LÈS 11

Entusiasmo

Romanonan 12:11

RESÚMEN: Papia ku entusiasmo, i asina animá i motivá bo oyentenan.

Laga e informashon konmové bo kurason. Ora bo ta prepará bo presentashon, pensa bon riba e importansia di bo mensahe. Studia e informashon asina bon ku bo por ekspresá bo mes di kurason.
Pensa riba bo oyentenan. Meditá riba e benefisionan ku otro hende lo saka for di e informashon ku bo lesa òf usa pa siña nan. Pensa kon bo por presentá e informashon na bo oyentenan di un manera ku lo profundisá nan apresio p’e.
Hinka bida den bo presentashon. Papia ku entusiasmo. Pa ekspresá bo sintimentunan, usa gesto natural i ekspreshon di kara ku ta reflehá sinseridat.

Tene kuidou pa bo no kria e mania di usa e mes gestonan i asina kita tinu di bo oyentenan. Usa gesto ku ta nifiká algu. Ekspresá entusiasmo prinsipalmente ora bo ta trata e puntonan prinsipal òf ke motivá bo oyentenan pa tuma akshon. No keda papia ku masha entusiasmo durante henter bo presentashon, esaki lo kansa bo oyentenan.