Con cristiandad a bira parti di mundo

CU TEMPO, e imperio romano, den locual cristianismo di promé a cuminza, a cai. Hopi historiador ta bisa cu su caimento també tabata e tempo dje victoria final di cristianismo riba paganismo. Expresando un otro punto di bista, obispo anglicano E. W. Barnes a skirbi: “Ora civilizacion clásica a cai, cristianismo no a sigi como e fe noble di Jesucristo: el a bira un religion útil como e lijm social di un mundo den decaimento.”​—⁠The Rise of Christianity.

Promé cu su caimento, durante siglo dos, tres, i cuater EC, historia ta relata cu di hopi manera hende cu a bisa cu nan tabata sigidor di Jesús a mantenénan apartá for dje mundo romano. Pero, historia ta revela també e desaroyo di apostasía den doctrina, conducta, i organizacion, net manera Jesús i su apóstolnan a profetiza. (Mateo 13:​36-43; Echo 20:​29, 30; 2 Tesalonicense 2:​3-12; 2 Timoteo 2:​16-18; 2 Pedro 2:​1-3, 10-22) Cu tempo nan a haci compromiso cu e mundo griego i romano, i algun cu a pretende di ser cristian a adopta paganismo di mundo (tal como fiesta i adoracion di dios mama i dios triple di dje), su filosofía (tal como kerimento den un alma inmortal), i su organizacion administrativo (mirá den e presentacion di un grupo di clero). Tal clase di cristianismo corrupto ta loke a atraé hende pagano i el a bira un forza cu emperador romano na principio a purba di elimina pero despues a acepta i a purba di usa pa nan mes interés.

Mundo a dominé

Historiador religioso Augustus Neander a mustra e rísico encerrá den e relacion nobo entre “cristianismo” i mundo. Si hende cristian a sacrifica nan separacion for di mundo, el a skirbi cu “e consecuencia lo a ser un confusion dje iglesia cu e mundo . . . pa medio di cua e iglesia lo a perde su pureza, i, aunque el a parce di vence, e mes lo a ser vencí.”​—⁠General History of the Christian Religion and Church, Volumen 2, bladji 161.

Esei ta loke a pasa. Cerca e principio di siglo cuater, emperador romano Constantino a purba di usa e religion “cristian” di su dia pa uni su imperio decayendo. P’sei, el a duna esnan cu a pretende di ser cristian libertad di religion i a pasa algun privilegio dje sacerdocio pagano na nan grupo di clero. The New Encyclopædia Britannica ta bisa: “Constantino a saca e iglesia for di su isolacion for di mundo pe acepta responsabilidad social i yuda e arreglo social pagano conbertí ne iglesia.”

Religion oficial

Despues di Constantino, emperador Juliano (361-363 EC) a haci esfuerzo pa opone cristianismo i restora paganismo. Pero el a faya, i mas cu 20 aña despues, emperador Teodosio I a prohibí paganismo i a impone “cristianismo” trinitario como e religion oficial dje imperio romano. Cu precision experto, historiador francés Henri Marrou a skirbi: “Na fin dje reinado di Teodosio, cristianismo, of pa ser mas preciso, catolicismo ortodoxo, a bira e religion oficial di tur e mundo romano.” Catolicismo ortodoxo a reemplaza berdadero cristianismo i a bira “parti di mundo.” Tal religion oficial tabata mashá diferente cu e religion dje promé sigidornan di Jesús, na locual Jesús a bisa: “Boso no ta parti di mundo.”​—⁠Juan 15:⁠19.

Louis Rougier, historiador i filósofo francés a skirbi: “Segun cu cristianismo a plama, el a experimenta cambio straño te cu hende casi no por a reconocé. . . . E iglesia di promé di hende pober, cu a existi pa medio di obra caritativa, a bira un iglesia triunfante cu a haci compromiso cu autoridad político ora e no por a dominánan.”

Cerca e principio di siglo cinco EC, e “santo” católico romano Agustín a skirbi su obra principal E stad di Dios. Den dje el a pinta dos stad, “e stad di Dios i e stad di mundo.” Su obra a enfatizá e separacion entre hende católico i e mundo? Realmente cu no. Profesor Latourette a bisa: “Agustín a reconoce francamente cu e dos stad, terrenal i celestial, ta bruhá cu otro.” Agustín a siña cu “e reino di Dios a cuminza den e mundo caba cu e institucion dje iglesia [católica].” (The New Encyclopædia Britannica, Macropædia, Volumen 4, bladji 506) Pues, sea loke sea e propósito original di Agustín, su teoría tabatin efecto di inbolucra e Iglesia Católica mas profundo den asunto político di mundo.

Un imperio partí

Na aña 395 EC, ora cu Teodosio I a muri, e imperio romano tabata partí oficialmente na dos. E imperio oriental, of bizántino, tabatin su capital den Constantinopla (Bizántio na antes, awor Istanbul), i e imperio occidental, tabatin su capital (despues di aña 402 EC) den Ravenna, Italia. Como resultado, cristiandad a wordu partí políticamente i també religiosamente. En cuanto relacion entre e iglesia i e gobierno, e iglesia den imperio oriental a sigi e teoría di Eusebio di Cesarea (un contemporario di Constantino e Grandi). Ignorando e principio cristian di separacion for di mundo, Eusebio a razona cu si e emperador i e imperio a bira cristian, e iglesia i e gobierno lo bira un solo sociedad cristian, cu e emperador sirbiendo como representante di Dios riba tera. En general, tal relacion entre e iglesia i e gobierno ta loke e iglesia ortodoxo oriental a sigi através dje siglonan. Den su buki na inglés E iglesia ortodoxo, Timothy Ware, un obispo ortodoxo, a mustra e resultado: “Nacionalismo ta e ruina dje religion ortodoxo pe último diez siglo.”

Den Europa, tribu germánico invasor a kita e último emperador romano na aña 476 EC. Esei a marca e fin dje imperio romano occidental. The New Encyclopædia Britannica ta bisa tocante e bashí político cu a sigi: “Un poder nobo tabata formá: e Iglesia romano, e iglesia dje obispo di Roma. E iglesia a kere cu e tabata e sucesor dje difunto imperio romano.” E enciclopedia ta sigi bisa: “Papa romano . . . a extende reclamo seglar di gobierno dje iglesia mas ayá cu frontera di iglesia-gobierno i a desaroya loke nan a yama e teoría di dos spada, declarando cu Cristo a duna e papa no solamente poder spiritual riba e iglesia sino també poder seglar riba reino di mundo.”

Iglesia protestante nacional

Entre aña 476 te 1450 EC, tanto e religion católico griego como e católico romano a sigi keda inbolucrá profundamente den político, intriga di mundo, i gera. E reformacion protestante di siglo 16 a marca un bolbimento na berdadero cristianismo, apartá for di mundo?

No. Nos ta leza den The New Encyclopædia Britannica: “Reformador protestante di tradicion luterano, calvinista, i anglicano . . . a keda firmemente pegá ne punto di bista di Agustín, pasobra nan a gusta mashá su teología. . . . Cada un dje tres tradicion protestante principal di Europa di siglo 16 . . . a recibi apoyo di autoridad seglar den Sahonia [Alemania central], Suiza, i Inglaterra i a permanece den e mesun relacion íntimo cu gobierno cu e iglesia di siglo medio tabatin.”

En bez di efectua un bolbimento na berdadero cristianismo, e Reformacion a produci un gran cantidad di religion nacional of territorial cu a cultiva fabor cu gobierno político i a apoyánan activamente den nan gera. Realmente, tanto e religion católico como religion protestante a instiga gera religioso. Den su buki na inglés E bista di religion di un historiador, Arnold Toynbee a skirbi tocante tal gera: “Nan a demonstra hende católico i protestante den Francia, Holanda, Alemania, i Irlanda, i secta rival di protestante den Inglaterra i Escocia, den e acto brutal di purba di domina otro cu forza di arma.” Conflicto actual cu ta partí Irlanda i loke tabata Yugoslavia ta mustra cu e religion católico romano, ortodoxo i protestante ta inbolucrá profundamente ainda den asunto di mundo.

Esei kier men cu berdadero cristianismo, separá for di mundo, no ta existi mas riba tera? E sigiente artículo lo contesta e pregunta.

[Kuadro/Plachi na página 10, 11]

CON “CRISTIANISMO” A BIRA UN RELIGION OFICIAL

CRISTIANISMO no a nace pa ser parti di mundo. (Mateo 24:3, 9; Juan 17:16) Sin embargo, buki di historia ta bísanos cu den siglo cuater EC, “cristianismo” a bira e religion nacional oficial dje imperio romano. Con esei a ­sosode?

For di Nerón (54-68 EC) te leu den siglo tres EC, tur emperador romano sea a persigi activamente hende cristian of a permiti persecucion di nan. Galieno (253-268 EC) tabata e promé emperador romano pa saca un declaracion di tolerancia pa nan. Asta ne tempo ei, cristianismo tabata un religion prohibí den tur e imperio. Despues di Galieno, e persecucion a sigi, i bao di Diocleciano (284-305 EC) i sucesor net despues di dje, e asta a intensificá.

E culminacion a yega pronto den siglo cuater cu loke tabata yamá e conbertimento na cristianismo di emperador Constantino I. En cuanto tal “conbertimento,” e obra francés Théo—Nouvelle encyclopédie catholique ta bisa: “Constantino a pretende di ser un emperador cristian. Realmente, e tabata bautizá solamente riba su cama di morto.” No obstante, na aña 313 EC, Constantino i su co-emperador, Licinio, a saca un decreto cu a duna libertad di religion tanto na hende cristian como na pagano. E New Catholic Encyclopedia ta bisa: “E extension di Constantino di libertad di adoracion na hende cristian, locual a nifica cu nan a reconoce cristianismo oficialmente como un religio licita [religion legítimo] hunto cu paganismo, tabata un acto revolucionario.”

Sin embargo, The New Encyclopædia Britannica ta declara: “[Constantino] no a haci cristianismo e religion dje imperio.” Jean-Rémy Palanque, historiador francés, miembro dje Instituto di Francia, a skirbi: “Sin embargo, e gobierno romano . . . a permanece pagano oficialmente. I Constantino, ora el a sigi e religion di Cristo, no a pone fin na tal situacion.” Den su obra The Legacy of Rome, profesor Ernest Barker a bisa: “[E victoria di Constantino] no a resulta den establecimento di cristianismo un bez como e religion oficial. Constantino a keda contentu pa reconoce cristianismo como un adoracion público dje imperio. Pe sigiente setenta aña ceremonia pagano bieu tabata celebrá oficialmente den Roma.”

Pues, ne tempo ei “cristianismo” tabata un religion legal dje imperio romano. Na ki tempo el a bira, den e sentido di mas completo dje expresion, e religion oficial nacional? Nos ta leza den e New Catholic Encyclopedia: “Sucesor [di Constantino] a sigi su procedimiento cu excepcion di Juliano [361-363 EC], kende su persecucion di cristianismo a termina un bez ora el a muri. Finalmente, durante e último cuarto di siglo cuater, Teodosio e Grandi [379-395 EC] a haci cristianismo e religion oficial dje imperio i a oprimi adoracion pagano público.”

Confirmando esei i revelando exactamente loke e religion oficial nobo tabata, escolástico bíblico i historiador F. J. Foakes Jackson a skirbi: “Bao di Constantino cristianismo i e emperador romano tabata aliado. Bao di Teodosio nan tabata uní. . . . Dje tempo ei padilanti e título católico tabata reserbá pa hende cu a adora e Tata, Yiu i Spiritu Santo cu reverencia igual. Tur e procedimiento religioso dje emperador tabata dirigí ne fin ei, i e resultado tabata cu e Fe Católica a bira e solo religion legal dje romanonan.”

Jean-Rémy Palanque a skirbi: “Teodosio, aunque el a combati paganismo, també a sali na fabor di religion ortodoxo [católico]; su decreto di aña 380 EC a exigi pa tur e pueblo profesa e fe di papa Dámaso i obispo [trinitario] di Alehandría i a kita libertad di adoracion for di opositor. E gran Concilio di Constantinopla (aña 381) a condena di nobo tur herehía, i e emperador a percura pa ningun obispo apoya tal herehía. Cristianismo [trinitario] di Nicea siguramente i berdaderamente a bira e religion oficial . . . E iglesia tabata estrechamente uní cu e gobierno i a disfruta di su apoyo exclusivo.”

Pues, e cristianismo puro dje tempo dje apóstolnan no tabata e religion oficial dje imperio romano. Esei tabata catolicismo trinitario di siglo cuater, cu emperador Teodosio I cu forza a impone i cu e Iglesia Católico Romano a practica, cu tanto den e tempo ayá como den e tempo actual ta, berdaderamente un parti di mundo.

[Rekonosementu]

Emperador Teodosio I Real Academia de la Historia, Madrid (Foto Oronoz)

[Rekonosementu di plachi na página 8]

Scala/Art Resource, N.Y.