E peliger nuclear a pasa por fin?

“PAZ riba tera ta parce mas posibel awor cu na cualkier tempo desde Gera Mundial II.” Tal ebaluacion optimista di un reportero di noticia na 1989 tabata fundá ariba e echo di cu acuerdo significante tocante desarmamento i tremendo cambio político inesperá por fin a termina e Gera Friu. Pero, e peliger nuclear, tanto característica di confrontacion di superpoder di antes, també a termina? Paz i siguridad permanente realmente ta alcanzabel pronto?

E peliger di aumento nuclear

Durante e Gera Friu, mientras cu superpoder a depende dje balanza di terror pa mantene paz, nan a conbini pa permiti e desaroyo di ciencia nuclear pa uso industrial pero pa limita e cantidad di nacion cu por traha arma nuclear. Na 1970 a drenta na vigor e Pacto di Limitacion Nuclear; despues mas cu 140 nacion a firma. Pero, nacion cu por traha arma nuclear, tal como Argentina, Brasil, India i Israel, a nenga di firma te ne tempo actual.

Sin embargo, na 1985, Nortcorea, un otro posibel poder nuclear, sí a firma. Pues, ora el a anuncia su retiro for dje pacto dia 12 di Mart di 1993, e mundo a reacciona lógicamente cu ansiedad. E noticiero alemán Der Spiegel a bisa: “E noticia di su retiro for dje Pacto di Limitacion Nuclear ta crea un modelo: Awor tin e peliger di un carreda di armamento nuclear, cuminzando den Asia, cu por bira mas peligroso cu e rivalidad di bomba entre e superpodernan.”

Ya cu nacionalismo ta duna luz na nacion nobo na un grado asombroso, e cantidad di nacion cu potencial nuclear probablemente lo aumenta. (Mira cuadro.) Periodista Charles Krauthammer a adverti: “E fin di e peliger ruso no kier men e fin di peliger nuclear. E berdadero peliger ta e aumento di nacion cu potencial nuclear, i e aumento solamente a cuminza.”

Bomba pa bende

Nacion cu ta deseá potencia nuclear ta ansioso pa gana e prestigio cu poder cu tal arma ta ofrece. Segun noticia, un país a cumpra por lo menos dos bomba nuclear for di Kazakhstan. E república ex-soviética oficialmente ta mencioná tal bomba como “perdí.”

Den October di 1992 varios homber tabata arestá den Frankfurt, Alemania, cu 200 gm di cesio sumamente radioactivo, suficiente pa venená e fuente completo di awa di un stad. Un siman despues, nan a coge siete contrabandista den München cu 2.2 kg di uranio. E descubrimento di dos cuadrío di contrabandista di material nuclear dentro di dos siman a spanta homber oficial, siendo cu solamente cinco caso asina tabata raportá mundialmente durante henter e aña anterior.

Nan no sa si tal contrabandista tabatin e intencion di bende tal material nuclear na grupo di terrorista of na gobierno nacional. No obstante, e posibilidad di terrorismo nuclear ta aumenta. Dr. David Lowry dje Centro Europeo di Informacion di Aumento Nuclear a splica e peliger: “Tur loke terrorista tin cu haci ta di manda un muestra di uranio sumamente ricu na un autoridad di bon fama pa haci prueba, bisando cu nos tin un cierto cantidad di uranio aki i esaki ta e prueba. Esei ta manera secuestrador mandando e orea di un víctima.”

“Bomba di tempo” i “trampa mortal” pacífico

Na principio di 1992, tabatin 420 planta nuclear ocupá den e trabao pacífico di produci corriente; un otro 76 tabata bao di construccion. Pero, através dje añanan, accidente den planta nuclear a resulta den informe di aumento di enfermedad, di aborto accidental, i di nacimento abnormal. Un informe ta bisa cu te na 1967 incidente den un planta di plutonio soviético a causa emision di tres bez mas tanto radioactividad como e catástrofe di Chernobyl.

Naturalmente, e último incidente ei den Chernobyl, Ucrania, den April di 1986 ta loke a sali den e noticia. Grigori Medwedew, diputado di ingeniero principal nuclear den e planta di Chernobyl entre 1970 i 1980, a splica cu e “nubia gigantesco di radioactividad di duracion largu” sacá na atmósfera “ta comparabel cu diez bomba di Hiroshima en cuanto loke ta toca efecto di largu plazo.”

Den su buki na ucranio Crónica di Chernobyl Medwedew a mencioná 11 incidente serio di planta nuclear den loke tabata e Union Soviética promé cu 1985 i un otro 12 na América. Esnan na América ta inclui e accidente escandaloso den 1979 na Three Mile Island. Medwedew a bisa tocante tal suceso: “Esei a dal e promé golpi serio contra e fama di energía nuclear i a despidi di ilusion tocante e siguridad di planta di energía nuclear den e mente di hopi hende​—⁠pero no den e mente di tur hende.”

Esei ta splica pakico contratiempo ta sigi sosode. Durante 1992 nan a aumenta den Rusia pa casi 20 porciento. Despues di un incidente asina, den Mart di 1992 ne planta di corriente di Sosnovy Bore den St. Petersburg, Rusia, e nivel di radiacion a subi pa 50 porciento den e nortoost di Inglaterra i a alcanza dobel e nivel máximo permití den Estonia i zuid di Finlandia. Profesor John Urquhart di Universidad di Newcastle a admiti: “Mi no por duna prueba cu tabata Sosnovy Bore cu a causa e aumento dje nivel di radioactividad​—⁠pero si e no tabata Sosnovy Bore, cua e tabata?”

Algun autoridad ta declara cu planta dje tipo di Chernobyl tin defecto den nan dibuho i ta simplemente demasiado peligroso pa usa. No obstante, mas cu un dozijn ta ser usá ainda pa satisface e demanda enorme pa corriente. Algun operador di planta a ser acusá di a paga e sistema di siguridad dominante pa nan aumenta produccion. Informe tal como esei ta spanta país tal como Francia, cu ta usa planta nuclear pa produci 70 porciento di su corriente. Un otro incidente manera esun di Chernobyl, i hopi planta den Francia por keda obligá di cerra permanentemente.

Asta planta “sigur” aparentemente ta bira insigur cu tempo. Cerca e principio di 1993, durante un chequeo rutinario di siguridad, mas cu cien scheur tabata hayá den pipa di stal den e planta di Brunsbüttel, un planta di mas bieu di Alemania. Scheur similar a ser hayá den planta den Francia i Suiza. E promé accidente serio den un planta nuclear den Hapón a sosode na 1991, i edad tabata un posible factor cu a contribui ne incidente. Esei ta un siñal malu pa América, unda aproximadamente dos tercera parti di planta comercial tin mas cu diez aña di edad.

Accidente den planta nuclear por sosode na cualkier lugar i na cualkier tempo. Mientras mas planta tin, mas grandi ta e peliger; i peliger ta aumenta cu edad dje planta. No ta sin motibo cu un corant a yámanan bomba di tempo marcando e ora i trampa mortal radioactivo.

Unda nan mester basha e veneno?

Recientemente hende a haya sorpresa pa haya un parque cant’i rio den Alpen francés cerá i bao di warda di poliz. E corant The European a splica: “Chequeo rutinario exigí despues di morto di un señora local debí na veneno di berilio dos luna pasá a revela nivel di radioactividad den e parque cu tabata 100 bez mas halto cu e nivel den e becindario.”

Berilio, un metal notablemente lihé producí via varios proceso, ta ser usá den fabricacion di avion i, den planta nuclear di corriente despues di ser hací radioactivo. Ta parce cu un fábrica produciendo berilio a basha basura dje proceso peligroso di haci berilio radioactivo den e parque of cerca dje. Segun e corant The European, “Stof di berilio, aunque e no ta radioactivo, ta un forma di mas venenoso di basura industrial cu hende ta conoce.”

Entretanto, segun informe, mas cu 17.000 tanki di basura radioactivo tabata bashá durante un periodo di 30 aña den lamá for di costa di Novaya Zemlya, cu hende soviético a usa como un sitio pa prueba nuclear entre 1950 i 1955. Además, seccion radioactivo di submarino nuclear i parti di por lo menos 12 reactor tabata bashá den e mesun dump conbeniente.

Sea cu contaminacion nuclear ta intencional of no, e ta peligroso. E noticiero Time a duna spiertamento tocante un submarino cu a sink for di costa norwego na 1989: “E resto dje naufragio ta lek cesio-137 caba, un químico cu ta causa cáncer. Asina leu e lek ta ser considerá mucho chikito pa afecta bida di lamá of salud humano. Pero e submarino Komsomolets també a hiba dos torpedo nuclear conteniendo 13 kg di plutonio cu mitá bida di 24.000 aña i veneno asina fuerte cu un punto di feneta di dje por mata hende. Experto ruso a adverti cu e plutonio por basha den e awa i contamina un parti enorme di lamá tan pronto como 1994.”

Naturalmente, bashamento di basura radioactivo no ta un problema di Francia i Rusia so. América tin “montaña di basura radioactivo i ningun sitio permanente pa wardé,” segun Time. E ta bisa cu un miyón barí di substancia fatal ta ser wardá den bodega temporario cu e semper presente “peliger di perdimento, hortamento i dañamento dje ambiente debi na descuido.”

Como si fuera pa ilustra tal peliger, un tanki di basura nuclear den un planta anterior di arma den Tomsk, Siberia, a explota den April di 1993, causando imaginacion mental spantoso di un segundo Chernobyl.

Claramente, cualkier grito di paz i siguridad declará riba base di un supuesto fin di peliger nuclear no tin bon fundeshi. Sin embargo, paz i siguridad sí ta cerca. Con nos sa esei?

[Box on page 4]

NACION NUCLEAR

Tin 12 i e cantidad ta aumenta

OFICIAL of NO OFICIAL: América, Belarús, Britania, China, Francia, India, Israel, Kazakhstan, Pakistan, Rusia, Ucrania, Zuidáfrica

POTENCIAL: Algeria, Argentina, Brasil, Iran, Iraq, Libia, Nortcorea, Siria, Taiwan, Zuidcorea

[Caption on page 3]

U.S. National Archives photo

[Caption on page 5]

Background: U.S. National Archives photo

[Caption on page 5]

Asta uso pacífico di energía nuclear por ta peligroso