Capítulo Bintiocho

Paradijs Restorá!

Isaías 35:1-10

 1. Di con hopi religion ta ofrecé e speransa di bida den un paradijs?

“NOSTALGIA di paradijs ta un dje deseonan fuerte cu aparentemente ta keda surgi cerca hende. Kisas esei ta e deseo di mas fuerte i mas persistente cu tin. Na tur nivel di bida religioso tin evidencia di un cierto anhelo pa paradijs.” Asina The Encyclopedia of Religion ta bisa. E nostalgia ei ta natural, ya cu Bijbel ta conta nos cu bida humano a cuminsá den Paradijs, un bunita hardin sin malesa ni morto. (Génesis 2:8-15) P’esei no ta un sorpresa cu hopi religion di mundu ta ofrecé e speransa di bida den futuro den un of otro tipo di paradijs.

 2. Unda nos por haña e berdadero speransa di un futuro Paradijs?

² Den hopi pasashi di Bijbel, nos por lesa dje berdadero speransa dje futuro Paradijs. (Isaías 51:3) Por ehempel, capítulo 35 dje profecia di Isaías ta describí con regionnan manera desierto lo transformá den parkenan di hardin i cunucunan fértil. Hende ciegu ta recobrá nan bista, hende muda por papia i hende surdu por tende. Den e Paradijs primintí aki no tin tristesa ni suspiro, loke ta implicá cu lo no tin ni morto mas. Esta un promesa maraviyoso! Con nos mester comprendé e palabranan aki? Nan ta ofrecé nos un speransa awe? Un consideracion dje capítulo aki di Isaías lo contestá e preguntanan ei.

Un Tera Desolá Ta Alegrá

 3. Segun e profecia di Isaías, ki transformacion e tera lo experenciá?

³ Isaías su profecia inspirá tocante Paradijs restorá ta cuminsá cu e palabranan aki: “E desierto i e region sin awa lo tin gran alegria, i e yanura di desierto lo ta gososo i lo florecé manera asafran. Lo e florea sin falta, i realmente lo e ta gososo cu goso i cu sclamacion di alegria. E gloria di Líbanon mes tin cu ser duná na dje, e splendor di Carmelo i di Saron. Lo tin esnan cu lo mira e gloria di Jehova, e splendor di nos Dios.”—Isaías 35:1, 2.

 4. Na ki tempu i con e tera dje hudiunan ta haña un aspecto di desierto?

⁴ Isaías ta skirbi e palabranan aki rond di aña 732 P.E.C. Un 125 aña despues, e babilonionan ta destruí Jerusalem i ta manda e pueblo di Huda den exilio. Nan tera ta keda inhabitá, desolá. (2 Reynan 25:8-11, 21-26) Asina e spiertamentu cu Jehova a duna e pueblo di Israel ta cumpli, esta, cu si nan resultá infiel, nan lo bai den exilio. (Deuteronomio 28:15, 36, 37; 1 Reynan 9:6-8) Ora cu e nacion hebreo a bai den exilio den un pais stranhero, nan cunucu i hofinan bon muhá ta keda bandoná pa 70 aña i ta bira manera un desierto.—Isaías 64:10; Jeremías 4:23-27; 9:10-12.

 5. (a) Con condicionnan paradísico ta ser restorá na e tera? (b) Den ki sentido hende ta “mira e gloria di Jehova”?

⁵ Sin embargo, e profecia di Isaías ta predicí cu e tera lo no keda desolá pa semper. Lo restor’é na un condicion berdaderamente paradísico. Lo dun’é “e gloria di Líbanon” i “e splendor di Carmelo i di Saron.”a Con? Ora cu e hudiunan regresá di exilio, nan por bolbe cuminsá cultivá i muha nan cunucunan, i nan tera ta recuperá e fertilidad abundante cu e tabatin anteriormente. Ta Jehova so por ricibí e mérito pa esaki. Ta dor di su boluntad i cu su apoyo i bendicion e hudiunan ta haña chens di disfrutá di condicionnan paradísico asina. Hende por mira “e gloria di Jehova, e splendor di [nan] Dios” ora nan ta reconocé e man di Jehova den e transformacion asombroso di nan tera.

 6. Ki cumplimentu importante dje palabranan di Isaías ta tuma lugá?

⁶ No obstante, den e tera restorá di Israel e palabranan di Isaías tin un cumplimentu mas importante. Den sentido spiritual, Israel tabata pa hopi aña den un condicion secu, manera un desierto. Tempu cu e exiliadonan tabata na Babilonia, casi nan no por a practicá adoracion puru. No tabatin tempel, ni altar ni sacerdocio organisá. Sacrificionan diario a keda suspendé. Awor, Isaías ta profetisá un cambio. Bou dje liderato di hombernan manera Zorobabel, Ésdras i Nehemías, representantenan di tur 12 tribu di Israel ta regresá Jerusalem, reedificá e tempel i ta adorá Jehova libremente. (Ésdras 2:1, 2) Esaki en berdad ta un paradijs spiritual!

Ferviente cu e Spiritu

 7, 8. Di con e exiliadonan hudiu mester tin un actitud positivo, i con e palabranan di Isaías ta duna animacion?

⁷ E palabranan di Isaías capítulo 35 ta resoná cu goso. E profeta ta proclamá un futuro briyante pa e nacion arepentí. Sí, e ta papia cu conviccion i optimismo. Dos siglo despues, na drempel di nan restoracion, e hudiunan exiliá tin mester dje mésun conviccion i optimismo. Via Isaías, Jehova ta urgi nan proféticamente: “Boso fortalecé e mannan débil i haci e rudianan cu ta tambaleá firme. Bisa esnan cu tin ansiedad di curason: ‘Sea fuerte. No tene miedu. Mira! Boso Dios mes lo bini cu vengansa, sí, Dios asta cu un pago. E mes lo bini i salba boso.’”—Isaías 35:3, 4.

⁸ Fin dje exilio largu ta un tempu pa drenta den accion. Rey Ciro di Persia, esun cu Jehova a usa pa trece vengansa contra Babilonia, a proclamá cu mester restorá e adoracion di Jehova na Jerusalem. (2 Crónicanan 36:22, 23) Miles di famia hebreo tin cu organisá nan mes pa por haci e biahe peligroso for di Babilonia pa Jerusalem. Ora nan yega einan, nan lo tin cu construí lugánan di biba adecuá i prepará pa e tarea monumental di reedificá e tempel i e stad. Tur esaki por a intimidá algun hudiu na Babilonia. Sin embargo, no ta momento pa nan ta débil of pa nan tin miedu. E hudiunan tin cu fortalecé otro i confia den Jehova. E ta sigurá nan cu nan lo salba.

 9. Ki promesa magnífico tin dilanti e hudiunan cu regresá?

⁹ Esnan librá for di cautiverio na Babilonia lo tin bon motibu pa alegrá, pasobra un futuro magnífico ta warda nan ora nan regresá Jerusalem. Isaías ta predicí: “N’e tempu ei lo habri wowo dje ciegunan, i lo habri asta orea dje surdunan. N’e tempu ei e coho lo subi bai ariba mescos cu un biná, i lenga dje muda lo sclama di alegria.”—Isaías 35:5, 6a.

10, 11. Di con e palabranan di Isaías mester tin un nificacion spiritual pa e hudiunan cu ta regresá, i kico nan ta implicá?

¹⁰ Evidentemente Jehova tin e condicion spiritual di su pueblo na mente. Pa nan apostasia anterior nan a ser castigá cu 70 aña di exilio. Pero tog, Jehova su disiplina no a incluí laga nan bira ciegu, surdu, coho i muda. Pues, pa restorá Israel no tabata necesario cura desabilidadnan físico. Jehova ta restorá loke nan a perde, esta, salú spiritual.

¹¹ Hudiunan arepentí ta ser curá den e sentido cu nan ta recuperá nan sentidonan spiritual: nan vision spiritual i nan abilidad di tende e palabra di Jehova, i di obedec’é i papi’é. Nan ta bira conciente di nan necesidad di pega na Jehova. Mediante nan conducta excelente, nan ta “sclama” den alabansa gososo di nan Dios. Esun cu anteriormente tabata “coho” ta bira ansioso i enérgico den su adoracion di Jehova. Figurativamente, lo e “subi bai ariba mescos cu un biná.”

Jehova Ta Refrescá Su Pueblo

12. Te na ki grado Jehova lo bendicioná e tera cu awa?

¹² Ta difícil pa imaginá un paradijs sin awa. E Paradijs original den Eden tabatin un abundancia di awa. (Génesis 2:10-14) E tera cu Dios a duna Israel tambe tabata “un tera di rooi di awa, fontein i profundidadnan di awa cu ta sali.” (Deuteronomio 8:7) P’esei ta na su lugá cu Isaías ta haci e promesa refrescante aki: “Den e desierto awa lo a brota, i riunan den e yanura di desierto. I e suela kimá di calor lo a bira manera un plas di awa yen di caña, i e suela cu tin sed manera fonteinnan di awa. Den e lugá di habitacion di chacal, un lugá di descanso pa nan, lo tin yerba berde cu caña i mata di papiro.” (Isaías 35:6b, 7) Ora cu e israelitanan bolbe cuminsá cuida e tera, e áreanan desolá caminda un tempu chacal tabata cana rond, lo ta cubrí cu mata berde i abundante. Suela secu i yen di stòf lo ser transformá den “un moeras” caminda mata di papiro i otro sorto di caña di awa ta crece.—Job 8:11.

13. Ki awa spiritual abundante lo tin disponibel pa e nacion restorá?

¹³ Pero mas importante ta e awa spiritual di e berdad, cu e hudiunan repatriá lo disfrutá di dje na abundancia. Jehova lo percurá conocimentu, animacion i consuelo via su Palabra. Ademas, fiel anciano i prins lo ta manera “riu di awa den un tera secu.” (Isaías 32:1, 2) Esnan cu ta promové adoracion puru, manera Ésdras, Ageo, Jesua, Nehemías, Zacarías, Zorobabel, lo ta realmente un testimonio bibu dje cumplimentu di e profecia di Isaías.—Ésdras 5:1, 2; 7:6, 10; Nehemías 12:47.

“E Caminda di Santidad”

14. Describí e biahe entre Babilonia i Jerusalem.

¹⁴ Pero, promé cu e hudiunan exiliá por disfrutá di tal condicionnan paradísico den sentido físico i spiritual, nan lo tin cu haci e biahe largu i peligroso for di Babilonia pa Jerusalem. Si nan tuma e ruta directo, esei lo nificá pasa dor di un 800 kilometer di tereno secu i inhospitalario. Un ruta ménos difícil lo a encerá biaha 1.600 kilometer. Ámbos ruta lo a nificá exponé nan mes pa lunanan largu na condicionnan difícil di weer i den peliger di topa tantu bestia salbahe como hende feros. Pero tog esnan cu tabatin fe den e profecia di Isaías lo no tabata demasiado preocupá. Di con?

15, 16. (a) Ki proteccion Jehova ta percurá pa hudiunan fiel riba nan biahe di regreso pa cas? (b) Den ki otro sentido Jehova ta percurá un caminda sin peliger pa e hudiunan?

¹⁵ Via Isaías, Jehova ta primintí: “Sigur lo yega di tin un caminda grandi einan, sí, un caminda; i lo e ser yamá e Caminda di Santidad. Esun impuru lo no pasa riba dje. I lo e ta pa esun cu ta cana riba e caminda, i ningun hende bobo lo cana dual riba dje. Ningun leon lo resultá di ta einan i e bestianan salbahe feros lo no subi riba dje. Ningun lo ser hañá einan; i esnan cumprá bek tin cu cana einan.” (Isaías 35:8, 9) Jehova a pidi su pueblo bek! Nan ta “esnan cumprá bek” di dje, e ta garantisá nan cu lo e protehá nan riba nan caminda di regreso pa cas. Tin un caminda literal, asfaltá cu piedra, elevá i cerá cu waya for di Babilonia pa Jerusalem? No, pero ta asina sigur cu Jehova lo protehá su pueblo durante e biahe cu ta como si fuera nan ta riba un caminda asina.—Compará cu Salmo 91:1-16.

¹⁶ Tambe e hudiunan ta ser protehá di peligernan spiritual. E caminda grandi figurativo ta “e Caminda di Santidad.” Esnan cu ta falta respet pa cosnan sagrado of cu ta impuru den sentido spiritual, no ta cualificá pa biaha riba dje. Nan no ta bon biní den e tera restorá. Esnan aprobá tin e motivacion corecto. Nan no ta regresá Huda i Jerusalem den un spiritu di orguyo nacionalista ni pa sigui tras di interesnan personal. Hudiunan cu mente spiritual ta realisá cu e motibu principal di nan regreso ta pa reestablecé e adoracion puru di Jehova den e tera ei.—Ésdras 1:1-3.

E Pueblo di Jehova Ta Alegrá

17. Con e profecia di Isaías a consolá hudiunan fiel durante e periodo largu di nan exilio?

¹⁷ Capítulo 35 dje profecia di Isaías ta terminá den un forma alegre: “Esnan rescatá dor di Jehova lo bolbe bek i lo yega sigur na Síon cu un gritu di goso; i lo tin alegria te na tempu indefiní riba nan cabes. Gran alegria i goso nan lo alcansá, i tristesa i suspiro tin cu hui bai.” (Isaías 35:10) Kisas e hudiunan den cautiverio cu a busca consuelo i speransa den e profecia aki durante nan exilio, a puntra nan mes con su vários detayenan lo a cumpli. Probablemente nan no a comprendé hopi aspecto dje profecia. Sin embargo, un cos tabata bon cla: nan lo a ‘bolbe bek i yega sigur na Síon.’

18. Den ki sentido tristesa i suspiro den Babilonia ta ser remplasá pa gran alegria i goso den e tera restorá?

¹⁸ Pues, na aña 537 P.E.C., un 50.000 homber (entre nan mas cu 7.000 catibu) huntu cu hende muher i mucha ta haci e biahe di cuater luna pa bai bek Jerusalem, cu pleno confiansa den Jehova. (Ésdras 2:64, 65) Djis un par di luna despues, nan a reedificá Jehova su altar, como un paso preliminar pa reconstruí e tempel completo. Isaías su profecia di 200 aña bieu ta cumpli. E nacion su tristesa i suspiro tempu e tabata den Babilonia, ta ser remplasá pa gran alegria i goso den e pais restorá. Jehova a cumpli cu su promesa. A restorá e Paradijs, tantu literal como spiritual!

Un Nacion Nobo Ta Nace

19. Pakico mester bisa cu e profecia di Isaías tabatin solamente un cumplimentu limitá den siglo 6 P.E.C.?

¹⁹ Claro cu e cumplimentu di Isaías capítulo 35 den siglo 6 P.E.C. ta limitá. E condicionnan paradísico cu e hudiunan repatriá a disfrutá di dje, no a dura. Cu tempu, siñansanan religioso falsu i nacionalismo ta contaminá adoracion puru. Spiritualmente, e hudiunan ta bolbe experenciá tristesa i suspiro. Al final, Jehova ta rechasá nan como su pueblo. (Mateo 21:43) Dor cu nan ta bolbe bira desobediente, nan goso no ta permanente. Tur esaki ta indicá cu Isaías capítulo 35 lo tin un cumplimentu mas, unu mas grandi.

20. Cua Israel nobo a nace den promé siglo E.C.?

²⁰ Na Jehova su debido tempu a nace un otro Israel, unu spiritual. (Galationan 6:16) Jesus a prepará caminda pa e nacementu dje Israel nobo aki durante su ministerio terenal. El a restorá adoracion puru, i cu su siñansa, awa di e berdad a bolbe cuminsá core. El a cura esnan enfermo, tantu físicamente como spiritualmente. Tin un sclamacion gososo segun cu ta proclamá e bon nobo dje Reino di Dios. Shete siman despues di su morto i resureccion, Jesus glorificá a establecé e congregacion cristian, un Israel spiritual cu a consistí di hudiu i otro personanan rescatá dor di Jesus su sanger dramá, engendrá como yu spiritual di Dios i ruman di Jesus, i ungí dor di spiritu santu.—Echonan 2:1-4; Romanonan 8:16, 17; 1 Pedro 1:18, 19.

21. Relacioná cu e congregacion cristian di promé siglo, ki sucesonan nos por considerá como un cumplimentu di cierto rasgonan dje profecia di Isaías?

²¹ Apostel Pablo a referí na e palabranan di Isaías 35:3 ora el a skirbi e miembronan di Israel spiritual, bisando: “Stret man cu ta cologá i rudia swak.” (Hebreonan 12:12) Pues evidentemente, den promé siglo E.C., tabatin un cumplimentu dje palabranan di Isaías capítulo 35. Den un sentido literal, Jesus i su disipelnan milagrosamente a duna bista na hende ciegu i oido na hende surdu. Nan a pone ‘coho’ cana i a yuda hende muda recuperá nan abla. (Mateo 9:32; 11:5; Lucas 10:9) Pero mas importante ta cu hende di bon curason a scapa di religion falsu i a bin disfrutá di un paradijs spiritual den e congregacion cristian. (Isaías 52:11; 2 Corintionan 6:17) Mescos cu den caso dje hudiunan cu a regresá for di Babilonia, esnan cu a scapa a ripará cu ta esencial pa bo tin curashi i un actitud positivo.—Romanonan 12:11.

22. Con cristiannan sincero cu tabata busca e berdad den tempu moderno a bai den cautiverio babilónico?

²² Ke tal di nos tempu? E profecia di Isaías tin un cumplimentu mas, unu mas completo cu ta encerá e congregacion cristian djawe? Sí. Despues di morto dje apostelnan, e cantidad di cristian ungí berdadero a mengua hopi, i cristiannan falsu, “mal yerba,” a florecé riba esena mundial. (Mateo 13:36-43; Echonan 20:30; 2 Pedro 2:1-3) Asta ora cu durante siglo 19, personanan sincero a cuminsá separá nan mes for di cristiandad i busca adoracion puru, tog nan comprendimentu a keda contaminá cu siñansanan no-bíblico. Na 1914, Jesus a ser entronisá como Rey Mesiánico, pero djis despues cos a pinta scur pa e personanan sincero aki cu tabata busca e berdad. Cumpliendo cu profecia, e nacionnan ‘a haci guera contra nan i a vence nan,’ i nan a stroba e intentonan dje cristiannan berdadero aki pa predicá e bon nobo. De echo, nan a bai den cautiverio babilónico.—Revelacion 11:7, 8.

23, 24. Den ki manera e palabranan di Isaías a cumpli den e pueblo di Dios desde 1919?

²³ Sin embargo, na 1919 cos a cambia. Jehova a saca su pueblo for di cautiverio. Nan a cuminsá rechasá siñansanan falsu cu anteriormente a contaminá nan adoracion. Como resultado, nan a experenciá un curacion. Nan a drenta den un paradijs spiritual cu te awe ta sigui plama rond mundu. Den un sentido spiritual, nan ta siña e ciegunan mira i e surdunan tende, esta, nan ta hopi alerto pa e manera cu Dios su spiritu santu ta obra i semper conciente dje necesidad di pega na Jehova. (1 Tesalonicensenan 5:6; 2 Timoteo 4:5) Como cu cristiannan berdadero no ta muda mas, nan ta ansioso pa “sclama,” declarando e berdadnan bíblico na otro hende. (Romanonan 1:15) Esnan cu tabata spiritualmente débil, esta “coho,” awor ta desplegá celo i goso. Den sentido figurativo, nan por “subi bai ariba mescos cu un biná.”

²⁴ E cristiannan curá aki ta cana riba “e Caminda di Santidad.” E “Caminda” aki, cu ta sali for di Babilonia e Grandi bai na un paradijs spiritual, ta habrí pa tur adoradó spiritualmente limpi. (1 Pedro 1:13-16) Nan por conta cu Jehova lo protehá nan i ta sigur cu Satanas su atakenan bestial pa eliminá adoracion berdadero lo no tin éxito. (1 Pedro 5:8) Lo no permití esnan desobediente ni ken cu ta comportá nan mes manera bestia salbahe contaminá esnan cu ta riba Dios su caminda di santidad. (1 Corintionan 5:11) Den e ambiente protehá aki, esnan cu Jehova rescatá—ungí i “otro carné”—ta haña goso den sirbi e único Dios berdadero.—Juan 10:16.

25. Isaías capítulo 35 lo cumpli den sentido físico? Splica.

²⁵ Kico di futuro? E profecia di Isaías lo cumpli un dia den sentido físico? Sí. E curacionnan milagroso cu Jesus i su apostelnan a efectuá den promé siglo a demostrá cu Jehova tin e deseo i abilidad pa efectuá tal curacion na gran escala den futuro. E Salmonan inspirá ta papia di bida eterno den condicionnan pacífico riba tera. (Salmo 37:9, 11, 29) Jesus a primintí bida den Paradijs. (Lucas 23:43) Bijbel completo, for di e promé te último buki, ta duna speransa di un paradijs literal. N’e tempu ei, lo cura hende ciegu, surdu, coho i muda físicamente i permanentemente. Tristesa i suspiro lo hui bai. Realmente lo tin alegria pa tempu indefiní, sí pa semper.—Revelacion 7:9, 16, 17; 21:3, 4.

26. Con e palabranan di Isaías ta fortalecé cristiannan djawe?

²⁶ Miéntras cu cristiannan berdadero ta warda e restoracion dje Paradijs terenal, nan ta disfrutá for di awor di bendicionnan dje paradijs spiritual. Nan ta confrontá prueba i tribulacion cu optimismo. Cu confiansa inkebrantabel den Jehova, nan ta animá otro, obedeciendo e animacion: “Boso fortalecé e mannan débil i haci e rudianan cu ta tambaleá firme. Bisa esnan cu tin ansiedad di curason: ‘Sea fuerte. No tene miedu.’” Nan tin pleno confiansa den e garantia profético: “Mira! Boso Dios mes lo bini cu vengansa, sí, Dios asta cu un pago. E mes lo bini i salba boso.”—Isaías 35:3, 4.

[Nota]

[Plachi di henter página na página 370]

[Plachi na página 375]

Lugánan di desierto ta bira lugánan bon muhá, cu mata di caña i di papiro

[Plachi na página 378]

Jesus a cura hende enfermo, tantu físicamente como spiritualmente