Un Rey Ta Profana e Santuario di Jehova
“En cuanto e pueblo cu ta conoce nan Dios, nan lo prevalece.”—DANIEL 11:32.
DOS rey rival tabata confronta otro den un gera total pa gana supremacía. Uno a prevalece, anto e otro, mientras pa mas cu dos mil aña e conflicto a sigi. Den nos dia e lucha a afecta casi tur hende den mundo i a pone na prueba e integridad dje pueblo di Dios. E ta termina den un suceso cu ningun di nan dos a spera. Tal historia dramática di antemano tabata revelá na profeta Daniel di antigua.—Daniel, capítulo 10 te 12.
2 E profecía tin cu ber cu e enemistad continuo entre e rey di nort i e rey di zuid i tabata splicá en detaye den e buki “Hágase tu voluntad en la Tierra.”a Tabata mustrá den e buki cu originalmente e rey di nort tabata Siria, panort di Israel. Despues, Roma a hunga e papel. Na principio, Egipto tabata rey di zuid.
Conflicto den e tempo di fin
3 E angel cu a revela e cosnan ei na Daniel a bisa: “En cuanto abo, O Daniel, haci e palabra secreto i seya e buki, te cu e tempo di fin. Hopi lo pasa p’aki i p’ayá, i berdadero conocimento lo bira abundante.” (Daniel 12:4) Sí, e profecía ta toca e tempo di fin—un tempo cu a cuminza na 1914. Durante e tempo marcá, hopi hende ta “pasa p’aki i p’ayá” den e Scritura Santo, i cu e yudanza dje spiritu santo, berdadero conocimento, incluyendo un comprendimento di profecía bíblico, ta bira abundante. (Proverbio 4:18) Mientras cu nos ta bai mas leu den e tempo di fin, mas i mas detaye dje profecía di Daniel ta ser aclará. Pues, con nos mester comprende e profecía dje rey di nort i dje rey di zuid na 1993, awor 35 aña despues di publicacion di “Hágase tu voluntad en la Tierra”?
4 E promé gera mundial i otro angustia mundial cu Jesús a profetiza a marca e principio dje tempo di fin na 1914. (Mateo 24:3, 7, 8) Nos por localiza e aña ei den e profecía di Daniel? Sí. E principio dje tempo di fin ta e “tempo siñalá” mencioná den Daniel 11:29. (Mira “Hágase tu voluntad en la Tierra,” bladji 269-270.) Esei tabata un tempo cu Jehova a siñala caba den e tempo di Daniel, siendo cu el a yega ne fin di 2.520 aña indicá den suceso proféticamente significante di Daniel capítulo 4.
5 E 2.520 aña, sigiendo for dje destruccion di Jerusalem na aña 607 PEC durante e hubentud di Daniel te na 1914 EC, tabata yamá “e tempo siñalá dje nacionan.” (Lucas 21:24) Ki suceso político a indica nan fin? Un angel a revela esei na Daniel. E angel a bisa: “Ne tempo siñalá [e rey di nort] lo bolbe, i realmente bini contra e zuid; pero lo e no resulta di ser ne final mescos cu na principio.”—Daniel 11:29.
E rey a perde un gera
6 Te 1914, Alemania bao dje lider keiser Wilhelm (“keiser,” dje título romano “césar,”) a hunga e papel di rey di nort. E principio di conflicto den Europa tabata un otro den un serie di confrontacion ainda entre rey di nort i rey di zuid. Britania a hunga e papel di rey di zuid awor, locual a domina Egipto lihé, e dominio dje rey di zuid original. Mientras cu e gera a sigi, Estados Unidos di América, cu tabata un colonia di Britania, a uni cuné. E rey di zuid a bira e Poder Mundial anglo-americano, e imperio di mas fuerte den historia.
7 Den conflicto di antes entre e dos rey, e imperio romano, como rey di nort, semper a gana. Awor, ‘cosnan no tabata mescos cu na principio.’ Pakico no? Pasobra e rey di nort a perde e gera. Un motibo tabata cu “barcu di Kitim” a bini contra e rey di nort. (Daniel 11:30) Eseinan tabata cua barcu? Den e tempo di Daniel, Kitim tabata Chipre, i na principio dje promé gera mundial, Britania a domina Chipre. Además, segun The Zondervan Pictorial Encyclopedia of the Bible, e nomber Kitim “ta ser extendí pa inclui e W[est] en general, pero specialmente e W[est] marítima.” E New International Version ta traduci e expresion “barcu di Kitim” como “barcu di tera di costa di west.” Den e promé gera mundial, barcu di Kitim a resulta di ser barcu di Britania, hancrá for di costa di west di Europa. Despues, barcu di Nort América, e continente di west, a reforza e flotilla naval di Britania.
8 Bao dje atake, e rey di nort a bira “desanimá” i a admiti derota na 1918. Pero, esei no a caba cuné. “Lo e realmente bolbe i tira denunciacion contra e pacto santo i actua efectivamente; i tin cu bolbe i duna consideracion na esnan bandonando e pacto santo.” (Daniel 11:30) Asina e angel a profetiza, i a resulta di ser asina.
E rey a actua efectivamente
9 Despues dje gera, na 1918, Aliado victorioso a impone un pacto di paz castigador riba Alemania, aparentemente cu e intencion di mantene e pueblo alemán cerca morto di hamber pa un tempo indefinitivo. Como resultado, despues di a tambaleá pa algun aña den afliccion extremo, Alemania tabata cla pe presentacion di Adolf Hitler. El a alcanza poder supremo na 1933 i un bez a lanza un atake malicioso contra e “pacto santo,” cu e rumanan ungí di Jesucristo a representa. Den dje, el a actua efectivamente contra tal cristian leal, persigiendo cruelmente hopi di nan.
10 Hitler a disfruta di bon éxito económico i diplomático, actuando efectivamente den tal campo també. Den un poco aña, el a haci Alemania un poder pa tuma na cuenta, hayando yudanza den su esfuerzo di parti di “esnan bandonando e pacto santo.” Ken tabata esei? Evidentemente, lider di cristiandad, cu a pretende di ser den un pacto cu Dios pero cu foi hopi tempo a kita como disípel di Jesucristo. Cu bon éxito Hitler a pidi apoyo di esnan “bandonando e pacto santo.” E papa di Roma a cera un conbenio cuné, i tanto e Iglesia católico romano, como religion protestante di Alemania, a apoya Hitler durante su reinado di 12 aña di terror.
11 Hitler tabatin tanto éxito cu el a cuminza un gera, manera e angel a profetiza correctamente. “I lo tin braza cu lo lanta, procediendo foi dje; i nan realmente lo profana e santuario, e fortaleza, i kita e rasgo constante.” (Daniel 11:31a) Den Israel di antigua, e santuario tabata un parti dje tempel den Jerusalem. Sin embargo, ora hudío a rechaza Jesús, Jehova Dios a rechazánan i nan tempel. (Mateo 23:37–24:2) Desde e promé siglo, e tempel di Jehova realmente ta un tempel spiritual, cu su lugar santísimo den cielo i cu un curá spiritual riba tera den locual e rumanan ungí di Jesús, e Sumosacerdote, ta sirbi. Desde 1935, e multitud grandi a adora den asociacion cu e resto ungí; p’sei ta ser bisá cu nan ta sirbi ‘den e tempel di Dios.’ (Revelacion 7:9, 15; 11:1, 2; Hebreo 9:11, 12, 24) E curá terrenal dje tempel tabata profaná bao di persecucion sin fin dje resto ungí i nan compañénan den país unda e rey di nort a domina. E persecucion tabata asina severo cu e rasgo constante—e sacrificio público di alabanza pe nomber di Jehova—tabata kitá. (Hebreo 13:15) Sin embargo, historia ta mustra cu apesar di sufrimento horrible, cristian ungí fiel, hunto cu e “otro carnénan,” a sigi predica clandestinamente.—Juan 10:16.
“E cos repugnante”
12 Ora e fin dje segundo gera mundial tabata cerca, tabatin un otro suceso. “Nan siguramente lo pone na lugar e cos repugnante cu ta causa desolacion.” (Daniel 11:31b) E “cos repugnante” cu Jesús també a mencioná, tabata identificá como e Liga di Nacion caba, e bestia salbahe di color scarlata cu segun Revelacion a baha den abismo. (Mateo 24:15; Revelacion 17:8; mira e buki Light, #2, bladji 94.) El a haci esei na comienzo di Gera Mundial II. Sin embargo, ne Asamblea Teocrático di Mundo Nobo di Testigo di Jehova na 1942, Nathan H. Knorr, e tercer presidente dje Watch Tower Bible and Tract Society, a splica e profecía di Revelacion 17 i a adverti cu e bestia lo sali atrobé for dje abismo.
13 Historia a confirma e berdad di su palabra. Entre Augustus i October di 1944, den e edificio di Dumbarton Oaks den Washington, D.C., na América, trabao a cuminza riba statuut di loke ta ser yamá Naciones Unidas. Cincuentiun nacion a adopta e statuut, incluyendo loke tabata Union Soviética, i ora el a drenta den vigor dia 24 di October di 1945, en efecto, e difunto Liga di Nacion a sali for di abismo.
14 Alemania tabata un enemigo principal di rey di zuid durante e dos gera mundial. Despues di Gera Mundial II, un parti di Alemania a cambia pa bira un aliado dje rey di zuid. Pero, e otro parti di Alemania awor a duna apoyo na un otro imperio fuerte. E bloque comunista, locual awor a inclui un parti di Alemania, a lanta den oposicion fuerte contra e alianza anglo-americano, i e rivalidad entre e dos rey a bira un Gera Friu.—Mira “Hágase tu voluntad en la Tierra,” bladji 264-284.
E rey i e pacto
15 Awor e angel a bisa: “Esnan cu ta actua malamente contra e pacto, lo e hiba na apostasía mediante labiamento.” (Daniel 11:32a) Kende ta esnan cu ta actua malamente contra e pacto? Atrobé, nan por ta solamente lider di cristiandad, cu ta yama nan mes cristian pero cu nan accion ta profana e nomber mes di cristianismo. Durante e segundo gera mundial, “e gobierno soviético a haci esfuerzo pa recluta e yudanza material i moral di religion pe defensa dje patria.” (Religion in the Soviet Union, di Walter Kolarz). Despues dje gera, lider religioso a purba di mantene tal amistad apesar dje política ateísta dje poder cu awor a bira rey di nort.b Asina, cristiandad mas cu nunca a bira un parti di mundo—un apostasía repugnante den bista di Jehova.—Juan 17:14; Santiago 4:4.
16 Pero, kico di cristian berdadero? “En cuanto e pueblo cu ta conoce nan Dios, nan lo prevalece i actua efectivamente. I en cuanto esnan cu tin perspicacia den e pueblo, nan lo revela comprendimento na hopi. I spada i flam, sclabitud i plunder, siguramente lo hácinan trompica pa algun dia.” (Daniel 11:32b, 33) Hende cristian cu tabata biba bao di rey di nort, aunque correctamente tabata “sumiso na autoridad superior,” no tabata parti di mundo. (Romano 13:1; Juan 18:36) Nan tabata cuidadoso pa paga cos di César na César, pero també a paga “cos di Dios na Dios.” (Mateo 22:21) P’es motibo, nan integridad tabata poní na prueba.—2 Timoteo 3:12.
17 Cu ki resultado? Nan a ‘prevalece’ i també a ‘trompica.’ Nan a trompica pasobra nan tabata persigí i a sufri intensamente, i algun asta tabata matá. Pero, nan a prevalece pasobra, e mayor parti di nan a permanece fiel. Sí, nan a vence mundo, mescos cu Jesús a vence mundo. (Juan 16:33) Además, nan predicamento nunca a para, aunque nan a háyanan den prisón of den concentrasicamp. Cu nan predicacion, nan a ‘duna comprendimento na hopi.’ Apesar di persecucion, den casi tur país bao di mando dje rey di nort, e cantidad di Testigo di Jehova a aumenta. Gracias ne fieldad di “esnan cu tin perspicacia,” un parti semper aumentante dje “multitud grandi” a presenta den tal país.—Revelacion 7:9-14.
18 Papiando dje persecucion dje pueblo di Dios, e angel a profetiza: “Pero ora nan ta hací trompicá, nan lo ser yudá cu un poco yudanza.” (Daniel 11:34a) Con esei a sosode? Entre otro cosnan, e triunfo dje rey di zuid den e segundo gera mundial a resulta den un alivio grandi pa hende cristian bibando bao dje rey rival di nort. (Compara cu Revelacion 12:15, 16.) Anto, esnan cu tabata persigí bao dje sigiente rey di nort a experimenta alivio de bez en cuando, i durante cu e Gera Friu tabata cabando, hopi lider político a tuma na cuenta cu fiel cristianan no tabata un peliger i p’sei a dúnanan reconocimento legal.c Mashá yudanza també a bini dje cantidad aumentante dje multitud grandi, cu a responde ne fiel predicamento di esnan ungí i a yúdanan, segun detaye di Mateo 25:34-40.
Un limpiamento pe pueblo di Dios
19 Tur hende cu a mustra interés den e sirbishi di Dios ne tempo ei no tabatin bon intencion. E angel a adverti: “Hopi siguramente lo uni cu nan mediante labiamento. I algun di esnan cu tin perspicacia lo wordu hací trompicá, pa haci un trabao di refinamento debí na nan i pa haci un limpieza i haci un blanchamento, te ne tempo di fin; pasobra ainda esei ta pe tempo siñalá.”d (Daniel 11:34b, 35) Algun hende a mustra un interés den e berdad pero no tabata dispuesto pa haci un berdadero dedicacion pa sirbi Dios. Otronan cu a parce di acepta e bon nobo realmente tabata spión pa autoridad político. Un informe di un país ta bisa: “Algun di tal hende sin escrúpulo tabata plenamente comunista cu a drenta secretamente den e organizacion di Señor, a haci un gran manifestacion di celo, i asta tabata nombrá na puesto di responsabilidad den e organizacion di Jehova Dios.”
20 Infiltrador a causa aresto di algun ruman fiel den man di autoridad. Pakico Jehova Dios ta permiti tal cos sosode? Pa un refinamento, i limpieza. Mescos cu Jesús a “siña obedencia for di loke el a sufri,” asina tal ruman fiel a siña awante for di prueba di nan fe. (Hebreo 5:8; Santiago 1:2, 3; compara cu Malaquías 3:3.) Asina nan ta ser ‘refiná, hací limpi, i blanchá.’ Gran alegría ta spera tal ruman fiel ora e tempo siñalá ta yega pa nan haya recompensa pa nan awante. Esei lo ser mirá ora nos ta considerá mas dje profecía di Daniel.
[Footnotes]
a Publicacion di Watchtower Bible and Tract Society of New York, Inc., i presentá na inglés den e Asamblea Internacional di Testigo di Jehova “Boluntad Divino” na 1958.
b E número di November di 1992 di World Press Review a publica un artículo dje curant The Toronto Star cu a bisa: “Durante e último poco aña, ruso a mira dozenas di ilusion innengable na antes tocante e historia di nan país desintegrá dilanti dje echonan. Pero, revelacion tocante colaboracion di religion cu e gobierno comunista ta representa e golpi di mas fatal.”
c Mira The Watchtower di 15 di Juli di 1991, bladji 8-11.
d “Te ne tempo di fin” por nifica “durante e tempo di fin.” E palabra traducí ei como “te ne” ta ser usá den e texto arameo di Daniel 7:25 i ta nifica ei “durante” of “den.” E palabra tin un nificacion similar den e texto hebreo di 2 Rey 9:22, Job 20:5, i Huez 3:26. Sin embargo, den casi tur traduccion e ta ser traducí “te na,” i si esei ta e comprendimento correcto, anto “e tempo di fin” ei mester ta e tempo di fin dje awante dje pueblo di Dios.—Compara cu “Hágase tu voluntad en la Tierra.”—bladji 286.
Bo Ta Corda?
◻ Pakico nos djawe mester spera di haya un comprendimento mas claro dje profecía di Daniel?
◻ Con e rey di nort ‘a tira denunciacion i a actua efectivamente’?
◻ Con e grupo di esclabo a mira e representacion dje “cos repugnante”?
◻ Di ki manera e resto ungí ‘a trompica, a prevalece, i a recibi un poco yudanza’?
[Study Questions]
1, 2. Cua conflicto dramático a marca historia humano pa mas cu 2.000 aña?
3. Segun e angel, na ki tempo nos por comprende e profecía tocante e rey di nort i e rey di zuid, i di ki manera?
4, 5. (a) Unda e aña 1914 ta situá den e profecía di Daniel tocante e rey di nort i e rey di zuid? (b) Segun e angel, kico mester a sosode na 1914?
6. Na 1914, ken tabata e rey di nort, i ken tabata e rey di zuid?
7, 8. (a) Den e promé gera mundial, di ki manera cosnan no a resulta “mescos cu na principio”? (b) Ki resultado tabatin dje promé gera mundial, pero segun e profecía, con e rey di nort a reacciona?
9. Kico a resulta den e lantamento di Adolf Hitler, i con el a “actua efectivamente”?
10. Buscando apoyo, Hitler a frei cu ken, i cu cua resultado?
11. Con e rey di nort a “profana e santuario” i a “kita e rasgo constante”?
12, 13. Kico ta e “cos repugnante,” i—segun cu e sclabo fiel i prudente a mira di antemano—di ki manera i na ki tempo e tabata reestablecí?
14. Na ki tempo i di ki manera identidad dje rey di nort a cambia?
15. Ken ta ‘esnan cu ta actua malamente contra e pacto,’ i nan tabatin cua relacion cu e rey di nort?
16, 17. Ken ta “esnan cu tin perspicacia,” i con a bai cu nan bao di rey di nort?
18. Cua “poco yudanza” e resto ungí a recibi bibando bao dje rey di nort?
19. (a) Con algun “a uni cu nan mediante labiamento”? (b) Kico kier men e expresion “te ne tempo di fin”? (Mira nota.)
20. Pakico Jehova a permiti ‘trompicamento’ di algun cristian fiel debí na infiltrador hipócrita?
[Picture on page 15]
Bao di Hitler, e rey di nort a recobra completamente for di su derota na 1918 den man dje rey di zuid
[Picture on page 16]
Lider di cristiandad a purba di cultiva un relacion cu e rey di nort
[Credit Line]
Zoran/Sipa Press