KAPÍTULO 7

El A Prediká “Bon Notisia Tokante Hesus”

Felipe a pone bon ehèmpel komo predikadó

1, 2. Kiko a pasa ora e opositornan a purba di stòp e trabou di prediká?

E KRISTIANNAN tabata pasando den un periodo di persekushon pisá. Saulo a “kuminsá un atake feros kontra e kongregashon.” E palabra “feros” den e idioma original ta indiká ku e atakenan tabata hopi kruel. (Echo. 8:3) Pa motibu di persekushon pisá, e disipelnan a hui bai diferente lugá. A parse ku Saulo lo a logra su meta, esta, di kaba kompletamente ku kristianismo. Sinembargo, ora e kristiannan a plama bai diferente lugá, algu interesante a sosodé ku hende kisas lo no a spera. Kiko a sosodé?

² E disipelnan ku a ser plamá a kuminsá “prediká bon notisia di palabra di Dios” na e lugánan kaminda nan a bai. (Echo. 8:4) Bo por imaginá esei? En bes di stòp e trabou di prediká, persekushon a yuda plama bon notisia na mas lugá! Sin ku e opositornan a realisá, ora nan a fòrsa e disipelnan bandoná nan kas, nan a hasi posibel pa hende ku ta biba otro kaminda tambe tende bon notisia tokante e Reino. Manera nos lo mira, esei a sosodé den nos tempu tambe.

“E Disipelnan Ku A Ser Plamá” (Echonan 8:4-8)

3. (a) Ken Felipe tabata? (b) Dikon e tempu ei ainda mayoria di hende na Samaria no a skucha bon notisia tokante e Reino di Dios, i kiko Hesus a bisa ku lo a tuma lugá na Samaria?

³ Un di e hendenan “ku a ser plamá” tabata Felipe.a (Echo. 8:4; Wak e kuadro “Felipe: Un ‘Predikadó di Bon Notisia di Dios.’”) El a bai Samaria, un stat kaminda kasi niun hende no a skucha bon notisia tokante e Reino di Dios ainda. Dikon? Pasobra mas promé Hesus a bisa su apòstelnan: “No bai serka hende di e nashonnan, ni drenta stat samaritano; mas bien, sigui bai serka e karnénan pèrdí di e kas di Israel.” (Mat. 10:5, 6) Sinembargo, Hesus tabata sa ku e tempu lo a yega ku mester a prediká einan, pasobra nèt promé ku el a bai shelu el a bisa: “Boso lo ta mi testigunan na Herúsalèm, na henter Hudea i Samaria, i te na e partinan di mas leu di tera.”—Echo. 1:8.

4. Kon a samaritanonan a reakshoná riba e mensahe ku Felipe tabata prediká, i kiko por ta un motibu dikon nan a reakshoná asina?

⁴ Ora Felipe a bai Samaria, el a mira ku e stat ei tabata “kla pa kosechá.” (Huan 4:35) Hende di Samaria a gusta e mensahe ku Felipe a prediká mashá i no ta difísil pa mira dikon. E hudiunan no tabata ke tin nada di haber ku e samaritanonan, i hopi di nan tabata asta odia e samaritanonan. Pero loke Felipe tabata kompartí ku e samaritanonan tabata algu refreskante i kompletamente diferente for di loke e fariseonan tabata siña hende. Kontrali na e siñansanan di e fariseonan kendenan tabata yen di prehuisio, e mensahe ku Felipe tabata prediká tabata pa tur hende. Komo ku Felipe a prediká na e samaritanonan, el a mustra ku e no tabata hasi distinshon di persona, i ku e no tabata manera e hendenan ku tabata trata e samaritanonan malu. Pues, kisas esei tabata un di e motibunan dikon e samaritanonan “tabata presta masha atenshon na loke Felipe tabata bisa.”—Echo. 8:6.

5-7. Duna algun ehèmpel ku ta mustra ku bon notisia tokante e Reino di Dios a sigui plama ora nan a fòrsa algun kristian pa hui bai for di nan kas.

⁵ Awe, meskos ku den promé siglo, persekushon no a logra stòp e trabou di prediká. Kada bes ku a fòrsá e kristiannan pa muda di un lugá pa otro òf a manda nan prizòn, e mensahe tokante e Reino di Dios a plama bai na mas lugá. Por ehèmpel, durante Segundo Guera Mundial, Testigunan di Yehova a logra prediká den e kamponan di konsentrashon nazi. Un hudiu ku a topa ku Testigunan di Yehova den un di e kamponan a bisa: “E [kurashi] dje prezunan ku tabata Testigu di Yehova a konvensé mi ku nan fe tabata basá riba e Skritura, i ami tambe a bira un Testigu.”

⁶ Den algun kaso, e opositornan a aseptá e mensahe ku e Testigunan tabata prediká. Por ehèmpel, ora ku Ruman Franz Desch tabata den kampo di konsentrashon Gusen, na Austria, el a logra studia Beibel ku un ofisial di e ehérsito nazi. Bo por imaginá bo kon nan a sinti ora ku algun aña despues nan a topa na un kongreso di Testigunan di Yehova i nan tur dos tabata ruman?

⁷ Algu asina a pasa tambe ora ku persekushon a pone ku algun kristian mester a hui di un pais pa un otro. Por ehèmpel, un 50 aña pasá, e rumannan na Malawi a haña nan fòrsá ta hui bai Mozambique. Esei a pone ku hende na Mozambique a haña un bon testimonio. Asta ora persekushon a kuminsá na Mozambique, e trabou di prediká no a stòp. Ruman Francisco Coana a bisa: ‘Ta bèrdat ku algun di nos a ser arestá vários biaha pa motibu di e trabou di prediká. Pero, ora nos a mira kuantu hende tabata drenta e bèrdat, nos tabatin sigur ku Yehova tabata yuda nos meskos ku el a yuda e kristiannan di promé siglo.’

8. Ki efekto guera i situashon ekonómiko tabatin riba e trabou di prediká?

⁸ Klaru ku persekushon no ta e úniko motibu pakiko hende di diferente lugá i nashonalidat a skucha bon notisia tokante e Reino di Dios. Den e último añanan, hopi hende a haña nan ta muda bai un otro pais pa motibu di guera òf situashon ekonómiko. Ora ku e hendenan ei a yega nan pais nobo, nan a haña chèns di tende bon notisia tokante e Reino di Dios i studia Beibel. Komo ku e refugiadonan ta papia otro idioma, esei a krea un nesesidat pa prediká na nan den nan idioma. Abo ta hasi esfuerso pa prediká na hende “di tur nashon, tribu, pueblo i idioma” den bo teritorio?—Rev. 7:9.

“Duna Ami Tambe e Poder Ei” (Echonan 8:9-25)

Simon, kende tabata hasi magia ántes, ta aserká un apòstel ku saku di paña ku plaka aden. E apòstel ta pone su man riba skouder di un hòmber kristian. Patras, bo por mira un otro hòmber kristian ta kura un mucha muhé yòn ku ta lam, i e hendenan ku ta pará einan ta kontentu. — “Awor, Simon a mira ku e kreyentenan tabata risibí spiritu santu ora e apòstelnan pone man riba nan. P’esei, el a ofresé e apòstelnan plaka.”—Echonan 8:18

9. Ken Simon tabata, i kiko a impreshon’é tokante Felipe?

⁹ Ora Felipe tabata na Samaria, el a hasi hopi milager. Por ehèmpel, el a kura hende ku desabilidat i asta tabata saka spiritu malbado for di hende. (Echo. 8:6-8) Un hòmber ku tabata yama Simon a keda masha impreshoná ku e milagernan ku Felipe por a hasi. Simon tabata praktiká magia i tur hende tabata respet’é. Nan tabata bisa lo siguiente tokante dje: “Dios su gran poder ta den e hòmber akí.” Pero awor, Simon por a mira kiko realmente tabata poder. El a mira Dios su poder den e milagernan ku Felipe tabata hasi. Komo resultado, Simon a bira kreyente. (Echo. 8:9-13) Pero, kiko tabata su motivashon pa bira kristian?

10. (a) Kiko Pedro i Huan a hasi na Samaria? (b) Kiko Simon a hasi ora el a mira ku e disipelnan nobo a risibí spiritu santu ora Pedro i Huan a pone man riba nan?

¹⁰ Ora e apòstelnan a haña sa ku hopi hende tabata bira kristian na Samaria, nan a manda Pedro i Huan einan. (Wak e kuadro “Pedro A Usa ‘e Yabinan di e Reino.’”) Ora Pedro i Huan a yega Samaria, nan a pone man riba e disipelnan nobo. Komo resultado, kada un di nan a risibí spiritu santu.b Ora Simon a mira loke a sosodé, el a haña esei masha interesante. El a bisa e apòstelnan: “Duna ami tambe e poder ei, pa asina tur hende ku mi pone man riba dje por risibí spiritu santu.” Simon a asta ofresé e apòstelnan plaka pa e por haña òf kumpra e privilegio sagrado ei!—Echo. 8:14-19.

11. Ki konseho fuerte Pedro a duna Simon, i kon Simon a reakshoná?

¹¹ Pedro a papia na un manera stret ku Simon. Pedro a bis’é: “Laga bo plaka ser destruí huntu ku bo! Bo ta kere ku bo por usa plaka pa kumpra loke Dios a duna nos pòrnada? Bo no tin arte ni parte den e asuntu akí, pasobra Dios ta mira ku bo kurason no ta sinsero.” Despues, Pedro a bisa Simon pa e arepentí. Pedro a bis’é: “Roga Yehova pa wak si kisas e ta pordoná e mal intenshon ku bo tin den bo kurason.” Ta parse ku Simon no tabata un hende malbado; e kier a hasi loke ta korekto. Pero, na e momento ei, el a sigui deseo ku tabata robes. Pues, Simon a pidi e apòstelnan: “Roga Yehova pa nada di loke boso a bisa no sosodé ku mi.”—Echo. 8:20-24.

12. Kon normal tabata pa e kristiannan falsu kumpra òf bende privilegio den nan religion?

¹² E korekshon ku Pedro a duna Simon ta algu ku tur kristian tin ku tene kuenta kuné. Es mas, e ta siña nos ku ta inaseptabel pa kumpra òf bende privilegio den kongregashon. Sinembargo, pa e kristiannan falsu, e práktika ei ta masha normal. Por ehèmpel, e di nuebe edishon di The Encyclopædia Britannica (1878) ta splika ku ora tabata bai nombra un Papa nobo ta parse ku nan tabata paga plaka pa kumpra e posishon ei. Hopi di nan no tabata sinti bèrgwensa i no tabata ni purba di skonde loke nan tabata hasi.

13. Kon tur kristian awe por evitá di kumpra òf bende privilegio den kongregashon?

¹³ Tur kristian awe mester tene kuidou pa nan no kai den e trampa di kumpra òf bende privilegio den kongregashon. Por ehèmpel, no ta bon pa un kristian ku ke haña privilegio duna hopi regalo, òf demasiado elogio, na e rumannan ku tin outoridat pa e por haña mas privilegio den kongregashon. Di otro banda, e rumannan ku tin outoridat pa duna privilegio den kongregashon mester tene kuidou pa nan no mustra faboritismo na e rumannan ku sèn. Tur e dos situashonnan ei ta un forma di bende òf kumpra privilegio den kongregashon, i esei no ta bon. Tur kristian mester komportá nan mes komo “esun di mas chikitu.” Esei ta nifiká ku nan ta warda riba guia di Yehova su spiritu santu pa nombra ruman den kongregashon. (Luk. 9:48) No tin lugá den Dios su organisashon pa hende ku ta buska nan “mes onor.”—Pro. 25:27.

PEDRO A USA E “YABINAN DI E REINO”

Hesus a bisa Pedro: “Lo mi duna bo e yabinan di e Reino di shelu.” (Mat. 16:19) Kiko Hesus tabata ke men? El a usa e palabra “yabinan.” Esei a indiká ku Pedro lo a habri kaminda pa diferente grupo di hende siña bon notisia di e Reino di Dios i haña oportunidat pa goberná den shelu huntu ku Hesus den e Reino Mesiániko. Na ki okashon Pedro a usa e yabinan ei?

Pedro a usa e promé yabi na Pentekòste di aña 33 ora el a animá hudiu i hende ku a kombertí i bira hudiu pa arepentí i batisá. Mas o ménos 3.000 hende a hasi esei, i nan a haña oportunidat pa goberná den e Reino Mesiániko.—Echo. 2:1-41.
Pedro a usa e di dos yabi un poko despues di e asesinato di Esteban. Na e okashon ei, Pedro i Huan a pone man riba un grupo di samaritano ku a kaba di batisá, i nan a risibí spiritu santu.—Echo. 8:14-17.
Pedro a usa e di tres yabi na aña 36 despues di Kristu. E aña ei, el a habri kaminda pa hende ku no tabata hudiu i ku no a sirkunsidá haña oportunidat pa bai goberná den shelu. Esei a tuma lugá ora Apòstel Pedro a prediká na Kornelio, e promé persona ku no tabata hudiu i ku no a sirkunsidá ku a bira disipel di Kristu.—Echo. 10:1-48.

“Bo Ta Komprondé Loke Bo Ta Lesa?” (Echonan 8:26-40)

14, 15. (a) Ken e “funshonario di Etiopia” tabata, i kon Felipe a topa kuné? (b) Kon e funshonario di Etiopia a reakshoná ora Felipe a prediká na dje, i dikon nos por bisa ku e funshonario no a kore batisá promé ku e tabata kla? (Wak nota.)

¹⁴ Despues, un angel di Yehova a bisa Felipe pa e bai riba e kaminda ku ta baha for di Herúsalèm pa Gaza. Kisas Felipe tabata puntra su mes dikon e mester a bai einan, pero no a tarda muchu promé ku el a haña sa. El a topa un funshonario di Etiopia “ta lesa na bos haltu e buki di Profeta Isaías.” (Wak e kuadro “‘Eunuko’ òf ‘Funshonario’?”) Yehova su spiritu santu a dirigí Felipe na e garoshi di e funshonario. Miéntras ku Felipe tabata kore banda di e garoshi di e funshonario di Etiopia, Felipe a puntr’é: “Bo ta komprondé loke bo ta lesa?” E funshonario a kontestá Felipe: “Kon mi por komprondé si niun hende no yuda mi?”—Echo. 8:26-31.

¹⁵ E funshonario di Etiopia a invitá Felipe pa subi bin sinta den garoshi huntu kuné. Sin duda, nan kòmbersashon lo tabata masha interesante! Meskos ku hopi otro hende, e funshonario di Etiopia no tabata sa ken e “karné” òf e “sirbidó” den Isaías su profesia tabata. (Isa. 53:1-12) Pero, segun ku nan tabata kore den e garoshi, Felipe a splik’é ku e “karné” òf e “sirbidó” tabata Hesukristu. E ora ei, meskos ku e hendenan ku a batisá na Pentekòste di aña 33 despues di Kristu, e funshonario di Etiopia, ku ya a kombertí i bira hudiu, tabata sa kaba kiko e mester a hasi. El a bisa Felipe: “Ata awa! Kiko ta stroba mi di batisá?” Mesora Felipe a batis’é.c (Wak e kuadro “Boutismo den ‘Awa.’”) Despues di esei, Felipe a haña un asignashon nobo. Yehova su spiritu santu a dirigí Felipe na Ásdòd, kaminda el a sigui prediká bon notisia tokante e Reino di Dios.—Echo. 8:32-40.

“EUNUKO” ÒF “FUNSHONARIO”?

Vários tradukshon di Beibel ta bisa ku e hòmber di Etiopia tabata “kastrá” òf ku e tabata un “eunuko.” Aunke e palabra griego eunóukhos, ku ta ser usá pa deskribí e hòmber di Etiopia, por referí na un hòmber ku no por traha yu, e por referí tambe na un funshonario di alto rango. Un funshonario ku tabata asigná pa kuida esposa i konkubina di un rei kisas bèrdat tabata ser kastrá. Pero esei no tabata un rekisito pa otro funshonario, por ehèmpel, pa un kopero di rei òf pa un persona na enkargo di e tesoronan di rei. E hòmber di Etiopia ku Felipe a batisá tabata un tipo di funshonario asina, pasobra e tabata na enkargo di tur e tesoronan di e reina di Etiopia. Sí, e tabata un minister di finansa.

E hòmber di Etiopia no tabata un hudiu; el a kombertí, bira hudiu i kuminsá adorá Yehova. Bon mirá, el a kaba di bini di Herúsalèm kaminda el a bai pa adorá Dios. (Echo. 8:27) Pa e motibu ei, nos por konkluí ku e hòmber di Etiopia no tabata un eunuko, pasobra Lei di Moises a prohibí hòmber kastrá pa forma parti di e kongregashon di Israel.—Deu. 23:1.

BOUTISMO DEN “AWA”

Kon ta e manera korekto pa batisá un kristian? Tin hende ta pensa ku ta sufisiente pa djis basha òf sprengu awa riba kabes di un persona. Sinembargo, Beibel ta bisa: “Felipe i e funshonario a drenta awa.” (Echo. 8:36, 38) Si tabata sufisiente pa djis basha òf sprengu awa, lo no tabata nesesario pa e funshonario para su garoshi na un lugá ku tabatin awa. Asta un tiki awa, manera lo tabatin den un butishi, lo tabata sufisiente. Anto muy probablemente, lo e tabatin un butishi asina, pasobra e tabata biaha riba “un kaminda den desierto.”—Echo. 8:26.

Un buki di referensia ta bisa ku e palabra “batisá” ta bini for di un ekspreshon griego ku ta nifiká “ser di dòp,” òf hinká kompletamente bou di awa.” Otro teksto di Beibel ku ta papia tokante boutismo ta kuadra ku e nifikashon ei. Huan 3:23 ta bisa ku Huan “tabata batisá hende na Enon, serka di Salim, pasobra einan tabatin hopi awa.” Ademas, e relato tokante Hesus su boutismo ta bisa: “Asina ku [Hesus] a sali for di awa, el a mira shelu habri.” (Mar. 1:9, 10) Pues, kristian berdadero ta ser hinká kompletamente bou di awa ora nan batisá.

16, 17. Kon e angelnan ta partisipá den e trabou di prediká awe?

¹⁶ Awe, tur kristian tin e privilegio di partisipá den e mesun trabou ku Felipe a hasi. Hopi bes, nan ta logra prediká tokante e reino na un manera informal, por ehèmpel, ora nan ta biaha. Ora nan topa un persona di kurason sinsero, esei no ta pa kasualidat. Pasobra Beibel ta bisa ku e angelnan ta dirigí e trabou di prediká pa asina bon notisia tokante e Reino di Dios por yega na “tur nashon, tribu, idioma i pueblo.” (Rev. 14:6) Bon mirá, ta esei mes Hesus a bisa ku lo tuma lugá, esta, ku e angelnan lo partisipá den e trabou di prediká. Den Hesus su ilustrashon tokante bon simia i mal yerba, el a bisa ku durante e kosecha, esta, e konklushon di e era akí, “e kosechadónan ta angel.” Ademas, el a bisa ku e angelnan akí “lo separá for di su reino tur esnan ku ta pone hende trompeká i esnan ku ta kometé maldat.” (Mat. 13:37-41) Ademas, Yehova ta usa e angelnan pa hala hende na su organisashon; e angelnan ta hala tantu e hendenan ku tin speransa pa goberná den shelu komo e hendenan ku lo bira parti di “un multitut grandi” di “otro karné.”—Rev. 7:9; Huan 6:44, 65; 10:16.

¹⁷ E echo ku algun hende ku nos topa den sirbishi awe ta bisa nos ku nan a pidi Dios den orashon pa yudansa ta mustra ku di bèrdat e angelnan ta dirigí e trabou di prediká. Por ehèmpel, un dia, dos Testigu tabata prediká huntu ku un mucha chikitu. Na final di e mainta, e dos Testigunan tabata a punto di stòp di prediká, pero e mucha tabatin masha gana di bai e siguiente kas. Anto el a bai su so i bati na porta! Ora un señora yòn a habri e porta, e dos Testigunan a aserk’é pa papia kuné. Pa nan sorpresa, e señora a splika nan ku el a kaba di hasi orashon pa pidi pa un hende yud’é komprondé Beibel. E señora a kuminsá studia Beibel!

Un pareha kasá ta primi bèl na un señora su kas miéntras e señora ta hasi orashon paden. — “Dios, mi no sa ken bo ta, pero, por fabor, yuda mi”

18. Dikon nunka nos no mester pèrdè apresio pa e trabou di prediká?

¹⁸ Komo un persona ku ta forma parti di e kongregashon kristian, bo tin e privilegio di traha huntu ku e angelnan den e trabou di prediká ku ta tumando lugá den nos tempu. Awe, e trabou di prediká ta yuda nos alkansá mas tantu hende ku nunka promé. Nunka nos no ke pèrdè apresio pa e bunita privilegio ei. Pues, sigui prediká yen di entusiasmo; konta otro hende “bon notisia tokante Hesus.” Esei sigur lo duna bo goso.—Echo. 8:35.

FELIPE: UN “PREDIKADÓ DI BON NOTISIA DI DIOS”

Ora Kristu su siguidónan a ser plamá na diferente kaminda pa motibu di persekushon, Felipe a bai Samaria. Ta parse ku el a traha i kooperá bon ku e kuerpo gobernante di promé siglo, pasobra “ora e apòstelnan na Herúsalèm a tende ku e hendenan na Samaria a aseptá palabra di Dios, nan a manda Pedro i Huan serka nan.” E resultado tabata ku e kristiannan nobo a haña e regalo di spiritu santu.—Echo. 8:14-17.

Despues di e susesonan akí ku ta skirbí den Echonan kapítulo 8, Beibel ta papia un solo biaha mas tokante di Felipe. Mas o ménos 20 aña despues ku Felipe a prediká pa promé bes na Samaria, Apòstel Pablo i e hendenan ku tabata biaha huntu kuné tabata na kaminda pa Herúsalèm na final di Pablo su di tres biahe komo misionero. E grupo a sali for di Tolemaida. E relato di Lukas ta bisa: “E siguiente dia, nos a bai, i nos a yega Sesarea. Einan, nos a bai kas di Felipe, kende tabata predikadó di bon notisia di Dios. Felipe tabata un di e shete hòmbernan di bon reputashon, i nos a keda serka dje. Felipe tabatin kuater yu muhé soltero ku tabata profetisá.”—Echo. 21:8, 9.

Ta parse ku Felipe a keda biba na Sesarea. Einan tambe el a prediká bon notisia di Dios. Ademas, el a kuminsá un famia einan. Ta importante pa nota ku Lukas a referí na dje komo un “predikadó di bon notisia di Dios.” Beibel ta usa e deskripshon ei pa referí na hende ku a bandoná nan kas pa bai prediká na lugá kaminda hende ainda no a skucha bon notisia di Dios. Pues, aunke a pasa hopi aña desde ku Felipe a bai einan pa prediká, el a sigui prediká ku entusiasmo. Ademas, e echo ku Felipe tabatin kuater yu muhé ku tabata profetisá ta indiká ku Felipe a siña su famia pa stima i sirbi Yehova.

a E Felipe akí no ta Apòstel Felipe. Mas bien, e Felipe akí ta e Felipe ku a ser menshoná den Kapítulo 5 di e buki akí. E tabata un di e “shete hòmber[nan] di bon reputashon” nombrá pa distribuí kuminda pa e biudanan ku tabata papia griego i e biudanan ku tabata papia hebreo na Herúsalèm.—Echo. 6:1-6.

b Ta parse ku normalmente, durante e tempu ei, hende ku a bira disipel tabata ser ungí ku spiritu santu ora nan batisá. Esei a hasi posibel pa nan goberná huntu ku Hesus den shelu komo rei i saserdote. (2 Kor. 1:21, 22; Rev. 5:9, 10; 20:6) Sinembargo, den e kaso akí, e disipelnan nobo no a ser ungí ku spiritu santu na nan boutismo. Ta ora Pedro i Huan a pone man riba e disipelnan nobo ei, nan a risibí spiritu santu i e abilidat pa hasi milager.

c Akaso e funshonario di Etiopia a kore batisá promé ku e tabata kla? Nò! Komo ku e funshonario di Etiopia ya a kombertí i bira hudiu, ya e tabata konosé e Skritura, inkluso e profesianan tokante Mesías. Ora Felipe a yud’é komprondé e ròl ku Hesus ta hunga den Yehova su propósito, el a batisá mesora.