“E Ultimo Enemigu” Lo Ser Derotá!

ORA bo tabata mucha, talbes bo tabatin miedu di scuridad. Cuentanan di horor i asta algun cuenta di hada kisas a yená bo cu ansiedad. Ki trankilisante tabata ora bo mama of tata a laga un lampi cendí miéntras cu bo a purba pega soño!

Morto, di igual manera, ta spanta hopi hende. Tog, e no mester ta asina. Pakico? Pa motibu di loke morto realmente ta.

Conocé Bo Enemigu

Rey sabí Salomon di Israel di antigua a declará: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” (Eclesiastés 9:5) Di acuerdo cu e pensamentu divinamente inspirá aki, hañá den bo propio Bijbel, morto ta simplemente lo contrario cu bida. E mortonan no tin existencia conciente.

Refiriendo na morto den un manera ilustrativo, apostel cristian Pablo ta skirbi: “Morto, unda bo victoria ta? Morto, unda bo pui ta?” Kico ta e pui cu ta producí morto? Pablo ta bisa: “E pui cu ta producí morto ta picá.” (1 Corintio 15:55, 56; Oseas 13:14) Kico, anto, ta orígen dje pui fatal aki? Un otro caminda den e Scritura, Pablo ta declará: “Mediante un solo homber picá a drenta den mundu i morto pa medio di picá, i asina morto a plama na tur hende pasobra nan tur a peca.” (Romano 5:12) E apostel no ta laga duda en cuanto e identidad dje “solo homber” ora e ta bisa: “Den Adam tur ta muriendo.” (1 Corintio 15:22) Sí, mediante e desobedencia di nos promé tata, Adam, nos tur ta sometí n’e pui di morto.—Génesis 3:1-19.

Cu bon salú i un famia amoroso den ambiente placentero, ningun di nos lo scoge pa muri. Sin embargo, manera Bijbel ta mustra, “tempu i sosodimentu imprevisto” por kita nos bida. (Eclesiastés 9:11) En realidad, nos no sa kico lo pasa nos bida mañan. (Santiago 4:14) Un cos ta sigur—nos tur a heredá picá i morto. P’esei, morto ta persiguí nos i ta tumba nos manera un enemigu.

Enfrentando e Morto di un Ser Kerí

Morto ta specialmente un enemigu ora e ta tumba un ser kerí. “Lo ta pió pa bo,” un esposa malu pa muri a bisa su casá segun cu e tabata enfrentá morto. Pakico e por a bisa esei? Pasobra Bijbel ta bisa: “Tur loke bo man haña pa haci, haci’é cu bo mes forsa, pasobra no tin trabou ni formacion di proyecto ni conocimentu ni sabiduria den Sheol [e graf comun di humanidad], e lugá unda bo ta bayendo.” (Eclesiastés 9:10) E mortonan no ta sufri mas. Pero e carga di tristesa ta cai riba e famia i amigunan cu ta keda atras. Por haci algu tocante tal sufrimentu?

E páginanan di Bijbel, e Palabra di Dios, ta contené hopi palabra di consuelo. Por ehempel, lesando i meditando rib’e salmonan siguramente ta un fuente di consolacion. Palabranan manera esakinan, en berdad ta di consuelo: “Bendicioná sea Jehova, kende diariamente ta hiba nos carga, e Dios berdadero di nos salbacion.”—Salmo 68:19.

Un otro fuente di consuelo ta e congregacion cristian. Den e promé siglo E.C., apostel Pablo a skirbi: “Onra biuda cu en realidad ta biuda. Pero si cualkier biuda tin yu of nietu [cu por percurá p’e materialmente], laga esakinan siña promé pa practicá debocion piadoso den nan mes cas i pa sigui paga un debido compensacion na nan mayornan i abuelonan, pasobra esaki ta aceptabel den bista di Dios. Laga un biuda ser poné riba e lista cu a cumpli no ménos cu sesenta aña, esposa di un solo esposo, cu tin testimonio duná di dje pa obranan excelente, si el a cria yunan, si el a ricibí stranhero, si el a laba pia dje santunan, si el a aliviá esnan den tribulacion, si el a sigui diligentemente tur bon obra.” (1 Timoteo 5:3, 4, 9, 10) Testigonan di Jehova awe di manera similar ta yuda i ta consolá tal compañé creyente.

Hopi biaha e mayor ahuste cu esnan cu ta keda atras mester haci ta unu emocional. Un homber kende su casá a muri dos aña anterior a skirbi: “Mi a stima mi esposa mashá. Esaki ta e suceso di mas tristu den mi bida, i mi ta haña cu ta difícil pa soport’é.” Un persona cu tabata casá pa algun tempu a compartí su bida den e relacion humano di mas íntimo. Ora un partner di matrimonio ta muri, e partner cu ta keda atras naturalmente ta sinti un pérdida grandi. Na ken e persona ei por acudí pa yudansa?

Den circunstancianan asina, bon compañé cristian por ta edificante. “Un berdadero compañé ta stima na tur tempu, i ta un ruman cu ta nací pa ora tin angustia,” un proverbio sabí ta bisa. (Proverbio 17:17) Un biuda of biudo mester di yudansa—compañé cu ta duna berdadero apoyo. Amigunan sabí ta animá e persona den verdriet pa papia, asta ora esei ta trece lágrima. Talbes un cristian kende ya caba a experimentá e dolor di curason di perde un casá por ofrecé algun yudansa bondadosamente. Bijbel ta consehá: “Consolá esnan deprimí.” (1 Tesalonicense 5:14) Pero corda cu biuda i biudonan ta sinti falta di nan partner di matrimonio. P’esei, esun cu ta keda atras mester confia den otronan solamente bou di circunstancianan cu ta permití tur mantené un conducta puru.—1 Pedro 2:12.

E mihó remedi pa combatí e dolor cu morto ta ocasioná, ta pa keda ocupá yudando otronan—un berdadero desafio pa esnan cu ta kere cu nán ta esnan den necesidad di yudansa! Aki ta caminda inegoismo ta hunga un rol. Haciendo cosnan inegoistamente pa otronan ta yuda core cu tristesa i pena, pasobra Jesus a bisa: “Tin mas felicidad den duna cu tin den ricibí.”—Echo 20:35.

Victoria Riba Morto

Un picá di abeha por ta bastante doloroso, asta fatal. Pero, generalmente sacando e pui dje insecto pegá den bo cueru lo yuda trece alivio. Pero ki speransa tin pa alivio for dje pui cu ta producí morto?

Despues di splica cu picá ta e pui cu ta producí morto, Pablo ta sclama: “Grácias na Dios, pasobra e ta duna nos e victoria mediante nos Señor Jesucristo!” (1 Corintio 15:57) Con victoria riba morto ta ser asociá cu Cristo? Jesus a mustra cu esaki ta e caso ora el a bisa tocante su mes: “E Yu di hende a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:28) Sí, pa esnan cu ta ehercé fe den Jesucristo, e Yu di Dios, i e sacrificio di rescate cu Jehova a percurá mediante dje, morto heredá for di Adam lo no resultá den no-existencia permanente.—Juan 3:16.

Animador en berdad ta e palabranan di Jesus: “E ora ta bini den cua tur esnan cu ta den graf memorial lo tende su bos i lo sali, esnan cu a haci bon cosnan pa un resureccion di bida, esnan cu a practicá cosnan baho pa un resureccion di huicio.”—Juan 5:28, 29.

Siglonan mas promé, Isaías, profeta di Dios a profetisá: “E [Jehova Dios] realmente lo traga morto pa semper, i e Señor Soberano Jehova siguramente lo seca lágrima di tur cara.” (Isaías 25:8) Atrobe, na Revelacion 21:4, Bijbel ta presentá e prospecto maraviyoso aki: “[Dios] lo seca tur lágrima for di nan wowo, i morto lo no existí mas, tampoco lo tin yoramentu ni sclamamentu ni dolor mas. E cosnan anterior a pasa.” Fortalecé p’e speransa di Bijbel aki pa esnan drumí den morto, esnan cu ta keda atras no tin cu “yora manera e otronan tambe ta haci cu no tin speransa.”—1 Tesalonicense 4:13.

Purba visualisá loke Dios tin wardá pa humanidad, manera Bijbel ta revelá. E “tribulacion grandi” inminente ta nificá condenacion p’e mal sistema di cosnan actual. (Revelacion 7:14) Esnan cu ta practicá religion falsu ta topa nan fin. E elementonan político i comercial cu ta contribuí na scarcedad di cuminda i guera ta desparcé. Jesucristo ta pasa pa mara Satanas e Diabel den abismo, kende a causa asina tantu morto humano. Despues Cristo ta cuminsá su Reino di Mil Aña, durante cua e ta aplicá e balor di su sacrificio di rescate na humanidad. E mortonan ta bolbe bek den e resureccion tan-sperá, i e lus dje Palabra di Dios ta briya asina skerpi cu supersticion tocante morto, enemigu di humanidad, no ta existí mas. Tur hende na bida n’e tempu ei tin e oportunidad pa siña Dios su camindanan i pa armonisá cu su normanan hustu.—Proverbio 4:18; Echo 24:15; Hebreo 2:14, 15; Revelacion 18:4-8; 19:19-21; 20:1-3.

‘Despues, e fin,’ Pablo ta bisa, ‘ora Cristo Jesus ta entregá e reino na su Dios i Tata. Pasobra e ta goberná como rey te ora Dios pone tur enemigu bou di su pia. Como e último enemigu, morto tin cu ser reducí na nada.’ (1 Corintio 15:24-26) Tur incapacidad resultando for di picá di Adam ta desparcé. Un prueba final ta tuma lugá, i stimadornan di Dios ta pasa dor di dje den fieldad. (Revelacion 20:4-10) Restorá na perfeccion, e hendenan obediente aki ta biba, no pa djis setenta of asta cien i dies aña, sino pa semper. Ki un don for di Dios mediante su Yu stimá!—Romano 6:23.

Pues, anto, con largu bo por biba? Bo duracion di bida por extendé pa tur eternidad. Bibando awor den e “tempu di fin” dje mundu aki, kisas lo bo no muri nunca mas. (Daniel 12:4; Juan 11:25, 26; 17:3) Si bo ta haci e boluntad divino, lo bo por pasa na bida te den e mundu nobo primintí pa Dios.—2 Pedro 3:13.

Sin embargo, si bo ta di edad hopi avansá, bo mester considerá realísticamente e posibilidad di muri. Siguramente, e speransa di resureccion ta trece goso. Pero kisas bo ta puntra bo mes con Jehova lo areglá bida di famia den e sistema nobo di cosnan ei. No laga asuntunan asina preocupá bo, pasobra Jehova lo percurá p’e felicidad duradero di esnan cu pa semper lo ta fiel na dje.

Segun cu e “último dianan” crítico aki di Satanas su mal sistema ta yega na nan conclusion, no laga e miedu di morto hortá bo dje privilegio di sirbi Jehova awor mes. (2 Timoteo 3:1) Si bo perde un ser kerí den morto, consolá bo mes cu e gara di morto ta solamente temporal. (Revelacion 20:13, 14) Confia den e speransa di resureccion. Anto, sea bo drenta e mundu nobo mediante sobrebibencia dje tribulacion grandi of mediante un resureccion, sea sigur dje garantia inspirá cu morto, e último enemigu, tin cu ser reducí na nada.—Revelacion 7:9, 14.

[Picture on page 5]

Bon compañé cristian por edificá spiritualmente esnan cu ta keda atras

[Picture on page 7]

Kedando ocupá yudando otronan ta reducí e pena causá p’e morto di un ser kerí