Dikon Nos Mester Respetá Outoridat?

1, 2. (a) Ki lucha nos tin relashoná ku outoridat? (b) Ki preguntanan nos lo konsiderá?

BO A yega di wak kon un mucha chikitu ta reakshoná ora ku su tata òf su mama pidié hasi algu ku e no tin gana di hasi? Bo por mira riba su kara ku e tin un lucha den su kurason. E ta tende e stèm di su mayor i sa ku e tin ku respetá su outoridat. Pero e biaha akí, gewon e no tin gana di obedesé. Su lucha ta ilustrá algu ku de bes en kuando ta pasa ku nos tur.

² No ta semper fásil pa nos respetá outoridat. Abo a yega di tin problema pa respetá personanan ku tin un grado di outoridat riba bo? Wèl, bo no ta e úniko. Nos ta biba den un tempu ku aparentemente tin ménos rèspèt pa outoridat ku nunka promé. Sinembargo, Beibel ta bisa ku nos tin ku mustra rèspèt pa hende ku tin outoridat. (Proverbionan 24:21) De echo, ta sumamente importante pa nos hasi esei si nos ke keda den e amor di Dios. Esaki ta lanta algun pregunta. Dikon ta asina difísil pa nos respetá outoridat? Dikon Yehova ta rekerí esaki di nos, i kiko lo yuda nos obedes’é? Por último, kua ta algun manera ku nos por mustra rèspèt pa outoridat?

3, 4. Kon piká i imperfekshon a kuminsá, i kon nos naturalesa pekaminoso ta stroba nos di respetá outoridat?

³ Laga nos konsiderá brevemente dos motibu dikon ta asina difísil pa nos respetá hende ku tin outoridat. Di promé, nos ta imperfekto, i di dos, e hendenan ku ta ehersé outoridat tambe ta imperfekto. Nos piká i imperfekshon a kuminsá hopi tempu pasá ora Adam ku Eva a rebeldiá kontra e outoridat di Dios den e hòfi di Edén. Pues, piká a kuminsá ku rebelion. I te awe nos ta nase ku e tendensia di rebeldiá.—Génesis 2:15-17; 3:1-7; Salmo 51:5; Romanonan 5:12.

⁴ Debí na nos naturalesa pekaminoso, mayoria di nos fásilmente por bira orguyoso i arogante. Ma di otro banda, nos tin ku traha duru pa desaroyá i mantené humildat. Asta despues di sirbi Dios fielmente pa hopi aña, nos por bira kabesura i orguyoso. Tuma por ehèmpel Kore, kende a biba den tempu di Moises. El a sostené e pueblo di Dios fielmente durante hopi difikultat. Sinembargo, el a kuminsá anhelá mas outoridat i tabatin e tribilidat di enkabesá un rebelion kontra Moises, e hòmber mas mansu di e tempu ei. (Numbernan 12:3; 16:1-3) Pensa tambe riba Rei Uzias; su orguyo a pon’é drenta e tèmpel di Yehova i efektuá un tarea sagrado ku saserdote so tabatin mag di hasi. (2 Krónikanan 26:16-21) E dos hòmbernan ei a paga karu pa nan rebelion. Pero nan mal ehèmpel ta un bon rekordatorio pa nos tur. Nos tin ku lucha kontra orguyo, pasobra ta bira difísil pa nos respetá outoridat si nos tin e aktitut ei.

 5. Kon hende imperfekto a hasi mal uso di nan outoridat?

⁵ Di otro banda, ta hende imperfekto den puesto di outoridat mes a pone ku ta reina un falta di rèspèt pa outoridat. Hopi di nan tabata kruel, abusadó òf diktatorial. De echo, historia humano ta básikamente un relato di mal uso di poder. (Eklesiástes 8:9) Por ehèmpel, Saul tabata un bon hende, un hòmber humilde, ora ku Yehova a skoh’é pa bira rei. Ma el a laga orguyo i envidia domin’é i a bai persiguí fiel David. (1 Samuel 9:20, 21; 10:20-22; 18:7-11) Mas despues, David a bira un di e mihó reinan ku Israel tabatin. Sinembargo, el a hasi mal uso di su poder ora ku el a drumi ku e esposa di Urías, e heteo, i despues a manda e hòmber inosente ei den e fila mas dilanti di bataya pa nan mat’é. (2 Samuel 11:1-17) Pues, ta bisto ku debí na imperfekshon ta difísil pa hende usa e poder ku nan tin na un manera korekto. Anto esei ta bira pió ora esnan na poder no ta respetá Yehova. Despues ku un polítiko britániko a deskribí e manera ku algun papa katóliko a start ku un persekushon na gran eskala, el a skirbi: “Poder tin tendensia di korumpí, i poder apsoluto ta korumpí na un grado apsoluto.” En bista di e historia akí di hende su mal uso di outoridat, kisas nos ta puntra nos mes: Dikon nos mester respetá outoridat?

6, 7. (a) Kiko nos amor pa Yehova ta motivá nos pa hasi, i dikon? (b) Kon nos ta demostrá un aktitut sumiso?

⁶ E tres motibunan prinsipal pa respetá outoridat ta motivá pa amor: amor pa Yehova, pa nos próhimo i pa nos mes. E promé motibu ta ku nos ta stima Yehova mas ku tur kos; pues, nos ke hasi su kurason kontentu. (Proverbionan 27:11; Marko 12:29, 30) Nos sa ku Yehova su soberania, es desir, su derecho di goberná e universo, a ser kuestioná riba tera desde e rebelion den Edén. Nos a siña tambe ku mayoria di humanidat a tuma parti pa Satanas i a rechasá e gobernashon di Yehova. Pero, pa loke ta nos, gustosamente nos ta skohe pa apoyá e soberania di Yehova. P’esei nos ta sinti nos masha konmoví ora nos lesa e palabranan ku ta proklamá e mahestat di Yehova na Revelashon 4:11. Pa nos, ta bisto ku Yehova ta e Gobernante legítimo di universo! Di henter nos kurason nos ta apoyá su soberania i ta aseptá p’e dirigí nos den nos bida diario.

⁷ Awor bon, respetá Yehova ta nifiká mas ku obedes’é so. Nos ta kla pa hasi loke e ta bisa nos pasobra nos ta stim’é. Ma lo tin biaha ku, meskos ku e mucha menshoná na prinsipio, ta masha difísil pa nos obedes’é. Na e okashonnan ei, nos lo tin ku siña mustra sumishon. Nos ta kòrda ku Hesus a someté su mes na e boluntat di su Tata, asta ora tabata parse masha difísil pa e hasi esei. El a bisa Yehova: “No laga mi boluntat, sino di bo sosodé.”—Lukas 22:42.

 8. (a) Sumishon na e outoridat di Yehova ta enserá kiko awe, i kiko Yehova ta pensa di esaki? (b) Kiko por yuda nos skucha konseho i aseptá disiplina? (Wak e kuadro “Skucha Konseho i Aseptá Disiplina.”)

⁸ Klaru ku awe Yehova no ta papia ku kada un di nos direktamente; e ta usa su Palabra i su representantenan riba tera. Pues, mayoria di biaha nos ta mustra sumishon na e outoridat di Yehova ora nos ta respetá e hendenan ku el a pone, òf ta permití keda, den puesto di outoridat. Nos lo ofendé Dios si nos mester rebeldiá kontra e personanan ei, por ehèmpel, ora nos ta nenga di aseptá nan konseho i korekshon bíbliko. Ora e israelitanan a murmurá i rebeldiá kontra Moises, Yehova a konsiderá esei un akshon kontra dje personalmente.—Numbernan 14:26, 27.

 9. Dikon nos amor pa próhimo lo motivá nos pa respetá outoridat? Duna un ehèmpel.

⁹ E di dos motibu pakiko nos ta mustra rèspèt pa outoridat ta pasobra nos ta stima nos próhimo. Pa komprondé esei mihó, imaginá ku bo ta un sòldá. Pa e ehérsito por tin éksito, i asta sobrebibí, kada sòldá mester kooperá ku e kadena di mando, obedes’é i respet’é. Si bo rebeldiá kontra e outoridat di e organisashon ei, bo por debilit’é i pone bida di tur e otro sòldánan na peliger. Ta bèrdat ku ehérsitonan humano ta kousa daño i destrukshon teribel den e mundu djawe, pero Yehova tin ehérsito ku ta hasi bon so. Beibel ta referí sientos di biaha na Dios komo “Yehova di ehérsitonan.” (Romanonan 9:29) E ta e Komandante di un kantidat inmenso di kriatura spiritual poderoso. Yehova ta kompará su sirbidónan riba tera tambe ku un ehérsito. (Salmo 68:11; Ezekiel 37:1-10) Awor, kiko lo pasa si nos rebeldiá kontra e hendenan ku Yehova a enkargá ku outoridat? Nos lo no ta poniendo bida di nos kompañeronan na peliger? Ke men, ora un kristian rebeldiá kontra e ansianonan nombrá, otro rumannan den kongregashon tambe por keda perhudiká. (1 Korintionan 12:14, 25, 26) Meskos ta pasa ora ku un yu tin un aktitut rebelde; henter e famia ta sufri. Pues, nos ta demostrá nos amor pa próhimo ora nos ta respetá esnan ku tin outoridat i kooperá ku nan.

10, 11. Kiko mas ta motivá nos pa obedesé outoridat?

¹⁰ E di tres motibu pakiko nos ta respetá outoridat ta pasobra esei ta pa nos mes bon. Por lo general, ora Yehova pidi nos respetá outoridat, e ta bisa nos tambe kiko ta e benefisionan di esei. Por ehèmpel, e ta bisa yunan obedesé nan mayornan pa nan por tin un bida largu i felis. (Deuteronomio 5:16; Efesionan 6:2, 3) E ta bisa nos respetá e ansianonan di kongregashon, pasobra si nos no hasi esei, nos lo daña nos relashon ku Yehova. (Hebreonan 13:7, 17) I e ta bisa nos obedesé outoridat gubernamental, pasobra esei lo ta un protekshon pa nos.—Romanonan 13:4.

¹¹ Bo no ta haña ku ta mas fásil pa nos respetá outoridat ora nos sa dikon Yehova ke pa nos ta obediente? Pues, laga nos ban wak kon nos por mustra rèspèt pa outoridat riba tres tereno importante den bida.

12. Ki responsabilidat Yehova a duna esposo, i kon e por kumpli kuné?

¹² Ta Yehova ta e Kreador di famia. Komo Dios di òrdu, el a indiká bon kla kon un famia mester ta organisá pa e por funshoná bon. (1 Korintionan 14:33) El a duna esposo outoridat pa aktua komo kabes di famia. E esposo ta mustra rèspèt pa Kristu Hesus, kende ta su Kabes, imitando e manera ku Hesus a ehersé su outoridat komo kabes riba e kongregashon. (Efesionan 5:23) Pues, un esposo no mester hui pa su debernan, sino mas bien, asumí su responsabilidat manera un berdadero hòmber. Tampoko e no mester trata su kasá i su yunan ku severidat ni manera un diktador. Al kontrario, e mester ta kariñoso, bondadoso i rasonabel. E tin ku kòrda ku su outoridat tin límite i ta semper inferior na e outoridat di Yehova.

13. Kon un esposa por kumpli ku su responsabilidat na un manera ku ta agradá Yehova?

¹³ Un esposa mester aktua komo ayudante di su kasá. E tambe a risibí outoridat den e famia, pasobra Beibel ta bisa yunan pa nan ‘no bandoná e siñansa [òf, “lei,” NW] di nan mama.’ (Proverbionan 1:8) Klaru ku su outoridat no ta riba esun di su kasá. Un esposa kristian ta mustra rèspèt pa e outoridat di su kasá dor di yud’é kumpli ku su papel komo kabes di famia. E no ta menospresiá su esposo ni manipul’é ni tuma su puesto. Mas bien, e ta apoy’é i kooperá kuné. Ora e no ta di akuerdo ku e desishonnan di su esposo, e por ekspresá su punto di bista na un manera respetuoso i tòg keda sumiso. Si su esposo no ta kreyente, lo e por hañ’é ku situashonnan difísil. Pero asina mes, si e esposa respetá su outoridat, e esposo lo por disidí di buska Yehova.—1 Pedro 3:1.

14. Kon yunan por hasi kurason di tantu nan mayornan komo di Yehova kontentu?

¹⁴ Yunan ta hasi Yehova su kurason kontentu ora nan ta obedesé nan mama ku nan tata. Ademas, esei ta onra nan mayornan i ta hasi nan kurason tambe kontentu. (Proverbionan 10:1) Den famianan di un solo mayor, yunan ta apliká e mesun prinsipio di obedensia, sabiendo ku nan mayor tin asta mas mester di nan apoyo i kooperashon. Famianan den kua tur miembro ta kumpli ku e papel ku Dios a duna nan ta gosa di pas i felisidat. Esaki ta onra Yehova Dios, e Kreador di tur famia.—Efesionan 3:14, 15.

15. (a) Kon nos por mustra den kongregashon ku nos ta respetá e outoridat di Yehova? (b) Ki prinsipionan por yuda nos obedesé e rumannan ku ta dirigí e kongregashon? (Wak e kuadro “Obedesé Esnan Ku Ta Dirigí Boso.”)

¹⁵ Yehova a nombra su Yu komo Kabes di e kongregashon kristian. (Kolosensenan 1:13) Anto Hesus, na su turno, a asigná su “esklabo fiel i prudente” pa atendé e nesesidatnan spiritual di e pueblo di Dios riba tera. (Mateo 24:45-47) Anto tin un direktiva, e Kuerpo Gobernante di Testigunan di Yehova, ku ta representá e “esklabo” ei. Meskos ku den e kongregashon kristian di promé siglo, ansianonan ta risibí instrukshon i konseho for di e Kuerpo Gobernante, sea via karta òf via su representantenan, entre nan, e superintendentenan biahero. Ora nos ta respetá e outoridat di e ansianonan kristian, ta Yehova nos ta obedesé.—Hebreonan 13:17.

16. Den ki sentido ansiano ta ser nombrá pa spiritu santu?

¹⁶ E ansiano- i sirbidónan ministerial no ta perfekto. Meskos ku nos, nan tambe tin nan imperfekshonnan. Pero asina mes, nan ta “regalo den forma di hende” ku Yehova a perkurá pa yuda e kongregashon keda spiritualmente fuerte. (Efesionan 4:8) Ansiano ta ser nombrá pa spiritu santu. (Echonan 20:28) Kon asina? Na promé lugá, e hòmbernan ei tin ku kumpli promé ku sierto rekisito ku e Palabra inspirá di Dios ta indiká. (1 Timoteo 3:1-7, 12; Tito 1:5-9) Na di dos lugá, e ansianonan ku ta evaluá si un ruman ta kumpli ku e rekisitonan ei ta pidi Yehova sinseramente pa guia nan pa medio di su spiritu santu.

17. Dikon muhénan kristian tin biaha ta tapa nan kabes ora nan ta hasi sierto aktividat den kongregashon?

¹⁷ Den kongregashon tin vários tarea ku por lo general ta na enkargo di ansiano i sirbidó ministerial, por ehèmpel, dirigí e reunion pa sirbishi di vèlt. Kiko si ningun di nan ta disponibel pa hasi esei? Den kasonan asina, un otro ruman hòmber batisá por hasié. Si no tin ningun disponibel, e ora ei un ruman muhé kapasitá por hasié. Sinembargo, ora un hende muhé ta efektuá un tarea ku normalmente un hende hòmber batisá mester hasi, e tin ku tapa su kabes.a (1 Korintionan 11:3-10) E rekisito akí no ta rebahá hende muhé. Mas bien, e ta duna nan un oportunidat pa demostrá rèspèt pa e órden ku Yehova a establesé den famia i den kongregashon.

18, 19. (a) Kon lo bo splika e prinsipionan menshoná na Romanonan 13:1-7? (b) Kon nos ta mustra rèspèt pa outoridat gubernamental?

¹⁸ Kristiannan berdadero ta hasi esfuerso diligente pa sigui e prinsipionan menshoná na Romanonan 13:1-7. Segun ku bo ta lesa e pasashi ei, bo por mira ku e ta papia di “outoridatnan superior,” esta, di e gobièrnunan. Yehova ta permití nan eksistí pa nan por efektuá algun funshon importante, manera mantené un sierto grado di órden i perkurá servisionan nesesario. Kon nos ta mustra rèspèt pa e outoridatnan akí? Nos ta obedesé nan leinan. Pues, nos ta sòru paga tur belasting ku nos debe, yena tur formulario òf dokumento ku nan ta pidi i kumpli ku tur lei ku ta apliká na nos, na nos famia, negoshi òf propiedat. Ma nos no ta someté nos na outoridat gubernamental ora nan ta manda nos desobedesé Dios. Den tal kaso, nos ta kontestá nan meskos ku e apòstelnan di antigwedat: “Nos tin ku obedesé Dios na promé lugá, i no hende.”—Echonan 5:28, 29; wak e kuadro “Ken Su Outoridat Mi Mester Obedesé?”

¹⁹ Otro forma di mustra rèspèt pa outoridat gubernamental ta pa medio di nos aktitut. Tin biaha, nos tin ku atendé un asuntu direktamente ku funshonarionan di gobièrnu. Por ehèmpel, apòstel Pablo a papia ku gobernantenan manera Rei Heródes Agripa i Gobernador Festo. E hòmbernan akí tabatin defektonan grave, pero Pablo a papia ku nan ku rèspèt. (Echonan 26:2, 25) Nos ta imitá e ehèmpel di Pablo, sea ku e funshonario ta un gobernante poderoso òf un agente polisial. Na skol, hóbennan kristian ta hasi esfuerso pa mustra tal rèspèt tambe na nan maestronan i na kualke otro empleado di skol. Klaru ku nos no ta respetá solamente hende ku ta simpatisá ku nos kreensianan, sino tambe hende ku ta kontra Testigunan di Yehova. Bon mirá, tur hende ku no ta kompartí nos fe lo mester por mira ku nos ta respetuoso.—Romanonan 12:17, 18; 1 Pedro 3:15.

20, 21. Menshoná algun benefisio ku nos ta risibí ora nos mustra e debido rèspèt pa outoridat.

²⁰ Apòstel Pedro a skirbi: “Onra tur sorto di hende.” (1 Pedro 2:17) Sí, laga nos semper mustra rèspèt sinsero pa otro hende. Hopi hende ta keda masha impreshoná ora nan ripará ku nos ta trata nan ku berdadero rèspèt. No lubidá ku rèspèt ta birando mas i mas skars. Ora nos ta mustra rèspèt, nos ta obedesé e siguiente mandamentu di Hesus: “Laga boso lus bria dilanti di hende, pa asina nan por mira boso obranan ekselente i duna gloria na boso Tata ku ta den shelu.”—Mateo 5:16.

²¹ Den e mundu djawe, hende humilde ta sinti nan atraí na e bèrdat tokante Dios. Ora nos ta mustra rèspèt den famia, den kongregashon i den asuntunan gubernamental, esei por atraé algun di nan i motivá nan pa adorá Dios huntu ku nos. Esei sí lo ta maravioso! Asta si esei no sosodé, un kos ta sigur: Nos rèspèt pa hende ta agradá Yehova Dios i ta yuda nos keda den su amor. Ki rekompensa mas grandi por tin ku esei?