Ehempel di Humildad pa Imita

“Bo mes humildad lo hácimi grandi.”—SALMO 18:35.

JOSEPH F. RUTHERFORD tabatin un aparencia impresivo, siendo mas cu 180 cm halto i pisando hopi mas cu 90 kg. També, e tabatin un boz fuerte, cu el a usa no solamente dunando di conoce e nomber di Jehova na moda cu e nunca tabata hací na antes sino també pa desenmascara e falsedad di lider religioso di cristiandad, yamando nan religion “un laz i un engaño.” Pero, aunque discurso di dje tabata fuerte, ora el a haci oracion cu e famía di Betel den e centro principal, su boz tabata manera esei di un mucha homber den conbersacion cu su tata, dunando evidencia asina di tanto su relacion íntimo cu su Creador como di su humildad. Sí, e tabata tanto humilde como un mucha.—Mateo 18:3, 4.

² Indudablemente, tur berdadero sirbidor di Jehova Dios ta humilde. Asina, nan ta para na contraste notable cu hende di mundo. Awe, mas cu nunca na antes, e ta yen di hende orguyoso. Hende di rango halto i cu tin poder, hende ricu i hende sabí, i asta hopi hende pober i hende sin oportunidad di otro manera ta orguyoso.

³ Orguyo ta causa mashá hopi contencion i miseria. En berdad, tur calamidad di universo a cuminza pa motibo cu un cierto angel a bira orguyoso, deseando e adoracion cu ta debí solamente ne Creador, Jehova Dios. (Mateo 4:9, 10) Además, e persona cu a haci su mes e Diabel i Satanás, a logra seduci e promé muher, Eva, atrayendo su orguyo. El a priminti na dje cu si e come e fruta prohibí, e por bira manera Dios mes, conociendo tanto loke ta bon como loke ta malu. Si Eva tabata humilde, e por a puntra, ‘Pakico mi mester deseá di ser manera Dios?’ (Génesis 3:4, 5) Ora nos ta considera estado deplorable di humanidad, fisical, mental, i moralmente, ki impordonabel orguyo tá di parti di hende! No ta straño cu nos ta leza cu Jehova Dios ta odia “halzamento propio i orguyo”! (Proverbio 8:13) Na contraste notable cu tur hende orguyoso, tin ehempel di humildad hayá den e Palabra di Dios, e Bijbel.

Jehova Dios ta humilde

⁴ Jehova Dios—e Haltísimo, e Soberano Universal, e Rey di eternidad—ta humilde. (Génesis 14:22) Ta posibel pa Jehova Dios ser humilde? Sí, en berdad! Rey David a bisa, segun Salmo 18:35: “Lo bo dunámi bo escudo di salbacion, i bo mes man drechi lo sostenémi, i bo mes humildad lo hacími grandi.” Claramente, rey David a reconoce cu e humildad di Jehova a hacié, David, grandi. Anto, atrobé, nos ta leza den Salmo 113:6 cu Jehova “ta rebaha su mes pe loer cielo i tera.” Otro traduccion ta bisa cu e ta “zak pa loer,” (New International Version) “ta baha su mes pa wak tanto abao.”—The New English Bible.

⁵ Jehova Dios siguramente a rebaha den su manera di trata cu Abraham, permitiendo Abraham di cuestiona su husticia ora el a propone di destrui e dos stad malbado di Sodoma i Gomorra.a (Génesis 18:23-32) I ora Jehova a expresa su inclinacion di destrui e nacion di Israel—na un tempo pa su idolatría, i na un otro tempo pa su rebelion—Moisés na cada ocasion a razona cu Jehova como si fuera den conbersacion cu otro hende. Cada bez Jehova a responde favorablemente. Dios a manifesta humildad, contestando peticion di Moisés en cuanto Israel, e pueblo di Dios. (Éxodo 32:9-14; Número 14:11-20) Otro ehempel dje tratamento humilde di Jehova cu hende, den un sentido persona cu persona, ta ser mirá den su relacion cu Gedeón i Jonás, cu ta pará skirbí den Huez 6:36-40 i Jonás 4:9-11.

⁶ Realmente, por lo menos nuebe bez, e Bijbel ta bisa cu Jehova ta “tarda pa rabia.”b Siendo cu Jehova Dios a tene gran pacenshi, a tarda pa rabia, den su tratamento cu humanidad imperfecto através dje miles di aña, esei ta duna mas prueba di su humildad. Hende orguyoso no tin pacenshi, ta lihé pa expresa rabia, hopi diferente cu gran pacenshi. E humildad di Jehova ta haci e orguyo di hende imperfecto ki absurdo! Siendo cu nos ta wordu bisá pa ser ‘imitador di Dios como yiunan stimá,’ nos tin cu ser humilde mescos cu Dios ta humilde.—Efesio 5:1.

Ehempel di humildad di Cristo

⁷ E segundo ehempel mas notable di humildad pa nos imita ta mencioná den 1 Pedro 2:21: “Realmente, boso a wordu yamá pe camina aki, pasobra asta Cristo a sufri pa boso, lagando un modelo pa boso sigi su pasonan cu sumo cuidao i atencion.” Hopi tempo promé cu el a bini na mundo como hende, tabata profetizá tocante dje den Zacarías 9:9: “Grita den triunfo, O yiu muher di Jerusalem. Mira! Bo rey mes ta bini cerca bo. E ta husto, sí, salbá; humilde, i montá riba burricu.” Si Jesús tabata orguyoso, e lo a acepta e oferta di e Diabel di tur reino di mundo en cambio pa un solo acto di adoracion. (Mateo 4:9, 10) El a demonstra su humildad també atribuyendo na Jehova tur e mérito pa su siñamento, bisando: “Despues cu boso hiza e Yiu di hende, anto boso lo sa cu mi ta Ele, i cu mi no ta haci nada di mi mes iniciativa; sino net manera e Tata a siñami, esei mi ta papia.”—Juan 8:28.

⁸ E por a bisa apropiadamente na oyentes: “Tuma mi yugo riba boso i siña di mi, pasobra mi ta di genio suave i humilde di curazón, i boso lo haya refrescamento pa boso alma.” (Mateo 11:29) I ki un ehempel excelente di humildad el a pone labando e pia di su apóstolnan riba e último anochi cu e tabata cerca nan como hende! (Juan 13:3-15) Sumamente apropiado, den Filipense 2:3-8, apóstol Pablo a conseha hende cristian pa mantene “humildad di mente,” mencionando Jesucristo como un ehempel: “Mantene den boso e actitud mental aki cu també tabata den Cristo Jesús, cu, aunque el a existi den e forma di Dios, e no a duna consideracion na un halzamento, esta, pe ser igual cu Dios. No, sino a rebaha su mes i a tuma forma di esclabo i a yega di ser den semehanza di hende. Mas cu esei, ora el a hayé manera hende, el a humiya su mes i a bira obediente te na morto, sí, morto riba staca di tormento.” Ora e crisis di mas grandi di su bida a enfrenté, el a reza humildemente na su Tata: “No manera mi kier, sino manera bo kier.” (Mateo 26:39) Siguramente, pa nos ser imitador di Jesucristo, sigiendo cuidadosamente den su pasonan, nos tin cu ser humilde.

Apóstol Pablo, un ehempel excelente di humildad

⁹ Apóstol Pablo a skirbi: “Bira imitador di mi, mescos cu mi ta di Cristo.” (1 Corintio 11:1) Apóstol Pablo a imita Jesucristo cu su humildad di mente, poniendo asina un otro ehempel di humildad pa nos imita? Sigur cu sí. Pa cuminza, el a reconoce humildemente cu e tabata esclabo di Jesucristo. (Filipense 1:1) El a bisa anciano den Efeso dje manera cu el a ‘traha como esclabo pa Señor cu e mayor humildad di mente i lágrima i prueba cu a pasé bao di complot di hudío.’ (Echo 20:17-19) Si e no tabata humilde, e nunca lo a skirbi e palabra encontrá den Romano 7:18, 19: “Mi sa cu den mi, esta, den mi carni, no ta biba nada bon . . . Pasobra e bon cu mi ta deseá mi no ta haci, pero e malu cu mi no ta deseá ta loke mi ta practica.”

¹⁰ Indicando també e humildad di Pablo tabata loke el a skirbi na hende cristian den Corinto, cu ta pará den 1 Corintio 2:3: “Mi a bini cerca boso den debilidad i den temor i cu hopi temblamento.” Haciendo referencia humildemente na su moda di anda di antes promé cu el a bira cristian, el a skirbi: “Na antes mi tabata un blasfemador i persigidor i un homber insolente. . . . Cristo Jesús a bini na mundo pa salba pecador. Mi ta esun principal di nan.”—1 Timoteo 1:13, 15.

¹¹ Demonstrando su humildad mas ainda, Pablo a atribui na Jehova Dios tur e éxito di su esfuerzo. El a skirbi tocante su ministerio: “Mi a planta, Apolos a muha, pero Dios a sigi hacié crece; di manera cu ni esun cu ta planta ta algo ni esun cu ta muha, sino Dios cu ta hacié crece.” (1 Corintio 3:6, 7) També, el a pidi su rumanan haci oracion pé, pe por duna un bon testimonio, manera nos ta leza den Efesio 6:18-20: “Haci oracion . . . pa mi, pa ser duná na mi e capacidad di papia . . . pa mi por papia en relacion cu [e secreto sagrado dje bon nobo] cu curashi manera mi mester papia.”

¹² Pablo a demonstra su humildad també den e manera cu el a coopera cu otro apóstol: “Santiago i Céfas i Juan . . . a dunámi i Barnabás e man drechi di co-participacion, pa nos bai ne nacionan, pero nan a bai cerca hende circuncidá.” (Galatio 2:9) El a demonstra també su boluntad di coopera cu anciano dje congregacion di Jerusalem, compañando cuatro homber hoven i pagando nan gasto mientras cu nan a cumplí cu un huramento.—Echo 21:23-26.

¹³ E humildad di Pablo ta keda tanto mas notable ora nos ta ripara con Jehova Dios a usé asina poderosamente. Por ehempel, nos ta leza cu “Dios a sigi haci obra extraordinario di poder mediante man di Pablo.” (Echo 19:11, 12) Mas ainda, e tabata duná vision i revelacion sobrenatural. (2 Corintio 12:1-7) Nos no mag pasa por halto tampoco di cu e tabata inspirá pa skirbi 14 dje 27 buki (realmente carta) dje Scritura Griego Cristian. Tur esei no a haci Pablo halza, den un sentido. El a keda humilde.

Ehempel djawe

¹⁴ Den Hebreo 13:7, nos ta leza e conseho di apóstol Pablo: “Corda esnan cu ta hiba delantera den boso, cu a papia e palabra di Dios cu boso, i ora boso mira e resultado di nan conducta, imita nan fe.” Di acuerdo cu tal principio, nos por tuma como un ehempel djawe e promé presidente dje Sociedad Watch Tower Bible and Tract, Charles Taze Russell, kende su fe nos por imita. E tabata un homber humilde? Di tur manera! Manera tabata bon bisá, den su bukinan na inglés Estudio den e Scritura, seis volumen di mas cu 3.000 bladji, e no a menciona su mes ni sikiera un biaha. Publicacion dje Sociedad Watch Tower Bible and Tract djawe ta sigi e mesun principio i no ta hala atencion na hende, identificando autor di artículo.

¹⁵ Den e Toren di Vigilancia na inglés, Russell a skirbi un biaha cu e no a conoce cos yamá “ruselismo” i “ruselita,” palabra cu opositor di dje a usa pero cu el a rechaza categóricamente. El a skirbi: “Nos trabao . . . ta di uni hunto pida dje berdad cu tabata plamá pa hopi tempo i presentánan ne pueblo di Señor—no como algo nobo, no como nos mes berdad, sino como e berdad di Señor. . . . E trabao den locual tabata agradabel pe Señor usa nos talento humilde ta mas tanto un trabao di reconstruccion, ahustamento, i armonizacion en bez di un trabao di originacion.” Berdaderamente, el a expresa e sintimento di apóstol Pablo, cu ta skirbí den 1 Corintio 3:5-7.

¹⁶ Su actitud tabata completamente contrario cu e actitud di Charles Darwin. Den su promé publicacion dje buki The Origin of Species na 1859, Darwin bez tras bez a mencioná “mi” teoría, ignorando loke otronan promé cuné a bisa tocante evolucion. Un autor notable di siglo 19, Samuel Butler, a censura Darwin duro, bisando cu hopi otro hende di antes a promove e teoría di evolucion; Darwin di ningun manera a originé.

¹⁷ Un otro fiel sirbidor den tempo moderno cu Jehova Dios a usa poderosamente tabata Joseph F. Rutherford, mencioná den e introduccion. E tabata un defensor balente di berdad bíblico i specialmente dje nomber di Jehova. Aunque e tabata conocí na tur parti como Huez Rutherford, den su curazón e tabata un hende humilde. Por ehempel, na un tempo el a saca declaracion dogmático tocante loke hende cristian por a spera na 1925. Ora loke a sosode no a apoya loke el a spera, e humildemente a bisa e famía di Betel di Brooklyn cu el a haci co’i bobo. Un cristian ungí cu tabata basta pegá cuné a bisa cu bez tras bez el a tende ruman Rutherford pidi disculpa den e spiritu di Mateo 5:23, 24, tanto den público como na privá, pasobra el a ofende un otro cristian cu expresion imprudente. Humildad ta necesario pa hende den puesto di autoridad pidi disculpa di esnan sumiso na dje. Ruman Rutherford a pone ehempel excelente pa tur superintendente, sea di congregacion, of superintendente biahero, of den un sucursal dje Sociedad.

¹⁸ E tercer presidente dje Sociedad Watch Tower Bible and Tract, Nathan H. Knorr, aunque e tabata prominente den e pueblo di Jehova, també a demonstra cu e no a sintié halzá pa motibo di su puesto. Aunque el a sobresalí den su capacidad di organizá i den discurso público, e tabatin mashá respet pa loke otronan a haci. Pues, un biaha el a bishita un miembro dje Departamento di Skirbimento den su oficina i a bisa: “Esaki ta e lugar unda e trabao di mas importante i també mas dificultoso ta ser hací. P’sei mi ta haci asina poco di dje.” Sí, e tabata aplica humildemente e conseho den Filipense 2:3, cu ‘humildad di mente, hende mester considera cu otro ta superior cu nan.’ El a apreciá cu aunque su sirbishi como presidente dje Sociedad tabata importante, otro trabao també tabata importante. Humildad tabata necesario di su parti pe sintié asina i expresé asina claramente. E tabata un otro ehempel excelente pa tur hende imita, specialmente esnan cu por ocupa un puesto prominente di superintendencia.

¹⁹ Presidente di cuater dje Sociedad, Fred W. Franz, també tabata un ehempel excelente di humildad. Como vice presidente dje Sociedad pa mas cu 32 aña, el a haci hopi dje skirbimento di revista i programa di asamblea; pero en cuanto esei, e semper a keda den scur i nunca a busca atencion. Nos por menciona un ehempel comparabel di antigua. Ora Joab a derota ammonita den Rabá, el a percura pa rey David recibi e onor dje victoria.—2 Samuel 12:26-28.

²⁰ Berdaderamente, tin hopi ehempel excelente den pasado i ne tempo actual cu ta dúnanos motibo fuerte pa ser humilde. Sin embargo, tin hopi mas motibo pa nos ser humilde, i esei hunto cu yudanza pa nos ser humilde lo ser considerá den e sigiente artículo.

[Footnotes]

Bo Ta Corda?

◻ Menciona fruta di orguyo.

◻ Ken a pone ehempel di mas excelente di humildad?

◻ Kico ta mustra ken tabata e segundo ehempel mayor di humildad?

◻ Apóstol Pablo a pone cua ehempel excelente di humildad?

◻ Menciona ehempel di humildad prominente di hende djawe.

[Study Questions]

 1. Cua evidencia di humildad hende por a mira den un presidente di antes dje Sociedad Watch Tower?

 2. Di ki manera special sirbidor di Jehova Dios ta para na contraste notable cu hende di mundo?

 3. Kico nos por bisa tocante e fruta di orguyo?

 4. Cua texto bíblico ta mustra cu Jehova Dios ta humilde?

 5. Cua incidente ta duna testimonio dje humildad di Jehova?

 6. Cua característica di Jehova ta duna mas revelacion di su humildad?

7, 8. Kico e Scritura ta bisa tocante e humildad di Jesucristo?

9-12. Di ki manera apóstol Pablo a pone un ehempel excelente di humildad?

13. Kico ta haci e humildad di Pablo tanto notable?

14-16. (a) Di ki manera e promé presidente dje Sociedad Watch Tower tabata un ehempel excelente di humildad? (b) Su ehempel ta para na contraste notable cu ehempel di ken?

17. Menciona algun otro ehempel dje humildad di ruman Rutherford.

18. Kico e tercer presidente dje Sociedad a bisa cu a revela un estado mental humilde?

19, 20. (a) E cuarto presidente dje Sociedad a pone cua ehempel di humildad? (b) E sigiente artículo lo dúnanos cua yudanza pa nos eherce humildad?

[Picture on page 15]

Jesús a haci un demonstracion excelente di humildad

[Picture on page 16]

Pablo a pone un ehempel excelente di humildad

[Picture on page 17]

Ruman Russell no a duna mérito na su mes pa loke el a skirbi