Kiko Tur e Kosnan Aki Ta Nifiká?

HESUKRISTU a bisa: “E fin di tempu,” òf konklushon di e sistema di kosnan, ta loke lo a ser identifiká pa guera, skarsedat di kuminda, pestilensia i temblor.—Mateo 24:1-8; Lukas 21:10, 11.

For di aña 1914, guera entre nashonnan i entre gruponan étniko a daña hende su bida. Hopi bes esei tabata debí na metementu den polítika di parti di miembronan di klero, i último tempu ta debí na atakenan terorista tur kaminda.

Apesar di progreso sientífiko den produkshon di alimento, sientos di miónes di hende mundialmente ta konfrontá skarsedat ekstremo di kuminda. Tur aña miónes di hende ta muri dor di skarsedat di kuminda.

Pestilensia, es desir, epidemianan grandi di malesa kontagioso, tambe ta parti di e señal ku Hesus a duna. Despues di Promé Guera Mundial un epidemia di grip a kosta bida di mas ku 21.000.000 hende. Distinto for di plaganan ku den pasado tabata afektá solamente sierto áreanan limitá, e epidemia ei a afektá nashonnan rònt mundu i tambe islanan hopi aislá. Awor ta AIDS ta asotá e planeta, i plaganan manera tuberkulósis, malaria, dengue i malesa di Chagas ta sigui afektá hende den paisnan den desaroyo.

Segun informe, tin desénas di míles di temblor di vários intensidat tur aña. Apesar di e ekipo ku tin disponibel i e mihó métodonan di raportá temblor, desasternan kousa pa temblor den áreanan hopi poblá ta frekuentemente den notisia.

Tambe Beibel a profetisá: “Sabi esaki, ku den e último dianan tempunan trabahoso lo bin. Pasobra hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder; evitá e sorto di hendenan aki.”—2 Timoteo 3:1-5.

Bo tambe no ta haña ku nos ta biba den “tempunan trabahoso”?

Bo a ripará ku hende—na un manera eksagerá—ta stimadó di nan mes, stimadó di plaka i motivá pa orguyo?

Ken lo nenga ku mundu ta yen di hende ku ta eksigente pero ingrato, irekonsiliabel i impio òf desleal?

Bo ta konsiente ku desobedensia na mayornan huntu ku un falta spantoso di amor a oumentá drástikamente, no solamente den algun lugá pero rònt mundu?

Sin duda bo ta realisá ku nos ta biba den un mundu ku stima plaser, pero ku no ta stima loke ta bon. Ta asina Beibel ta deskribí aktitutnan ku lo a reina den “e último dianan.”

Nos mester di mas prueba pa por identifiká e tempu den kua nos ta biba? Hesus a profetisá tambe ku durante e mesun tempu ei, e evangelio òf bon notisia di e Reino di Dios lo a ser prediká den henter mundu. (Mateo 24:14) Esei ta tumando lugá?

E Toren di Vigilansia, un revista basá riba Beibel i ku ta dediká na anunsiá e bon notisia di e Reino di Yehova, ta ser imprimí regularmente den mas idioma ku kualke otro revista.

Tur aña, Testigunan di Yehova ta dediká mas ku mil mion ora na prediká personalmente na otro hende tokante e Reino di Dios.

Aktualmente nan ta publiká literatura ku ta splika Beibel den aproksimadamente 400 idioma, asta den idioma di poblashonnan chikí i hopi aislá. Testigunan di Yehova ta hiba e bon notisia na tur nashon; tambe nan ta prediká na hopi isla i teritorio ku ta muchu chikí pa ta di importansia den e mundu polítiko. Den mayoria pais, nan ta efektuá un programa regular di edukashon bíbliko.

Sí, e bon notisia di e Reino di Dios ta ser prediká den henter mundu, no pa kombertí mundu, sino pa duna un testimonio. Hende na tur parti ta haña e oportunidat pa mustra si nan ta interesá pa sa ken a krea shelu i tera i si nan lo mustra rèspèt pa su leinan i demostrá amor pa nan próhimo.—Lukas 10:25-27; Revelashon 4:11.

Pronto e Reino di Dios lo eliminá tur maldat for di riba tera i hasié un paradeis mundial.—Lukas 23:43.

[Kuadro na página 6]

E Último Dianan di Kiko?

No ta e último dianan di humanidat. Beibel ta ofresé esnan ku ta hasi e boluntat di Dios e speransa di biba pa semper.—Juan 3:16, 36; 1 Juan 2:17.

No ta e último dianan di planeta Tera. E Palabra di Dios ta primintí ku e tera habitá lo permanesé pa semper.—Salmo 37:29; 104:5; Isaias 45:18.

Mas bien, ta e último dianan di e sistema di kosnan violento i sin amor aki i di e hendenan ku ta tene duru na e práktikanan di e sistema aki.—Proverbionan 2:21, 22.

[Kuadro/Plachi na página 7]

Beibel Realmente Ta e Palabra di Dios?

Bes tras bes profetanan di Beibel a skirbi: “Asina SEÑOR [Yehova] ta bisa.” (Isaias 43:14; Jeremias 2:2) Asta Hesukristu, e Yu di Dios, a enfatisá ku ‘e palabranan ku el a papia no ta di su mes.’ (Juan 14:10) Beibel mes ta bisa bon kla: “Tur Skritura ta inspirá pa Dios.”—2 Timoteo 3:16.

Segun informe di e Sosiedatnan Uní di Beibel, no tin ningun otro buki publiká den asina tantu idioma: mas ku 2.200. Ningun otro buki tin un sirkulashon asina grandi: awor mas ku kuater mil mion ehemplar. No ta esei ta loke lo bo spera di un mensahe di Dios ku ta pa henter humanidat?

Pa un konsiderashon mas kompletu di e evidensianan ku Beibel ta inspirá pa Dios, wak e buki E Bijbel—e Palabra di Dios of e palabra di hende?, publiká dor di Testigunan di Yehova.

Lo bo saka masha hopi benefisio si bo lesa Beibel i rekonosé e echo ku e ta realmente e Palabra di Dios.

[Kuadro/Plachi na página 8]

Kiko e Reino di Dios Ta?

E ta e gobièrnu spesial ku e Dios berdadero, Yehova, Kreadó di shelu i tera, a instituí den shelu.—Jeremias 10:10, 12.

Beibel ta menshoná Hesukristu komo esun na ken Dios ta duna e outoridat ei di goberná. (Revelashon 11:15) Tempu ku Hesus tabata riba tera, el a demostrá ku ya kaba el a haña outoridat remarkabel for di Dios, outoridat ku a permitié kontrolá bientu ku laman, kura tur sorto di malesa i asta lanta morto. (Mateo 9:2-8; Marko 4:37-41; Juan 11:11-44) Profesia bíbliko inspirá a bisa ku tambe Dios lo a dun’é “dominio, gloria i un reino, pa tur pueblo, nashon i hende di tur idioma por sirbié.” (Daniel 7:13, 14) Beibel ta yama e gobièrnu ei e Reino di shelu; ta for di shelu Hesukristu ta ehersé su gobernashon awor.

[Plachi na página 7]

Predikashon mundial di e bon notisia