Hañando e Clave pa Cariño Fraternal
“Suministrá na boso . . . debocion piadoso, cariño fraternal.”—2 PEDRO 1:5-7.
NA UN ocasion un dokter, kende no tabata un Testigo di Jehova, a asistí na graduacion di su yu muhé for dje Scol Bíblico di Galad di Watch Tower, unda el a ricibí entrenamentu como misionero. E dokter tabata asina impresioná cu e multitud felis cu el a opiná cu lo mester tabatin masha poco enfermedad entre e hendenan aki. Kico a haci e multitud ei asina felis? En berdad, kico ta haci tur reunion dje pueblo di Jehova, den congregacion, na asamblea di circuito i na congresonan di districto, ocasionnan felis? Esei no ta e cariño fraternal cu nan ta desplegá un pa cu otro? No cabe duda, cariño fraternal ta un motibu pakico hende a yega di bisa cu ningun otro grupo religioso ta haña asina tantu goso, felicidad i satisfaccion for di religion manera e Testigonan di Jehova.
2 Nos mester spera pa mira tal cariño fraternal en bista di loke apostel Pedro a bisa na 1 Pedro 1:22: “Awor cu boso a purificá boso alma mediante boso obedencia n’e berdad cu cariño fraternal sin hipocresia como resultado, stima un e otro intensamente di curason.” Un dje elementonan básico dje palabra griego traducí aki como “cariño fraternal” ta phi·liʹa (cariño). Su nificacion ta estrechamente ligá cu e nificacion di a·gaʹpe, e palabra generalmente traducí como “amor.” (1 Juan 4:8) Aunke e palabranan cariño fraternal i amor hopi biaha ta ser intercambiá cu otro, nan tin característicanan specífico. Nos no mester confundí nan cu otro, manera hopi traductor di Bijbel ta haci. (Den e artículo aki i den esun cu ta sigui, nos lo trata cada un dje palabranan aki.)
3 Encuanto e diferencia entre e dos palabranan griego aki, un escolástico a nota cu phi·liʹa ta “definitivamente un palabra di ternura, di un relacion estrecho i di cariño.” N’e otro banda, a·gaʹpe tin mas di haber cu e mente. Pues, aunke nos ta ser mandá pa stima (a·gaʹpe) nos enemigunan, nos no tin cariño pa nan. Pakico no? Pasobra “mal asociacion ta daña custumbernan útil.” (1 Corintio 15:33) Mas indicacion cu tin un diferencia ta e palabranan di apostel Pedro: “Suministrá na boso . . . cariño fraternal, amor.”—2 Pedro 1:5-7; compará cu Juan 21:15-17.a
Ehempelnan di Cariño Fraternal Masha Special
4 E Palabra di Dios ta duna nos un cantidad di ehempelnan excelente di cariño fraternal masha special. E cariño special aki no ta e resultado di algun antoho sino ta basá riba aprecio pa cualidadnan sobresaliente. Indudablemente e ehempel di mas conocí ta esun dje cariño cu Jesucristo tabatin pa apostel Juan. Sin duda, Jesus tabatin cariño fraternal pa tur su fiel apostelnan, i esei pa bon motibu. (Lucas 22:28) Un manera cu el a mustra esaki tabata dor di laba nan pia, dunando nan asina un les den humildad. (Juan 13:3-16) Pero Jesus tabatin un cariño special pa Juan, loke Juan a mencioná repetidamente. (Juan 13:23; 19:26; 20:2) Mescos cu Jesus tabatin motibu pa manifestá cariño na su disipel i apostelnan, Juan muy probablemente a duna Jesus motibu pa tene cariño special p’e pa motibu di su aprecio mas profundo pa Jesus. Nos por mira esaki for di Juan su skirbimentunan, tantu su Evangelio como su cartanan inspirá. Cuantu biaha e ta mencioná amor den e skirbimentunan aki! Juan su aprecio mas grandi p’e cualidadnan spiritual di Jesus ta ser mirá den loke el a skirbi na Juan capítulo 1 i 13 pa 17, i tambe dor di repetido referencianan cu e ta haci na Jesus su existencia prehumano.—Juan 1:1-3; 3:13; 6:38, 42, 58; 17:5; 18:37.
5 Di igual manera, nos lo no kier pasa por haltu dje cariño masha special cu apostel Pablo i su compañé cristian Timoteo tabatin pa otro, cua tabata, siguramente basá riba aprecio di otro su cualidadnan. Pablo su skirbimentunan ta contené comentarionan excelente tocante Timoteo, manera: “Mi no tin ningun otro cu un disposicion manera esun di dje, kende berdaderamente lo percurá p’e cosnan cu ta toca boso. . . . Boso conocé e prueba cu el a duna di su mes, cu manera un yu cu un tata el a traha cu mi como esclabo p’e adelanto dje bon nobo.” (Filipense 2:20-22) Hopi ta e referencianan personal den Pablo su cartanan na Timoteo cu ta revelá su tierno cariño pa Timoteo. Por ehempel, nota 1 Timoteo 6:20: “O Timoteo, warda loke a ser depositá na bo cuido.” (Mira tambe 1 Timoteo 4:12-16; 5:23; 2 Timoteo 1:5; 3:14, 15.) Specialmente un comparacion entre e cartanan di Pablo na Timoteo cu su carta na Tito ta enfatisá Pablo su cariño special p’e homber hóben aki. Timoteo mester a sinti mescos encuanto nan amistad, manera nos por mira for di loke Pablo a bisa na 2 Timoteo 1:3, 4: “Mi nunca ta stop di corda riba bo den mi súplicanan, . . . anhelando pa mirá bo, segun mi ta corda bo lágrimanan, pa mi por ta yená cu goso.”
6 E Scritura Hebreo tambe ta duna ehempelnan excelente, manera esun di David cu Jonatan. Nos ta lesa cu despues cu David a mata Goliat, “e alma mes di Jonatan a bira estrechamente ligá cu e alma di David, i Jonatan a cuminsá stim’é mescos cu su mes alma.” (1 Samuel 18:1) Aprecio pa David su ehempel di celo p’e nomber di Jehova i su actitud sin miedu ora el a sali bai topa e gigante Goliat sin duda a impulsá Jonatan p’e tene cariño special pa David.
7 Jonatan tabatin asina tantu cariño pa David cu el a risca su propio bida pa defendé David for di Rey Saul. Ningun momentu so Jonatan a carga rencor contra David pasobra Jehova a scoge é como e siguiente rey di Israel. (1 Samuel 23:17) David tabatin igualmente cariño profundo pa Jonatan, cua ta bisto for di loke el a bisa lamentando Jonatan su morto: “Mi ta afligí pa bo, mi ruman Jonatan, bo tabata masha agradabel pa mi. Bo amor pa mi tabata mas maraviyoso cu e amor procedente di hende muhé.” Berdaderamente, aprecio profundo a marca nan relacion.—2 Samuel 1:26.
8 Nos tin tambe un ehempel excelente den e Scritura Hebreo di cariño special di parti di dos hende muhé, Noemí i su suegra biuda Rut. Corda Rut su palabranan na Noemí: “No rogá mi pa mi bandoná bo, pa mi bolbe di compañá bo; pasobra unda cu bo bai lo mi bai, i unda cu bo pasa nochi lo mi pasa nochi. Bo pueblo lo ta mi pueblo, i bo Dios mi Dios.” (Rut 1:16) Nos no mester concluí cu Noemí, dor di su conducta i su papiamentu di Jehova, a yuda stimulá e reaccion apreciativo aki di parti di Rut?—Compará cu Lucas 6:40.
Ehempel di Apostel Pablo
9 Manera nos por a mira, apostel Pablo tabatin cariño fraternal masha special pa Timoteo. Pero tambe el a pone un ehempel maraviyoso di expresá tierno cariño fraternal pa su rumannan en general. El a bisa e ancianonan di Efeso cu “pa tres aña, di anochi i di dia, [e] no a laga di amonestá cada un cu lágrima.” Cariño fraternal caluroso? Sin ningun duda! I nan a sinti mescos pa cu Pablo. Ora nan a tende cu nan lo no mir’é mas, “nan tur a cuminsá yora bastante, i nan a brasa Pablo i a sunch’e tiernamente.” (Echo 20:31, 37) Cariño fraternal basá riba aprecio? Sí! Su cariño fraternal ta ser mirá tambe for di su palabranan na 2 Corintio 6:11-13: “Nos boca a habri pa boso, corintionan, nos curason a hancha. Boso no ta pertá i sin espacio den nos, pero sí boso ta pertá i sin espacio den boso propio tierno cariño. Pues, como recompensa en cambio—mi ta papia como si fuera cu yunan—boso tambe, hancha boso mes.”
10 Claramente, hopi dje corintionan tabata falta cariño fraternal apreciativo pa apostel Pablo. Pues, algun di nan a keha: “Su cartanan ta di peso i enérgico, pero su presencia en persona ta débil i su papiamentu ta despreciabel.” (2 Corintio 10:10) Ta p’esei Pablo a referí na nan “apostelnan superfini” i tabata motivá pa conta e pruebanan cu el a wanta, manera 2 Corintio 11:5, 22-33 ta registrá.
11 Pablo su tierno cariño pa esnan kende el a sirbi ta specialmente bisto for di su palabranan na 1 Tesalonicense 2:8: “Teniendo tierno cariño pa boso, nos tabatin masha placer pa impartí na boso, no solamente e bon nobo di Dios, sino tambe nos mes almanan, pasobra boso a bira nos stimánan.” En realidad, e tabatin asina un cariño pa e rumannan nobo aki cu e no por a spera pa tende di nan—asina ansioso e tabata pa sa con nan tabata wantando persecucion—cu el a manda Timoteo, kende a duna un bon informe cua a refrescá Pablo bastante. (1 Tesalonicense 3:1, 2, 6, 7) Cu bon motibu Perspicacia para comprender las Escrituras ta observá: “Un banchi cerá di cariño fraternal a existí entre Pablo i esnan na ken el a sirbi.”
Aprecio—E Clave pa Cariño Fraternal
12 Indudablemente, e clave pa cariño fraternal ta aprecio. No ta tur sirbidor dedicá di Jehova tin cualidadnan cu nos ta apreciá, cu ta stimulá nos cariño, haciendo nos afectuoso pa nan? Nos tur ta buscando promé e Reino di Dios i su husticia. Nos tur ta hibando un lucha balente contra tres enemigu comun: Satanas i su demoñonan, e mundu malbado bou di dominio di Satanas i e tendencianan egoista heredá dje carni pecaminoso. Nos no mester tuma semper e posicion cu nos rumannan ta haciendo nan best den bista dje circunstancianan? Tur hende riba tera ta sea na banda di Jehova of na banda di Satanas. Nos rumannan dedicá ta na banda di Jehova, sí, nos banda, i p’esei ta merecé nos cariño fraternal.
13 Ki tal di aprecio pa nos ancianonan? Nos no mester tin un cariño special pa nan en bista di nan labor duru na interes dje congregacion? Mescos cu nos tur, nan mester percurá pa nan mes i nan famia. Nan tambe tin e mesun obligacionnan cu e resto di nos pa haci studio personal, asistí na reunion di congregacion i participá den e ministerio di veld. Ademas, nan tin e obligacion pa prepará partinan di programa p’e reunionnan, duna discurso público i atendé na problemanan cu ta presentá den e congregacion, cua tin biaha ta enbolbé oranan di audiencia hudicial. Berdaderamente, nos kier “sigui tene aprecio pa hombernan dje clase ei.”—Filipense 2:29.
Manifestando Cariño Fraternal
14 Pa agradá Jehova, nos mester expresá e tierno sintimentu di cariño fraternal pa nos compañénan creyente, mescos cu Jesucristo i Pablo a haci. Nos ta lesa: “Den [cariño fraternal] tene tierno cariño pa un e otro.” (Romano 12:10, Kingdom Interlinear) “Relacioná cu [cariño fraternal], boso no tin necesidad pa nos skirbi boso, pasobra boso mes a ser siñá pa Dios pa stima un e otro.” (1 Tesalonicense 4:9, Int) “Laga boso [cariño fraternal] continuá.” (Hebreo 13:1, Int) Siguramente, nos ta agradá nos Tata celestial ora nos ta mustra cariño fraternal na su yunan terenal!
15 Den tempunan apostólico hende cristian tabatin e custumber di cumindá otro cu “un sunchi santu” of “un sunchi di amor.” (Romano 16:16; 1 Pedro 5:14) Berdaderamente un expresion di cariño fraternal! Awe, den mayoria parti dje tera, un expresion mas apropiado lo ta un sonrisa sinceramente amigabel i un dunamentu di man firme. Den paisnan latino, manera México, tin e cumindamentu den forma di un abraso, berdaderamente un expresion di cariño. E tierno cariño aki di parti dje rumannan aki kisas ta parti dje motibu dje gran aumento cu ta tumando lugá den nan paisnan.
16 Ora nos drenta Salon di Reino, nos ta haci un esfuerso special pa expresá cariño fraternal? Lo e pone cu nos tin palabranan animador pa bisa, specialmente na esnan cu ta parce deprimí. Nos ta ser bisá pa “consolá e almanan deprimí.” (1 Tesalonicense 5:14) Esei siguramente ta un manera den cua nos por comunicá e calor di cariño fraternal. Un otro manera excelente ta pa expresá aprecio pa un bunita discurso público, un parti di programa bon tratá, e bon esfuerso cu un orador studiante a haci den e Scol di Ministerio Teocrático, etcétera.
17 Ki tal di invitá varios persona na nos cas pa un cuminda of kisas pa un pasaboca despues di un reunion si esei no ta muchu lat? Nos no mester pone e conseho di Jesus na Lucas 14:12-14 na práctica? Un biaha un ex-misionero a ser nombrá como superintendente presidente den un congregacion unda tur e otro rumannan tabata di un rasa diferente. El a sinti un falta di cariño fraternal, pues el a bini cu un plan pa coregí e situacion. Con? Tur djadumingu despues di reunion el a invitá un famia diferente pa un cuminda. Despues di un aña, tur e rumannan tabata manifestando tierno cariño fraternal pa cuné.
18 Ora un ruman ta malu, na cas of na hospital, cariño fraternal lo pone cu nos ta laga e persona sa cu nos ta interesá den dje. Of kico di esnan cu ta biba den cas di cuido? Pakico no haci un bishita personal, haci un yamada di telefon of manda un tarheta expresando tierno sintimentu?
19 Ora nos ta manifestá cariño fraternal asina, nos por puntra nos mes, ‘Mi cariño fraternal ta parcial? Factornan manera color di cueru, educacion of posesion material ta influenciá mi manifestacionnan di cariño fraternal? Mi mester hancha mi mes den mi cariño fraternal, manera apostel Pablo a insta e cristiannan na Corinto pa haci?’ Cariño fraternal lo pone nos mira nos rumannan positivamente, apreciando nan pa nan bon puntonan. Cariño fraternal lo yuda nos tambe pa alegrá rib’e progreso di nos ruman en bes di envidi’é.
20 Cariño fraternal mester haci nos alerto tambe pa yuda nos rumannan den e ministerio. E mester ta manera un di nos canticanan (number 92) ta trec’é dilanti:
“Yuda e débil, di curason,
Pa nan tin brio di expresion.
Muchanan no mag ser neglishá,
Pa nan bira fuerte, di ansha librá.”
21 Pues laga nos no lubidá cu den manifestacion di cariño fraternal, e principio cu Jesus a declará den su Sermon di Ceru ta aplicá: “Practicá dunamentu, i hende lo duna na boso. Nan lo basha den boso scochi un midí excelente, primí, sagudí huntu i bashando over. Pasobra cu e midí cu boso ta midiendo, nan lo midi na boso en buelta.” (Lucas 6:38) Nos ta beneficiá nos mes ora nos ta mustra cariño fraternal, expresando nos aprecio na esnan cu ta sirbidor di Jehova mescos cu nos mes ta. Berdaderamente felis ta esnan cu tin deleite den manifestá cariño fraternal!
[Footnotes]
a Mira e siguiente artículo: “Amor (Agape)—Loke E No Ta i Loke E Ta.”
Con Lo Bo Contestá?
◻ Cua palabranan griego ta trata cu nos emocionnan, i con nan ta distinto fo’i otro?
◻ Kico ta e clave pa cariño fraternal?
◻ Cua ehempelnan bíblico nos tin di cariño fraternal special?
◻ Pakico nos mester tin tierno cariño pa nos rumannan i p’e ancianonan?
[Study Questions]
1. Ki ta un dje motibunan principal pakico reunionnan dje pueblo di Jehova ta ocasionnan asina felis?
2, 3. Cua dos palabra griego ta trata cu con nos mester sinti pa cu otro, i cua ta nan característicanan distinto fo’i otro?
4. Pakico Jesus i Juan tabatin cariño special pa otro?
5. Kico nos por bisa tocante e cariño special cu Pablo i Timoteo tabatin pa otro?
6, 7. Ki sintimentu David i Jonatan tabatin pa otro, i pakico?
8. Cua dos muher a manifestá cariño special pa otro, i pakico?
9. Kico ta mustra cu Pablo tabata ehemplar encuanto cariño fraternal?
10. Ki falta di cariño fraternal a hiba na Pablo su contamentu di su pruebanan na 2 Corintio capítulo 11?
11. Ki testimonio tin di Pablo su cariño p’e cristiannan na Tesalónica?
12. Cua motibunan tin pa nos mustra tierno cariño pa nos rumannan?
13. Pakico nos mester tin tierno cariño p’e ancianonan?
14. Cua textonan ta manda nos mustra cariño fraternal?
15. Cua ta algun manera pa expresá cariño fraternal?
16. Ki oportunidad nos tin pa mustra cariño fraternal na nos Salonnan di Reino?
17. Con un anciano a gana e cariño dje congregacion?
18. Con nos por mustra cariño fraternal pa nos rumannan enfermo?
19, 20. Con nos por mustra cu nos a hancha nos mes den cariño fraternal?
21. Ki reaccion nos por spera ora nos ta mustra cariño fraternal?
[Picture on page 15]
Apostel Pedro a insta su rumannan pa suministrá cariño fraternal na nan fe i otro cualidadnan cristian