Kon pa Mehorá e Arte di Kòmbersá

PA BO ta fásil pa kòmbersá ku otro hende? E idea so di kuminsá un kòmbersashon, foral ku hende ku nan no konosé, ta hasi hopi hende nervioso. Hende asina podisé ta tímido. Kisas nan ta puntra nan mes: ‘Di kiko mi tin ku papia? Kon mi ta kuminsá? Kon mi por sigui ku e kòmbersashon?’ Di otro banda, tin hende masha sosial i sigur di nan mes. Dor di esei nan tin e tendensia di dominá un kòmbersashon. Den nan kaso, kisas nan tin problema pa laga otro hende ekspresá nan mes i pa siña skucha loke ta ser bisá. Nos tur anto, sea nos ta tímido òf sosial, tin ku sigui kultivá e arte di kòmbersá.

Pa mehorá bo arte di kòmbersá, pakiko bo no ta kuminsá na kas? Kòmbersashon edifikante por kontribuí hopi na e felisidat di un famia.

E kos prinsipal pa bo por tene tal kòmbersashon ta ku bo mester ta profundamente interesá den otro hende. (Deu. 6:6, 7; Pro. 4:1-4) Ora nos ta interesá den un hende, nos ta ekspresá nos mes i tambe nos ta skucha ora e otro persona kier bisa algu. Un otro faktor importante ta pa nos tin algu di bisa ku ta bale la pena. Si nos tin un programa personal di lesa i studia Beibel, nos lo tin hopi kos di papia ariba. Bon uso di e foyeto Eksaminando e Skritura Diariamente por stimulá kòmbersashon. Podisé durante dia nos tabatin un dushi eksperensia den sirbishi di vèlt òf nos a lesa algu informativo òf prèt. Si nos hasié un kustumber di inkluí e kosnan aki den kòmbersashonnan sano di famia, esei lo yuda nos kòmbersá tambe ku hende pafó di e sírkulo di famia.

Hopi hende ta vasilá pa kuminsá un kòmbersashon ku un persona ku nan no konosé. Pero Testigunan di Yehova tin un gran amor pa Dios i pa nan próhimo, p’esei nan ta hasi un esfuerso sinsero pa siña kòmbersá ya asina nan por kompartí bèrdatnan bíbliko ku otro hende. Kiko por yuda bo mehorá riba e tereno aki?

E prinsipio ku tin na Filipensenan 2:4 ta balioso, pasobra ei Beibel ta animá nos pa ‘no buska nos interes personal so, ma buska tambe interes di otronan.’ Wak e di e ángulo aki: Si nunka promé bo no a topa e persona, e ta konsiderá bo un hende deskonosí. Kon bo por trankilis’é? Un sonrisa kariñoso i un saludo amabel lo yuda, pero esei no ta basta.

Podisé e persona tabata pensa riba algu, i bo a interumpié. Si bo ta purba kòmbersá kuné tokante bo pensamentunan sin preokupá ku loke ta su pensamentunan, lo e reakshoná bon? Kiko Hesus a hasi ora ku el a topa un hende muhé na un pos na Samaria? E muhé aki su mente tabata riba saka awa for di e pos. Hesus a kuminsá kòmbersá kuné riba e tema ei, i poko despues esei a bira un kòmbersashon animá di karakter spiritual.—Huan 4:7-26.

Si bo ta un bon opservadó, bo tambe por tin un idea riba kiko e hende ta pensa. E persona su kara ta tristu òf kontentu? E ta di edat avansá, i kisas enfermo? Bo ta mira evidensia ku e kas tin mucha? E doño di kas ta parse bon pará òf e ta lucha pa haña su pan di kada dia? E dekorashon di kas òf e hoyanan di e persona ta indiká un influensia religioso? Si for di den bo palabranan di saludo bo ta tene kuenta ku e tipo di kosnan ei, lo ta mas fásil pa e persona mira ku boso tin interesnan en komun.

Si bo no ta kara-kara ku e doño di kas, pero ta tende su stèm so tras di un porta di lòk, kiko bo por konkluí? Podisé e persona ta biba den miedu. Lo bo por usa e informashon ei pa kuminsá un kòmbersashon kuné maske e porta ta será?

Na algun lugá ta posibel pa bo habri un kòmbersashon ku un persona dor di kont’é algu tokante bo mes: bo orígen, dikon bo a bini na su porta, dikon bo ta kere den Dios, pakiko bo a kuminsá studia Beibel i e manera ku Beibel a yuda bo. (Echo. 26:4-23) Ta klaru ku bo tin ku hasi esaki ku takto i sin pèrdè bo meta for di bista. Esaki na su turno por motivá e persona pa konta bo algu tokante su mes i kiko e ta pensa di sierto kosnan.

Den algun kultura ta un kustumber pa mustra hospitalidat na hende deskonosí. Mesora hende ta invitá bo pa pasa paden i kai sinta. Si unabes ku bo ta sintá bo puntra na un manera kortes kon ta ku e famia i bo skucha ku atenshon n’e kontesta, e doño di kas kisas ta mustra e mesun atenshon na loke abo tin di bisa. Otro pueblonan ta hopi mas interesá den bishitante, lokual ta nifiká ku durante bo saludonan di introdukshon—ku por ta basta largu—e persona kisas ta ripará ku e tin algu en komun ku bo. Esaki por hiba na un kòmbersashon spiritual probechoso.

Pero kiko si tin hopi hende den bo área ku ta papia un idioma distinto for di esun di bo. Kon bo por kuminsá un kòmbersashon ku e hendenan aki? Si bo siña maske ta un saludo simpel den algun di e idiomanan ei, e hendenan lo realisá ku bo ta interesá den nan. Esaki por habri kaminda pa un komunikashon mas amplio.

Pa sigui ku un kòmbersashon, bo mester ta interesá den loke e otro persona ta pensa. Anim’é p’e ekspresá su mes si e ta deseá esei. Preguntanan bon pensá ta masha útil, foral esnan pa haña sa su opinion, pasobra generalmente bo no por kontestá nan ku djis un sí òf nò. Por ehèmpel, despues di a menshoná un problema lokal ku ta preokupá e hendenan, lo bo por puntra: “Kiko bo ta kere a kousa e situashon aki?” òf: “Kiko bo ta kere ta e solushon?”

Ora bo hasi un pregunta, skucha e kontesta ku atenshon. Indiká ku un palabra, ku bo kabes òf ku un gesto ku di bèrdat bo ta interesá. No interumpí e persona. Pensa ku mente habrí riba loke e ta bisando. Sea “lihé pa tende, no lihé pa papia.” (Sant. 1:19) Anto ora bo kontest’é, mustra ku di bèrdat bo a skucha loke el a bisa.

Sin embargo, tene kuenta ku no ta tur hende lo kontestá bo preguntanan. Tin hende ta solamente hisa nan wènkbrou òf hari ku bo. Otronan ta djis bisa sí òf nò. En bes di sinti bo frustrá, tene pasenshi i no purba fòrsa nan pa kòmbersá. Si e persona ta dispuesto pa tende, probechá kompartí algun pensamentu bíbliko edifikante. Ku tempu, podisé e persona por kuminsá mira bo komo un amigu i lo e ta dispuesto pa ekspresá su mes mas libremente.

Ora bo ta papia ku hende, prepará pa rebishitá nan den futuro. Si un persona hasi vários pregunta, kontestá algun di nan pero laga un òf dos pa e siguiente biaha. Ofresé pa bo bai buska e kontesta i despues bin kompartí e resultado kuné. Si e doño di kas no hasi niun pregunta, abo lo por konkluí bo kòmbersashon ku un pregunta ku bo ta kere lo interes’é. Ofresé pa dun’é e kontesta na e siguiente bishita. Bo por haña tur tipo di idea den e buki Rasonamentu for di e Skritura, e foyeto Kico Dios Ta Rekerí di Nos? i den edishonnan resien di E Toren di Vigilansia i Spièrta!

Ora bo topa un otro Testigu di Yehova pa promé bes, bo ta purba sera konosí kuné òf bo ta djis keda ketu? Amor pa nos rumannan mester motivá nos pa konosé nan. (Huan 13:35) Kon bo por kuminsá? Lo bo por djis bisa bo nòmber i puntra e otro persona su nòmber. Si bo puntr’é kon el a konosé e bèrdat, esei generalmente lo hiba na un kòmbersashon interesante ku lo yuda boso siña konosé otro. Asta si loke bo ta bisa no ta parse di sali vlòt, bo esfuerso ta mustra e persona ku bo ta interesá den dje, i esei ta loke ta importante.

Kon bo por tene un kòmbersashon signifikativo ku un miembro di bo kongregashon? Mustra berdadero interes den e persona i den su famia. Reunion a kaba? Komentá riba puntonan ku bo a haña práktiko. Boso tur dos por benefisiá di esaki. Lo bo por menshoná un punto interesante for di un edishon resien di E Toren di Vigilansia òf Spièrta!, no pa broma òf pa tèst e ruman, sino pa kompartí algu ku realmente bo a gusta. Lo bo por papia tokante un parti ku un di boso tin den e Skol di Ministerio Teokrátiko i interkambiá idea enkuanto kon pa present’é. Tambe boso por konta otro e eksperensianan ku boso tabatin den sirbishi di vèlt.

Klaru ku nos interes den hende hopi bes ta hiba na kòmbersashon riba hende: kiko nan a bisa i hasi. Kos prèt tambe por ta parti di nos kòmbersashon. Pero loke nos ta bisa ta edifikante? Esei sigur lo ta e kaso si nos ta tuma e konsehonan di e Palabra di Dios na pechu i ta ser motivá pa amor kristian.—Pro. 16:27, 28; Efe. 4:25, 29; 5:3, 4; Sant. 1:26.

Nos ta prepará promé ku nos bai den sirbishi di vèlt. Asina tambe, dikon no pensa di antemano riba un tema interesante pa kòmbersá ku nos amigunan? Ora bo lesa òf tende algu interesante, hasi un nota mental di puntonan ku lo bo kier kompartí ku otro hende. Ku tempu, lo bo tin un abundansia di idea pa skohe for di dje i lo bo no tin ku keda kontentu ku djis bisa algu general di bida diario. Pero mas ku tur kos, laga bo papiá mustra kon presioso e Palabra di Dios ta pa bo!—Sal. 139:17.