi traductor ta keda sin usa e nomber divino, pero Salmo 83:18 claramente ta bisa: “Abo, kende su nomber ta Jehova, abo so ta e Haltísimo riba tur e tera.” Pues ta apropiado pa nos usa e nomber personal di Dios ora nos ta papia di dje.

 7. Kico e nificacion di e nomber Jehova ta siña nos tocante Dios?

⁷ E nomber Jehova ta un forma di un verbo hebreo cu ta nificá “yega di ser.” Pues, Dios su nomber ta nificá “E Ta Causa di Ser.” Jehova Dios di e manera ei ta identificá su mes como e Dios di Gran Propósito. E semper ta causa su propósito pa bira un realidad. Solamente e Dios berdadero por corectamente carga e nomber aki, pasobra hende nunca por ta sigur cu nan plannan lo tin éxito. (Santiago 4:13, 14) Jehova so por bisa: “Asina mi palabra cu ta sali for di mi boca lo resultá di ta. . . . Lo e tin éxito sigur den loke mi a mand’é.”—Isaías 55:11.

 8. Ki propósito Jehova a anunciá mediante Moises?

⁸ E patriarcanan hebreo Abraham, Isaac i Jacob cada un “a inbocá e nomber di Jehova,” pero nan no a conocé e nificacion completo di e nomber divino. (Génesis 21:33; 26:25; 32:9; Exodo 6:3) Ora Jehova mas despues a revelá su propósito pa libra nan desendientenan, e israelitanan, for di sclabitud den Egipto i duna nan “un tera cu abundancia di lechi i honing,” esaki por a parce imposibel. (Exodo 3:17) No obstante, Dios a enfatisá e nificacion eterno di su nomber dor di bisa su profeta Moises: “Esaki ta loke bo tin cu bisa na e yunan di Israel, ‘Jehova e Dios di boso antepasadonan, e Dios di Abraham, e Dios di Isaac i e Dios di Jacob, a mandá mi cerca boso.’ Esaki ta mi nomber te na tempu indefiní, i esaki ta e recuerdo di mi di generacion tras generacion.”—Exodo 3:15.

 9. Con Fárao a mira Jehova?

⁹ Moises a pidi Fárao, e rey di Egipto, pa laga e israelitanan bai pa adorá Jehova den e desierto. Pero Fárao, kende e mes a ser mirá como un dios i kende a adorá otro diosnan egipcio, a contestá: “Ken ta Jehova, di manera cu mi mester obedecé su bos pa manda Israel bai? Mi no conocé Jehova mes, i ademas, lo mi no manda Israel bai.”—Exodo 5:1, 2.

10. Den Egipto di antigua, ki accion Jehova a tuma pa cumpli cu su propósito enbolbiendo e israelitanan?

¹⁰ Jehova e ora ei a tuma accion progresivo pa cumpli cu su propósito, actuando na armonia cu e nificacion di su nomber. El a trece dies plaga riba e egipcionan di antigua. E último plaga a mata tur primogénito di Egipto, incluyendo e yu homber di orguyoso Fárao. E ora ei e egipcionan tabata ansioso pa Israel bai. Sin embargo, algun egipcio tabata asina impresioná dor di Jehova su poder cu nan a uni cu e israelitanan den bandoná Egipto.—Exodo 12:35-38.

11. Ki milager Jehova a efectuá na e Laman Corá, i kico su enemigunan a haña nan obligá ta reconocé?

¹¹ Fárao obstiná i su ehército, cu su cientos di garoshi di guera, a sali pa recapturá su esclabonan. Segun cu e egipcionan tabata yegando cerca, Dios milagrosamente a parti e Laman Corá di manera cu e israelitanan por a crusa riba tera secu. Ora e persiguidornan a drenta e fondo di laman, Jehova “a sigui kita e wielnan di nan garoshi di manera cu nan tabata manehá nan cu dificultad.” E guereronan egipcio a sclama: “Laga nos hui for di cualkier contacto cu Israel, pasobra Jehova siguramente ta bringa pa nan contra e egipcionan.” Pero tabata demasiado lat. E inmenso murayanan di awa a basha abou i “a tapa e garoshinan di guera i e hombernan di cabayeria perteneciendo na henter Fárao su forsa militar.” (Exodo 14:22-25, 28) Asina Jehova a traha un gran nomber pa su mes, i e suceso ei no a ser lubidá te n’e dia aki.—Hosué 2:9-11.

12, 13. (a) Dios su nomber tin cua nificacion pa nos awe? (b) Kico e hendenan mester siña urgentemente i pakico?

¹² E nomber cu Dios a traha pa su mes tin gran nificacion pa nos awe. Su nomber, Jehova, ta pará como un garantia cu tur loke cu el a proponé lo e causa pa bira realidad. Esei ta incluí cumplimentu di su propósito original pa nos tera bira un paradijs. (Génesis 1:28; 2:8) Cu e meta ei, Dios lo eliminá tur opositor di su soberania awe, pasobra el a declará: “Nan lo tin cu sa cu Ami ta Jehova.” (Ezekiel 38:23) Anto Dios lo cumpli cu su promesa di trece su adoradornan den un mundu nobo di husticia.—2 Pedro 3:13.

¹³ Tur persona cu kier Dios su aprobacion mester siña inbocá su nomber den fe. E Bijbel ta primintí: “Tur cu inbocá e nomber di Jehova lo ser salbá.” (Romanonan 10:13) Sí, e nomber di Jehova tin masha nificacion. Inbocando Jehova como bo Dios i Libertador por hibá bo na felicidad eterno.

CUALIDADNAN DI E DIOS BERDADERO

14. Cua cualidadnan básico di Dios e Bijbel ta resaltá?

¹⁴ Un studio di Israel su liberacion for di Egipto ta resaltá cuater cualidad básico cu Dios ta poseé den balansa perfecto. Su trato cu Fárao ta revelá su poder extraordinario. (Exodo 9:16) E manera magistral cu Dios a trata e situacion complicá ei ta mustra su sabiduria incomparabel. (Romanonan 11:33) El a revelá su husticia den repartí castigu na opositor i opresornan obstiná di su pueblo. (Deuteronomio 32:4) Un cualidad di Dios ariba tur otro ta amor. Jehova a demostrá amor sobresaliente dor di cumpli cu su promesa en cuanto Abraham su desendencia. (Deuteronomio 7:8) Tambe el a demostrá amor dor di permití algun egipcio bandoná diosnan falsu i beneficiá grandemente dor di tuma nan posicion na fabor di e único Dios berdadero.

15, 16. Den ki maneranan Dios a mustra amor?

¹⁵ Segun cu bo ta lesa e Bijbel, lo bo nota cu amor ta Dios su atributo principal, i e ta demostr’é den hopi manera. Por ehempel, tabata motivá pa amor cu el a bira un Creador i promé a compartí e goso di bida cu criaturanan spiritual. E cientos di miyones di angelnan ta stima Dios i ta alab’é. (Job 38:4, 7; Daniel 7:10) Dios a demostrá amor tambe dor di crea e tera i prepar’é pa existencia humano felis.—Génesis 1:1, 26-28; Salmo 115:16.

¹⁶ Nos ta beneficiá di Dios su amor den muchu hopi manera pa mencioná. Pa cuminsá, Dios amorosamente a traha nos curpa den un manera asina maraviyoso cu nos por disfrutá di bida. (Salmo 139:14) Su amor ta ser demostrá den e echo, cu e ta proveé “awaceru for di cielu i temporadanan fructífero, yenando [nos] curason completamente cu alimento i alegria.” (Echonan 14:17) Dios asta “ta laga su solo sali riba hende malbado i bon i ta laga awaceru cai riba hende hustu i inhustu.” (Mateo 5:45) Tambe amor ta conmové nos Creador pa yuda nos gana e conocimentu di Dios i sirbi’é felismente como su adoradornan. En berdad, “Dios ta amor.” (1 Juan 4:8) Pero tin hopi mas aspecto di su personalidad.

“UN DIOS MISERICORDIOSO I BONDADOSO”

17. Kico nos ta siña tocante Dios na Exodo 34:6, 7?

¹⁷ Despues cu e israelitanan a crusa e Laman Corá, ainda nan tabatin conocé Dios mas mihó. Moises a sinti e necesidad aki i a pidi den oracion: “Por fabor, si mi a haña fabor den bo bista, hací mi conocé, por fabor, bo camindanan, pa mi por conocé bo, afin cu mi por haña fabor den bo bista.” (Exodo 33:13) Moises a yega di conocé Dios mihó, ora el a tende Dios su propio declaracion: “Jehova, Jehova, un Dios misericordioso i bondadoso, tardá pa rabia i abundante den bondad amoroso i berdad, preservando bondad amoroso pa miles, pordonando eror i transgresion i picá, pero di ningun manera lo e duna dispensacion for di castigu.” (Exodo 34:6, 7) Dios ta balansá su amor cu husticia, i no ta protehá pecadornan boluntario for di e consecuencianan di nan maldad.

18. Con Jehova a proba di ta misericordioso?

¹⁸ Manera Moises a siña, Jehova ta mustra misericordia. Un persona misericordioso ta sinti duele di esnan cu ta sufri i ta trata na trece alivio pa nan. Asina Dios a mustra compasion pa humanidad dor di haci un percuracion pa alivio permanente for di sufrimentu, malesa i morto. (Revelacion 21:3-5) Adoradornan di Dios por experenciá calamidad pa motibu di condicionnan den e mundu malbado aki, of nan kisas ta actua imprudente i topa cu problema. Pero si nan humildemente acudí na Jehova pa yudansa, lo e consolá nan i yuda nan. Pakico? Pasobra e misericordiosamente ta mustra tierno consideracion pa su adoradornan.—Salmo 86:15 1 Pedro 5:6, 7.

19. Pakico nos por bisa cu Dios ta bondadoso?

¹⁹ Hopi hende den puesto di autoridad ta trata otronan severamente. Na contraste, ki bondadoso Jehova ta pa cu su sirbidornan humilde! Aunke e ta e autoridad di mas haltu den e universo, e ta mustra un bondad sobresaliente den un forma general pa tur humanidad. (Salmo 8:3, 4; Lucas 6:35) Tambe Jehova ta bondadoso cu personanan individual, contestando nan rogamentunan specífico pa fabor. (Exodo 22:26, 27; Lucas 18:13, 14) Naturalmente, Dios no ta obligá na mustra fabor of misericordia na ningun persona. (Exodo 33:19) Ta p’esei, nos mester manifestá aprecio profundo pa Dios su misericordia i su bondad.—Salmo 145:1, 8.

TARDA PA RABIA, IMPARCIAL I HUSTU

20. Kico ta mustra cu Jehova ta tantu tardá pa rabia i tambe imparcial?

²⁰ Jehova ta tardá pa rabia. Sin embargo, esaki no ta nificá cu e no ta tuma accion, pasobra el a haci esei destruyendo Fárao obstiná i su ehército den e Laman Corá. Tambe Jehova ta imparcial. P’esei, su pueblo faborecí, e israelitanan, eventualmente a perde su fabor pa motibu di nan malechonan persistente. Dios ta aceptá como su adorador hende di tur nacion, pero solamente esnan cu ta conformá cu su camindanan hustu.—Echonan 10:34, 35.

21. (a) Kico Revelacion 15:2-4 ta siña nos tocante Dios? (b) Kico lo haci’é mas fácil pa nos pa haci loke Dios ta bisa ta corecto?

²¹ E buki bíblico di Revelacion ta resaltá e importancia di siña tocante Dios su “decretonan hustu.” E ta bisa nos cu criaturanan celestial ta canta: “Grandi i maraviyoso ta bo obranan, Jehova Dios, e Todopoderoso. Hustu i berdadero ta bo camindanan, Rey di eternidad. Ken realmente lo no temé bo, Jehova, i glorificá bo nomber, pasobra abo so ta leal? Pasobra tur e nacionnan lo bini i adorá dilanti bo, pasobra bo decretonan hustu a ser manifestá.” (Revelacion 15:2-4) Nos ta mustra temor saludabel pa Jehova, of reverencia p’e, dor di biba di acuerdo cu loke e ta bisa ta corecto. Esaki ta bira mas fácil dor di recordá nos mes di Dios su sabiduria i amor. Tur su mandamentunan ta pa nos bienestar.—Isaías 48:17, 18.

‘JEHOVA NOS DIOS TA UN SO’

22. Pakico esnan cu ta aceptá e Bijbel no ta adorá un Trinidad?

²² E egipcionan di antigua a adorá hopi dios, pero Jehova ta “un Dios cu ta exigí debocion exclusivo.” (Exodo 20:5) Moises a recordá e israelitanan cu “Jehova nos Dios ta un solo Jehova.” (Deuteronomio 6:4) Jesucristo a ripití e palabranan ei. (Marco 12:28, 29) P’esei, esnan cu aceptá e Bijbel como e Palabra di Dios no ta adorá un Trinidad consistiendo di tres persona of dios den un. En realidad, e palabra “Trinidad” ni sikiera ta aparecé den Bijbel. E Dios berdadero ta un solo Persona, separá for di Jesucristo. (Juan 14:28; 1 Corintionan 15:28) Dios su spiritu santu no ta un persona. E ta Jehova su forsa activo, usá p’e Todopoderoso pa cumpli cu su propósito.—Génesis 1:2; Echonan 2:1-4, 32, 33; 2 Pedro 1:20, 21.

23. (a) Con bo amor pa Dios lo crece? (b) Kico Jesus a bisa tocante amor pa Dios, i kico nos mester siña tocante Cristo?

²³ Ora bo considerá ki maraviyoso Jehova ta, bo no ta bai di acuerdo cu e merecé bo adoracion? Segun cu bo ta studia su Palabra, e Bijbel, lo bo yega na conoc’é mihó i lo siña loke e ta rekerí di bo pa bo felicidad i bienestar eterno. (Mateo 5:3, 6) Ademas, bo amor pa Dios lo crece. Esei ta apropiado, pasobra Jesus a bisa: “Bo mester stima Jehova bo Dios cu tur bo curason i cu tur bo alma i cu tur bo mente i cu tur bo forsa.” (Marco 12:30) Evidentemente, Jesus tabatin tal amor pa Dios. Pero kico Bijbel ta revelá tocante Jesucristo? Ki rol e tin den Jehova su propósito?

TEST BO CONOCIMENTU

Cua ta Dios su nomber, i cuantu biaha e ta ser us á den e Scritura Hebreo?

Pakico bo mester usa Dios su nomber?

Cua cualidadnan di Jehova Dios specialmente ta atraé bo?

[Plachi na página 29]

Con bon bo conocé e Creador di tur cos?