Birando Bieu Huntu

1, 2. (a) Ki cambionan ta sosodé segun cu nos ta bira bieu? (b) Con hombernan piadoso di tempu bíblico a haña satisfaccion den behes?

HOPI cambio ta sosodé segun cu nos ta bira bieu. Debilidad físico ta caba cu nos vigor. Un mirada den spiel ta revelá plooinan nobo i cabei cu ta bira blancu gradualmente—bo ta asta bira pelon. Kisas nos ta sufri di poco pérdida di memoria. Relacionnan nobo ta desaroyá ora e yunan casa, i atrobe ora e nietunan nace. Pa algun, baha cu penshon for di trabou seglar ta resultá den un rutina di bida diferente.

² En realidad, añanan di behes por ta difícil. (Eclesiástes 12:1-8) Tog, considerá sirbidornan di Dios den tempu bíblico. Aunke nan finalmente a muri, nan a gana sabiduria i tambe comprendimentu, locual a trece gran satisfaccion pa nan den nan behes. (Génesis 25:8; 35:29; Job 12:12; 42:17) Con nan tabatin éxito birando bieu felismente? Siguramente esei tabata dor di biba na armonia cu e principionan cu nos awe ta haña registrá den Bijbel.—Salmo 119:105; 2 Timoteo 3:16, 17.

 3. Ki conseho Pablo a duna pa homber i muhernan di mas edad?

³ Den su carta na Tito, apostel Pablo a ofrecé guia sano na esnan cu ta birando bieu. El a skirbi: “Laga e hombernan di mas edad ser moderá di custumber, serio, di sano huicio, saludabel den fe, den amor, den awante. Di igual manera, laga muhernan di edad ser reverente den conducta, no calumniador, ni sclabisá na hopi biña, siñador di loke ta bon.” (Tito 2:2, 3) Prestando atencion n’e palabranan aki por yudá bo enfrentá e desafionan di bira bieu.

4, 5. Con hopi mayor ta reaccioná ora nan yunan bandoná cas, i con algun ta ahustá n’e situacion nobo?

⁴ Ora rolnan ta cambia tin mester di adaptabilidad. Ki cierto esaki ta resultá di ta ora yunan adulto ta bandoná cas i ta casa! Pa hopi mayor esaki ta e promé recordatorio cu nan ta birando bieu. Aunke nan ta contentu cu nan yunan a bira adulto, mayornan hopi bes ta preocupá cu si nan a haci tur loke nan tabata por pa prepará nan yunan pa independencia. I kisas nan ta sinti falta dje yunan rond di cas.

⁵ Ta comprendibel cu mayornan ta sigui preocupá nan mes cu e bienestar di nan yunan, asta despues cu e yunan bandoná cas. Un mama a bisa, “Si solamente mi por a tende di nan frecuentemente, pa sigurá mi mes cu nan ta bon—esei lo hací mi felis.” Un tata ta relatá: “Ora nos yu muher a bandoná cas, tabata un tempu hopi difícil. Esei a laga un bashí grandi den nos famia pasobra semper nos a haci tur cos huntu.” Con e mayornan aki a trata cu e ausencia di nan yunan? Den hopi caso, demostrando interes den otro hende i yudando nan.

 6. Kico ta yuda mantené relacion di famia den su perspectiva corecto?

⁶ Ora yunan casa, e rol di mayornan ta cambia. Génesis 2:24 ta declará: “Un homber lo bandoná su tata i su mama i e mester pega na su esposa i nan mester bira un solo carni.” Un reconocimentu dje principio divino di hefatura i bon órden lo yuda mayornan mantené cosnan den nan perspectiva corecto.—1 Corintionan 11:3; 14:33, 40.

 7. Ki actitud excelente un tata a cultivá ora su yu muhernan a bandoná cas pa casa?

⁷ Despues cu un pareha su dos yu muhernan a casa i a muda bai, e pareha a sinti un bashí den nan bida. Na principio, e esposo a sinti rencor contra su suegronan. Pero segun cu el a refleccioná riba e principio di hefatura, el a realisá cu e esposonan di su yu muhernan awor tabata responsabel pa nan respectivo famia. P’esei, ora su yu muhernan a pidi conseho, el a puntra nan kico nan esposo a pensa, i e ora ei el a haci sigur pa duna mas apoyo posibel. Su suegronan awor ta mir’é como un amigu i ta ricibí su conseho cu gustu.

8, 9. Con algun mayor a adaptá n’e independencia di nan yunan adulto?

⁸ Kico si yunan recien casá, aunke no haciendo nada contra e Bijbel, no ta haci loke e mayornan ta pensa ta mihó? “Nos semper ta yuda nan mira Jehova su punto di bista,” un pareha cu tin yunan casá a splica, “pero si nos no ta di acuerdo cu un decision di nan, nos ta acept’é i ta duna nan nos sosten i animacion.”

⁹ Den cierto paisnan asiático, algun mama ta hañ’é particularmente difícil pa aceptá e independencia di nan yu hombernan. Sin embargo, si nan ta respetá órden i hefatura cristian, nan ta haña cu friccion cu nan suegranan ta bira ménos. Un muher cristian ta haña cu e baimentu di su yu hombernan for dje cas di famia tabata un “fuente di gratitud cu ta sigui aumentá.” E ta haña ta emocionante pa mira nan abilidad pa manehá nan famia nobo. En buelta, esaki a nificá un alivio dje carga físico i mental cu e i su esposo mester carga segun cu nan ta bira bieu.

10, 11. Ki conseho bíblico lo yuda hende evitá algun dje trampanan di edad medio?

¹⁰ Hende ta reaccioná na diferente manera ora nan ta yegando edad medio. Algun hende homber ta bisti diferente den un esfuerso pa parce mas yong. Hopi hende muher ta preocupá tocante e cambionan cu menopausa ta trece. Lamentablemente, algun persona den nan edad medio ta provocá nan casánan pa sinti rencor i yalurs dor di coketeá cu personanan mas yong dje sexo opuesto. Sin embargo, hombernan piadoso di mas edad, ta “di sano huicio,” frenando deseonan incorecto. (1 Pedro 4:7) Muhernan maduro di igual manera ta traha pa mantené e stabilidad di nan matrimonio, motivá dor di amor pa nan esposo i un deseo pa agradá Jehova.

¹¹ Bou di inspiracion, Rey Lemuel a registrá alabansa p’e “esposa capas” kende ta recompensá su esposo “cu bon, i no cu malu, tur e dianan di su bida.” Un esposo cristian lo no keda sin apreciá con su esposa ta haci esfuerso pa trata cu éxito cu cualkier trastorno emocional cu e esposa ta experenciá durante edad medio. Amor dje esposo lo impuls’é pa ‘e alabá su esposa.’—Proverbionan 31:10, 12, 28.

12. Con parehanan por hala mas cerca otro segun cu añanan ta pasando?

¹² Durante e añanan druk di criamentu di yu, boso tur dos kisas gustosamente a pone un banda boso deseonan personal pa atendé n’e necesidadnan di boso yunan. Despues cu nan bai for di cas ta tempu pa bolbe enfocá riba boso bida casá. “Ora mi yu muhernan a bandoná cas,” un esposo ta bisa, “mi a cuminsá namorá mi esposa completamente di nobo atrobe.” Un otro esposo ta bisa: “Nos ta interesá den otro su salú i ta corda otro dje necesidad di ehercisio.” Pa no sinti soledad, e i su esposa ta mustra hospitalidad na otro miembronan dje congregacion. Sí, mustrando interes den otronan ta trece bendicionnan. Ademas, esei ta agradá Jehova.—Filipensenan 2:4; Hebreonan 13:2, 16.

13. Ki rol frankesa i onestidad ta hunga segun cu un pareha ta bira bieu huntu?

¹³ No permití un brecha di comunicacion desaroyá entre abo i bo casá. Papia huntu francamente. (Proverbionan 17:27) “Nos ta profundisá nos comprendimentu di otro dor di ta interesá i tene consideracion,” un esposo ta comentá. Su esposa ta bai di acuerdo, bisando: “Segun cu nos a bira bieu, nos a bin ta disfrutá di bebe un kopi di te huntu, combersando i cooperando un cu otro.” Si bo ta franco i onesto esei por yuda haci boso laso matrimonial fuerte, dunand’e un resistencia cu lo contrarestá e atakenan di Satanas, e ruinador di matrimonio.

14. Ki parti Timoteo su wela evidentemente a hunga den su crecementu como un cristian?

¹⁴ Nietunan ta “e corona” di esnan di mas edad. (Proverbionan 17:6) E compañerismo di nietunan berdaderamente por ta un goso—bibitu i refrescante. Bijbel ta papia bon di Loida, un wela kende, huntu cu su yu muher Eunice, a compartí su creencianan cu su nietu Timoteo. E hóben aki a crece sabiendo cu tantu su mama como su wela a duna gran balor na berdad bíblico.—2 Timoteo 1:5; 3:14, 15.

15. En relacion cu nietunan, ki contribucion balioso abuelonan por duna, pero kico nan mester evitá?

¹⁵ Esaki, anto, ta un área special den cua abuelonan por duna un contribucion sumamente precioso. Abuelonan, ya caba boso a compartí boso conocimentu di Jehova su propósitonan cu boso yunan. Awor boso por haci mescos cu un otro generacion mas! Hopi mucha ta keda emocioná pa tende nan abuelonan conta relatonan di Bijbel. Naturalmente, boso no ta tuma over e tata su responsabilidad di inculcá berdadnan bíblico den su yunan. (Deuteronomio 6:7) Mas bien, boso ta complementá esaki. Laga boso oracion sea esun dje salmista: “Asta te na behes i cabei blancu, O Dios, no bandoná mi, te cu mi por conta di bo brasa n’e generacion, na tur esnan cu tin cu bini, tocante bo poder.”—Salmo 71:18; 78:5, 6.

16. Con abuelonan por evitá di ser e causa di desaroyá tension den nan famia?

¹⁶ Lamentablemente, algun abuelo ta malcriá e muchanan asina tantu cu tensionnan ta desaroyá entre e abuelonan i nan yunan adulto. Sin embargo, boso bondad sincero kisas lo hacié mas fácil pa boso nietunan papia cu boso cu confiansa ora nan no ta sinti nan incliná pa revelá asuntunan na nan mayornan. Tin biaha e hóbennan ta spera cu nan abuelonan complaciente lo uni na nan banda contra nan mayornan. Kico e ora ei? Ehercé sabiduria i animá bo nietunan pa ta franco cu nan mayornan. Bo por splica cu esaki ta agradá Jehova. (Efesionan 6:1-3) Si ta necesario, bo por ofrecé bo mes pa habri caminda pa e hóben acercá su mayornan dor di papia cu nan. Sea franco cu bo nietunan tocante loke bo a siña durante e añanan. Bo onrades i sinceridad por beneficiá nan.

17. Ki determinacion dje salmista cristiannan di mas edad mester imitá?

¹⁷ Segun cu e añanan ta pasa bai, lo bo ripará cu bo no por haci tur loke bo tabata custumbrá di haci of tur loke bo kier haci. Con un persona por bin aceptá i trata cu e proceso di bira bieu? Den bo mente kisas bo ta sintí bo 30 aña di edad, pero un mirada den spiel lo revelá un realidad diferente. No sea desanimá. E salmista a roga Jehova: “No tirá mi afó den e tempu di behes; hustamente ora mi poder ta fayando, no bandoná mi.” Hacié bo meta pa imitá e salmista su determinacion. El a bisa: “Lo mi warda constantemente, i lo mi agregá na tur bo alabansa.”—Salmo 71:9, 14.

18. Con un cristian maduro por haci uso balioso di su bahamentu cu penshon?

¹⁸ Hopi persona a prepará adelantá pa aumentá nan alabansa na Jehova despues cu nan baha cu penshon di trabou seglar. Un tata cu awor ta penshonado a splica, “Mi a planea adelantá kico lo mi haci ora nos yu caba scol. Mi a determiná cu lo mi cuminsá den e ministerio di predicacion di tempu completo, i mi a bende mi negoshi afin di ta liber pa sirbi Jehova mas plenamente. Mi a haci oracion p’e guia di Jehova.” Si bo ta yegando e edad di penshon, saca consuelo for dje declaracion di nos Gran Creador: “Asta te n’e behes di un persona mi ta e Mésun; i te n’e cabei blancu di un persona mi mes lo sigui soportá.”—Isaías 46:4.

19. Ki conseho ta ser duná pa esnan cu ta birando bieu?

¹⁹ No ta fácil kisas pa adaptá na baha cu penshon for di trabou seglar. Apostel Pablo a consehá hombernan di edad pa ta “moderá den hábitonan.” Esaki ta rekerí un restriccion general, no entregando na e inclinacion pa busca un bida di comodidad. Asta por tin un necesidad mas grandi cu promé pa un rutina i disiplina propio despues di baha cu penshon. Sea ocupá, anto, “semper teniendo hopi di haci den e trabou di Señor, sabiendo cu bo trabou no ta pornada relacioná cu Señor.” (1 Corintionan 15:58) Expandé bo actividadnan pa yuda otronan. (2 Corintionan 6:13) Hopi cristian ta haci esaki dor di predicá e bon nobo celosamente na un paso cu ta pas cu nan edad. Segun cu bo ta birando mas bieu, sea “saludabel den fe, den amor, den perseverancia.”—Tito 2:2.

20, 21. (a) Den e sistema di cosnan actual, kico finalmente mester separá un pareha casá? (b) Con Ana ta percurá un excelente ehempel pa esnan cu a perde un casá den morto?

²⁰ Ta un echo tristu pero real cu den e sistema di cosnan actual, finalmente morto ta separá parehanan casá. Cristiannan cu perde nan casá den morto sa cu nan stimánan awor ta durmiendo, i nan tin confiansa cu nan lo mira nan atrobe. (Juan 11:11, 25) Pero tog e pérdida ta tristu. Con esun cu ta na bida por trata cuné?a

²¹ Cordando loke un cierto personahe bíblico a haci lo yuda. Ana a bira biuda despues di solamente shete aña di matrimonio, i ora nos ta lesa di dje, e tabatin 84 aña di edad. Nos por ta sigur cu el a lamentá ora el a perde su esposo. Con el a trata cu e situacion? El a rindi sirbishi sagrado na Jehova Dios n’e tempel di dia i anochi. (Lucas 2:36-38) Ana su bida di sirbishi deboto tabata sin duda un gran remedi p’e tristesa i soledad cu el a sinti como un biuda.

22. Con algun biuda i biudo a enfrentá soledad cu éxito?

²² “E desafio di mas grandi pa mi tabata di no tin un partner pa papia cuné,” un muher di 72 aña di edad a splica kende a bira biuda dies aña pasá. “Mi esposo tabata un bon scuchador. Nos tabata papia tocante e congregacion i nos participacion den e ministerio cristian.” Un otro biuda ta bisa: “Aunke tempu ta cura, mi a haña cu ta mas exacto pa bisa cu ta loke un persona ta haci cu su tempu ta yuda e persona cura. Bo ta den un mihó posicion pa yuda otronan.” Un biudo di 67 aña di edad ta di acuerdo, bisando: “Un manera maraviyoso pa enfrentá cu éxito e pérdida di un stimá ta di duna di bo mes pa consolá otronan.”

23, 24. Ki gran consuelo Bijbel ta duna pa esnan di mas edad, particularmente esnan cu a bira biuda of biudo?

²³ Aunke morto ta kita un casá stimá, Jehova semper ta keda fiel, semper confiabel. “Un cos mi a pidi Jehova,” Rey David di antigwedad a canta, “esei ta loke lo mi busca, cu mi por biba den e cas di Jehova tur e dianan di mi bida, pa contemplá e agradabilidad di Jehova i pa mira cu aprecio na su tempel.”—Salmo 27:4.

²⁴ “Onra biudanan cu ta realmente biuda,” apostel Pablo ta insta. (1 Timoteo 5:3) E conseho cu ta sigui e instruccion aki ta indicá cu biudanan digno sin famianan yegá por tabatin mester di sosten material for dje congregacion. Sin embargo, e sentido dje instruccion pa “onra” ta incluí e idea di balorá nan. Ki un consuelo biuda i biudonan por saca for dje conocimentu cu Jehova ta balorá nan i lo sostené nan!—Santiago 1:27.

25. Ki meta ta keda ainda p’e esnan di edad avansá?

²⁵ “E splendor di e hombernan di mas edad ta nan cabei blancu,” e Palabra inspirá di Dios ta declará. E ta “un corona di bunitesa ora e ta ser hañá den e caminda di husticia.” (Proverbionan 16:31; 20:29) Sigui, anto, sea casá of un biaha mas soltero, pa mantené e sirbishi di Jehova promé den bo bida. Dje manera ei lo bo tin un bon nomber cerca Dios awor i e prospecto di bida eterno den un mundu caminda e dolor di behes lo no t’ei mas.—Salmo 37:3-5; Isaías 65:20.